web log free
August 11, 2020
editor

editor

ஐ.நா மனித உரிமைகள் பேரவையில் நிறைவேற்றப்பட்ட தீர்மானத்தின் பரிந்துரைகளை முழுமையாக நடைமுறைப்படுத்த முடியாது என்று ஜனாதிபதி மைத்திரிபால சிறிசேன தெரிவித்துள்ளார்.

இந்த விடயம் தொடர்பில் அவர் மேலும் தெரிவிக்கையில், “நாட்டின் அரசியலமைப்புக்கு எதிரான எந்தவொரு யோசனையையும், நிச்சயமாக நடைமுறைப்படுத்தமாட்டேன். ஐ.நா மனித உரிமைகள் பேரவையின் பல அறிக்கைகள் தவறானவை. சரியானதை மாத்திரம் அரசாங்கம் ஏற்றுக் கொள்ளும் தவறானவற்றை நிராகரிக்கும்.

வடக்கில் இராணுவத்தின் வசமுள்ள காணிகள் தொடர்பாக, ஐ.நா மனித உரிமை ஆணையாளர், சில குழுக்களால் தவறாக வழிநடத்தப்படுகிறார். அவரது அறிக்கையில் காணிகள் விடுவிப்பு தொடர்பாக கூறப்பட்டுள்ள பரிந்துரையை நான் ஏற்றுக் கொள்ளத் தயாராக இல்லை.

ஐ.நா மனித உரிமைகள் பேரவையில் நிறைவேற்றப்பட்ட இலங்கை தொடர்பான தீர்மானத்துக்கு இணை அனுசரணை வழங்க அரசாங்கம் எடுத்து முடிவு பற்றி எனக்குத் தெரியாது. எனக்கு அறிவிக்காமலேயெ, பெப்ரவரி 25ஆம் திகதி, ஜெனிவாவில் உள்ள இலங்கை தூதுவர் தீர்மானத்தில் கையெழுத்திட்டுள்ளார். அதனை நான் ஏற்றுக் கொள்ளமாட்டேன்.

ஐ.நா மனித உரிமைகள் பேரவையில் இலங்கை சார்பில் முன்வைக்கப்பட்ட அறிக்கை எனது தலையீட்டுடன் தான் வரையப்பட்டது. மனித உரிமை மீறல்கள் தொடர்பான விசாரணைகளை மேற்கொள்வதற்கான கலப்பு விசாரணைக்கு உறுதியான எதிர்ப்பு தெரிவிப்பதே அதன் நோக்கம்.

இலங்கைக்கு வெளிநாடுகளுடனான உறவுகள் முக்கியம். ஆனால், வெளிநாட்டு சக்திகளை இங்கு அதிகாரம் செலுத்த அனுமதிக்க முடியாது” என்றும் அவர் தெரிவித்துள்ளார்.

அமெரிக்காவுடன் சோபா எனப்படும் பாதுகாப்பு ஒப்பந்தத்தில் கையெழுத்திடக் கூடாது என்று மக்கள் விடுதலை முன்னணியின் நாடாளுமன்ற உறுப்பினர் பிமல் ரத்நாயக்க வலியுறுத்தியுள்ளார்.

நாடாளுமன்றத்தில் நேற்றுமுன்தினம் உரையாற்றிய அவர், இதனை வலியுறுத்தியிருக்கின்றார்.

அவர் தொடர்ந்து உரையாற்றுகையில், ‘2018 ஓகஸ்ட் 28ஆம் திகதி சோபா ஒப்பந்தம் தொடர்பான வரைவு ஒன்றை அமெரிக்கா அனுப்பி வைத்துள்ளது.

அதன்படி, அமெரிக்க இராணுவத்தினர் கடவுச்சீட்டு இல்லாமல், அமெரிக்க அடையாள அட்டை அல்லது சாரதி அனுமதிப்பத்திரத்துடன் இலங்கைக்குள் நுழைய முடியும்.

இந்த உடன்பாட்டுக்கு ஒப்பந்தத்துக்கு அமைய இலங்கைக்குள் நுழையும் அமெரிக்க படையினரை இலங்கை அதிகாரிகள் சோதனையிட முடியாது.

இலங்கைக்குள் நுழையும் அமெரிக்க கப்பல்களை சோதனையிடும் உரிமையும் இலங்கை அதிகாரிகளுக்கு இருக்காது.

அமெரிக்கா முன்மொழிந்துள்ள சோபா ஒப்பந்தம் ஒருதலைப்பட்சமானது. அதிலுள்ள சில பிரிவுகள் உள்நாட்டுச் சட்டங்களுக்கு எதிரானது.

பாதுகாப்பு அமைச்சர் என்ற வகையில், ஜனாதிபதி மைத்திரிபால சிறிசேன இந்த ஒப்பந்தத்தில் கையெழுத்திடக் கூடாது.”என்றும் அவர் வலியுறுத்தியுள்ளார்.

சீனாவுடனான சுதந்திர வர்த்தக ஒப்பந்தம் தொடர்பான பேச்சுக்களை மீண்டும் அரசாங்கம் ஆரம்பிக்கவுள்ளதாகவும், அடுத்த மாதம் அமைச்சர்கள் மட்டத்திலான பேச்சுக்கள் ஆரம்பிக்கப்படவுள்ளதாக செய்தி வெளியாகியுள்ளது.

அபிவிருத்தி மூலோபாயங்கள் மற்றும் சர்வதேச வர்த்தக அமைச்சர் மலிக் சமரவிக்ரம அடுத்தமாதம் சீனாவுக்குப் பயணம் மேற்கொள்ளவுள்ளார்.

அவர் சீனாவுடனான சுதந்திர வர்த்தக ஒப்பந்தம் தொடர்பாக, அமைச்சர்கள் மட்ட கலந்துரையாடலை நடத்தவுள்ளார்.

கூடிய விரைவில் இந்த ஒப்பந்தத்தை செய்து கொள்வது குறித்து சீன அரசின் உயர்மட்ட அதிகாரிகளுடன் தாம் பேசவுள்ளதாக அமைச்சர் மலிக் சமரவிக்ரம கூறியுள்ளார்.

நயன்தாரா நடிப்பில் ‘ஐரா’ படன் இன்று வெளியான நிலையில், இப்படத்தை தயாரித்த கேஜேஆர் ஸ்டூடியோஸ் நிறுவனம், இப்படத்தை தொடர்ந்து சிவகார்த்திகேயன் நடிக்கும் ‘ஹீரோ’ படத்தை தயாரிக்கிறது.

‘இரும்புத்திரை’ இயக்குநர் பி.எஸ்.மித்ரன் இயக்கத்தில் சிவகார்த்திகேயன் நடித்து வரும் ‘ஹீரோ’ திரைப்படத்தில் அவருக்கு ஜோடியாக கல்யாணி பிரியதர்ஷன் நடிக்கிறார். மற்றொரு நடிகையாக ‘நாச்சியார்’ படத்தில் நடித்த இவானா நடிக்கிறார்.

‘ஹீரோ’ படத்திற்கு அடுத்ததாக கேஜேஆர் ஸ்டூடியோஸ் விஜய் சேதுபதியை வைத்து படம் தயாரிக்க இருப்பதாக தகவல் வெளியாகியுள்ளது.

இதில் ‘ரம்மி’, ‘பண்ணையாரும் பத்மினியும்’, ‘தர்மதுரை’ போன்ற படங்களில் நடித்த ஐஸ்வர்யா ராஜேஷ் நடிக்கவுள்ளதாக கூறப்படுகிறது.

பெருந்தோட்ட தொழிலாளர்களுக்கு 50 ரூபாய் மேலதிக கொடுப்பனவை வழங்குவதற்கு அமைச்சரவை அனுமதி வழங்கியுள்ளது.

நாளாந்த கொடுப்பனவை 750 ரூபா வரையில் அதிகரிப்பதற்கு ஊழிய தொழிற்சங்கம் மற்றும் பிரதேச பெருந்தோட்ட நிறுவனங்களுக்கிடையில் உடன்பாடு ஏற்படுத்திக்கொள்ளப்பட்டது.

இந்த நிலையில், சம்பள அதிகரிப்பு போதுமானதாக இல்லை என தெரிவிக்கப்பட்ட நிலையில், தோட்டத்தொழிலாளர்களுக்காக நிவாரணம் வழங்கும் வகையில் நாளாந்த கொடுப்பனவுக்கு மேலதிகமாக மேலும் 50 ரூபாய் கொடுப்பனவை வழங்குவதற்கு நடவடிக்கை எடுக்கப்பட்டுள்ளது.

50 ரூபாய் கொடுப்பனவை வழங்க தேவையான நிதியை பெற்றுக்கொள்வதற்காக பெருந்தோட்ட தொழிற்துறை அமைச்சர் நவீன் திஸ்ஸாநாயக்க சமர்ப்பித்த ஆவணத்திற்கு அமைச்சரவை அங்கீகாரம் வழங்கியுள்ளது.

ஒருங்கிணைக்கப்பட்ட குற்றச்செயல்களுடன் தொடர்புடைய பாதாள உலககுழு தலைவர் என்று அறியப்படும் மாகந்துர மதுஷ் உள்ளிட்ட குழுவினடன் டுபாயில் கைது செய்யப்பட்ட பிரபல பாடகர் அமல் பெரேராவின் மகன் நதீமால் பெரேரா, விசாரணைகளின் பின்னர் விடுவிக்கப்பட்டுள்ளார்.

நதீமால் பெரேரா உள்ளிட்ட இருவர் டுபாய் விமான நிறுவனத்துக்கு சொந்தமான எப்.இசட். 547 என்ற விமானம் மூலம் இன்று அதிகாலை 6.15 மணியளவில் கட்டுநாயக்க விமான நிலையத்தை வந்தடைந்தனர்.

பிரபல பாடகர் நதீமால் பெரேரா மற்றும் சிறைச்சாலை அதிகாரியான கோதாகொட ஆரச்சிகே லலித் குமார ஆகிய இருவரே, இவ்வாறு நாடு கடத்தப்பட்டிருந்தனர்.

அத்துடன், கட்டுநாயக்க பண்டாரநாயக்க சர்வதேச விமான நிலையத்தை வந்தடைந்த இருவரும் குற்றப்புலனாய்வு திணைக்களத்தினால் விசாரணைக்கு உட்படுத்தப்பட்டனர்.

குற்றப்புலனாய்வு திணைக்கள அதிகாரிகள் மற்றும் பொலிஸ் போதைப் பொருள் ஒழிப்பின் பிரிவினர் இணைந்து இருவரிடமும் கட்டுநாயக்க விமான நிலையத்தில் சுமார் 07 மணி நேரம் விசாரணை நடத்தி நிலையில் விடுவிக்கப்பட்டுள்ளதாக தெரிவிக்கப்பட்டுள்ளது.


நாடாளுமன்ற உறுப்பினர் விமல் வீரவன்சவுக்கு எதிரான வழக்கு ஜூலை மாதம் வரை ஒத்திவைக்கப்பட்டுள்ளது.

குறித்த வழக்கு இன்றைய தினம் கொழும்பு மேல் நீதிமன்றில் விசாரணைக்கு எடுத்துக்கொள்ளப்பட்ட போது இந்த உத்தரவு பிறப்பிக்கப்பட்டது.

அமைச்சராக செயற்பட்ட காலத்தில் வருமானத்துக்கு அதிகமாக சட்டவிரோதமான முறையில் சொத்து சேகரித்தத குற்றச்சாட்டில், இலஞ்ச – ஊழல் ஆணைக்குழுவால், முன்னாள் அமைச்சர் விமல் வீரவன்சவுக்கு எதிராக கொழும்பு மேல் நீதிமன்றில் வழக்கு தாக்ல் செய்யப்பட்டது.

இன்றைய தினம் கொழும்பு மேல் நீதிமன்ற நீதிபதி ஆதித்ய பட்டபெந்திக முன்னிலையில் விசாரணைக்கு எடுத்துக்கொள்ளப்பட்டது.

இதன்போது, வழக்கினை ஜூலை மாதம் 29ஆம் திகதி விசாரணைக்கு எடுத்துக்கொள்ளவுள்ளதாக நீதிமன்றம் அறிவித்துள்ளது.

2009 ஜனவரி மாதம் 1ஆம் திகதி முதல் 2014 டிசம்பர் 31 ஆம் திகதி வரையான காலப்பகுதியில் வருமானத்திற்கு மேலதிகமாக 75 இலட்சம் ரூபாய் நிதி மற்றும் சொத்துகளை வைத்திருந்ததாக நாடாளுமன்ற உறுப்பின் விமல் வீரவன்ச மீது இலஞ்ச – ஊழல் ஆணைக்குழு வழக்கு தாக்கல் செய்துள்ளமை குறிப்பிடத்தக்கது.

பொதுமக்களுக்கு நாணயக் குற்றிகளை வழங்குவதற்காக கரும பீடம் இன்று திறக்கப்பட்டுள்ளது.

இக்கருமபீடம், அரச மற்றும் வங்கி விடுமுறைகள் தவிர்ந்த புதன்கிழமை மற்றும் வியாழக்கிழமைகளில் மு.ப 9.00 மணி தொடக்கம் மு.ப 11.00 மணிவரை பொதுமக்களுக்காக திறந்துவைக்கப்பட்டிருக்கும்.

இலங்கை மத்திய வங்கியின் தலைமைக் காரியாலயக் கட்டிடத்திலுள்ள தரைத்தள காசுக் கரும பீடங்களில் குறித்த புதிய கரும பீடம் திறக்கப்பட்டள்ளது.

நாணயக் குற்றிகளானது, ஒவ்வொன்றும் 100 எண்ணிக்கைகள் கொண்ட பக்கற்றுக்களில் வழங்கப்படுமென்பதுடன் ஒரே நேரத்தில் குறைந்தளவு ஒரே முகப்பெறுமதியிலிருந்து 100 குற்றிகளைக் கொண்ட ஒரு பக்கற்றேனும் பெற்றுக்கொள்ளக்கூடியதாக இருத்தல் வேண்டும்.

அதிகபட்சமாக 20,000 ரூபா வரை நாணயக்குற்றிகளை ஒருவர் மாற்றிப் பெற்றுக்கொள்ள முடியும்.

இது தொடர்பான விண்ணப்படிவங்கள் மற்றும் அறிவுறுத்தல் படிவங்களை காசாளர் கருமபீடத்தில் பெற்றுக்கொள்ள முடியும் என்பதோடு, தரவுகளை மத்திய வங்கியின் https://www.cbsl.gov.lk/ எனும் முகவரி ஊடாக பெற்றுக்கொள்ள முடியும் எனவும் மத்திய வங்கி அறிவித்துள்ளது.

தனக்கு எதிராக 217 வழக்குகள் தாக்கல் செய்யப்பட்டுள்ளதாக வடமாகாண ஆளுனர் கலாநிதி சுரேன் ராகவன் தெரிவித்துள்ளார்.

அத்துடன், கொழும்பு, யாழ்ப்பாண நீதிமன்றங்களில் இந்த வழக்குகள் தாக்கல் செய்யப்பட்டுள்ளதாகவும், ஒவ்வொரு விடயத்திற்கும் நீதிமன்றங்களை நாடி வழக்கு தாக்கல் செய்வதாகவும் அவர் கூறியுள்ளார்.

மேலும், தனக்கு எதிராக யாழ்ப்பாணம், கொழும்பு வவுனியா நீதிமன்றங்களின் தாக்கல் செய்யப்பட்ட 217 வழக்குகளை எதிர்கொண்டு வருவதாகவும் அவர் குறிப்பிட்டுள்ளார்.

இதேவேளை, அண்மையில் கூட ஊழியர் ஒருவர் பணியிடத்தில் தன்னுடைய உரிமை மீறப்பட்டுள்ளதாக கூறி வழக்கு தாக்கல் செய்துள்ளதாக தெரிவித்துள்ள வடக்கு ஆளுநர், குறித்த ஊழியர் இரண்டு வருட காலத்தில் ஓய்வு பெறவுள்ள நிலையில் வழக்கு தொடர்ந்துள்ளதாக சுட்டிக்காட்டியுள்ளார்.

பணிப்பெண்களாக வெளிநாடுகளுக்கு செல்லும் பெண்களின் எண்ணிக்கையை குறைப்பதற்கு நடவடிக்கைகள் முன்னெடுக்கப்பட்டுள்ளதாக மகளிர் விவகார அமைச்சர் சந்திராணி பண்டார தெரிவித்துள்ளார்.

அவர் அங்கு தொடர்ந்து கூறுகையில், “வெளிநாடுகளுக்கு பணிப்பெண்களாக செல்லும் பெண்களின் எண்ணிக்கையை குறைப்பதற்குரிய நடவடிக்கைகள் முன்னெடுக்கப்பட்டுள்ளன.

பெண்கள் பணிப்பெண்களாக வெளிநாடுளுக்கு செல்கின்றமை காரணமாக பல்வேறு சமூகப்பிரச்சனைகள் ஏற்படுகின்றன. எனவே இதனைக் கருத்தில் கொண்டே இந்த நடவடிக்கை முன்னெடுக்கப்பட்டுள்ளது.

அத்துடன், பெண்களுக்கான சுயதொழில் வாய்ப்புகளை ஏற்படுத்திக்கொடுப்பதற்கான விசேட வேலைத்திட்டம் நாடளாவிய ரீதியில் முன்னெடுக்கப்பட்டு வருகின்றது. மேலும், பெண்களுக்கு முச்சக்கர வண்டி சாரதி பயிற்சிகள் வழங்கப்பட்டு வருகின்றது” என்றார்.

© 2019 Asian Mirror (pvt) LTD