web log free
August 14, 2020
editor

editor

ஜனாதிபதி மைத்ரிபால சிறிசேனவுக்கும், எதிர்க்கட்சித் தலைவர் மஹிந்த ராஜபக்ஷ உள்ளிட்ட தரப்பினருக்கு இடையில் நேற்றைய தினம் சந்திப்பு இடம்பெற்றுள்ளது.

ஜனாதிபதியின் உத்தியோகபூர்வ இல்லத்தில் இந்த சந்திப்பு இடம்பெற்றுள்ளது.

ஐக்கிய மக்கள் சுதந்திரக் கூட்டணியில் அங்கம் வகிக்கும் கட்சிகளின் தலைவர்களும், ஒன்றிணைந்த எதிரணியைப் பிரதிநிதித்துவப்படுத்தும் கட்சிகளின் தலைவர்களும் சந்திப்பில் கலந்துகொண்டுள்ளனர்.

கூட்டணி ஒன்றை அமைப்பதே இந்தச் சந்திப்பின் நோக்கம் என, ஈழ மக்கள் ஜனநாயக கட்சியின் பொதுச் செயலாளரும் நாடாளுமன்ற உறுப்பினருமான டக்ளஸ் தேவானந்தா, தெரிவித்துள்ளார்.

போதைப்பொருள் குற்றவாளிகளுக்கு, இரண்டு மாதங்களுக்குள் மரணதண்டனையை நிறைவேற்ற நடவடிக்கை எடுக்கப்படும் என்று ஜனாதிபதி மைத்திரிபால சிறிசேன அறிவித்துள்ள நிலையில், ஐரோப்பிய ஒன்றியம் இந்த முடிவுக்கு கடும் எதிர்ப்பை வெளியிட்டுள்ளது.

நேற்று நாடாளுமன்றத்தில் உரையாற்றிய ஜனாதிபதி மைத்திரிபால சிறிசேன, போதைப்பொருள் குற்றவாளிகளுக்கு, இரண்டு மாதங்களுக்குள் மரணதண்டனையை நிறைவேற்ற நடவடிக்கை எடுக்கப்படும் என்று தெரிவித்தார்.

அண்மையில் பிலிப்பைன்ஸ் சென்றிருந்த ஜனாதிபதி, அங்கு போதைப்பொருள் குற்றவாளிகளுக்கு எதிராக எடுக்கப்படும் கடும் நடவடிக்கைகளை பாராட்டியிருந்ததுடன், அந்த வழியை தாமும் பின்பற்றப்போவதாக கூறியிருந்தார்.

இந்த நிலையிலேயே, 1976ஆம் ஆண்டுக்குப் பின்னர், இடைநிறுத்தி வைக்கப்பட்டுள்ள மரணதண்டனை நிறைவேற்றப்படும் நடைமுறையை மீண்டும் நடைமுறைக்குக் கொண்டு வரவுள்ளதாக ஜனாதிபதி அறிவித்துள்ளார்.

இந்தநிலையில் கொழும்பில் உள்ள ஐரோப்பிய ஒன்றிய தூதரகத்தின் பேச்சாளரிடம், இந்த விவகாரம் குறித்து, அரசாங்கத்துடன் ஐரோப்பிய ஒன்றியம் பேச்சு நடத்தியுள்ளதா என்று கேள்வி எழுப்பப்பட்டது.

அதற்கு அவர், “ எல்லா மனித உரிமை மீறல் விவகாரங்களையும் உள்ளடக்கிய கொள்கை ரீதியான கலந்துரையாடல்கள், அரசாங்கத்துடன் கிரமமாக நடத்தப்படுகிறது,

எந்தச் சூழ்நிலையிலும், மரணதண்டனை நிறைவேற்றப்படக் கூடாது என்ற உறுதியான நிலைப்பாட்டில் ஐரோப்பிய ஒன்றியம் இருக்கிறது.” என்று தெரிவித்துள்ளார்.

 

இலங்கையை பூர்வீகமாகக்கொண்ட பொரும்பான்மை இனத்தை சேர்ந்த நபர் ஒருவர் பெர்த் பொலிஸாரால் கைது செய்யப்பட்டுள்ளார்.

மனைவியை படுகொலை செய்தார் என்ற குற்றச்சாட்டின் பேரில் அவர் கைது செய்யப்பட்டுள்ளார்.

பெர்த்தின் Danehill Way பகுதியில் கடந்த ஞாயிற்றுக்கிழமை இந்த சம்பவம் இடம்பெற்றுள்ளது.

சம்பவத்தில் 44 வயதான பெண் ஒருவரே உயிரிழந்துள்ளார் என்று தெரிவிக்கப்பட்டுள்ளது.

குறித்த பிரதேசத்தில் இவர்கள் தங்கியிருந்ததாக கூறப்படும் வீட்டுக்கு கடந்த ஞாயிற்றுக்கிழமை காலை 9 மணியளவில் அவசர சேவைப்பிரிவினர் அழைக்கப்பட்டுள்ளனர்.

உடனடியாக சென்ற அவசர சேவைப்பிரிவினர் பலத்த காயங்களுடன் உயிருக்கு போராடிக்கொண்டிருந்த பெண்ணுக்கு சிகிச்சையளித்துள்ளனர். எனினும் சிகிச்சை பலனளிக்காமல் அவர் உயிரிழந்தார் என்று கூறப்படுகிறது.

இந்த சம்பவத்துடன் தொடர்புடையவர் என்ற சந்தேகத்தின் பேரில் கைது செய்யப்பட்ட நபர் பெர்த் நீதிமன்றில் முன்னிலைப்படுத்தப்பட்டார்.

எனினும் அவருக்கு பிணை மறுக்கப்பட்டுள்ளது. பிணை அனுமதியற்ற தடுப்புக்காவலில் தற்போது அவர் உள்ளார் என்று பொலிஸார் தெரிவித்துள்ளனர்.

குறிப்பிட்ட நபருக்கு எதிராக பொலிஸார் கொலைக்குற்றச்சாட்டு பதிவு செய்திருப்பதாக தெரிவிக்கப்படுகின்றது.

கடந்த ஞாயிற்றுக்கிழமை மாலை, பரிசின் லாச்சப்பல் மற்றும் ஸ்ராலின்கிராட் பகுதிகளிற்கு இடையில் பெரும் வன்முறைச் சம்பவம் ஒன்று நடைபெற்றுள்ளது.
இதில் 29 வயது இளைஞன் ஒருவரின் கை வெட்டித் துண்டாடப்பட்டுள்ளது.

ஸ்ராலின்கிராட் அருகிலுள்ள, பரிஸ் 10 இல் அமைந்துள்ள Boulevard de la Villette இல் நட்ட நடு வீதியில் இந்த இளைஞன் தாக்கப்பட்டுள்ளான்.

இந்த இளைஞனை, பல இளைஞர்கள் கொண்ட குழு ஒன்று, வாள், இரும்புக் கம்பிகள் சகிதம் துரத்தி வந்துள்ளனர்.

அவர்களிடம் இருந்து ஓடி வந்த இந்த இளைஞன், அங்கு வந்த ஒரு பஸ்ஸில் ஏற முயன்றபோதும், பயணிகளின் பாதுகாப்புக் கருதி, பஸ்சாரதி கதவைத் திறக்கவில்லை.

அந்தப் பஸ்ஸின் முன்னே வைத்தே, இந்த இளைஞனின் கை, அந்தக் குழுவால் வெட்டப்பட்டுள்ளது.

இந்தச் சம்பவத்தை, பஸ்ஸின் கண்காணிப்புக் கருவி ஒளிப்பதிவு செய்துள்ளது. சாரதி நேரடிச் சாட்சியத்தைக் பொலிஸாருக்கு வழங்கி உள்ளார்.

கைவெட்டப்பட்ட நிலையில், இரத்தவெள்ளத்தில் கிடந்த நிலையில், இந்த இளைஞன் அவசரமுதலுதவிப் படையாலும் பொலிஸரால் மீட்கப்பட்டு, Georges-Pompidou வைத்தியசாலைக்குக் கொண்டு செல்லப்பட்ட நிலையில், அங்கு, உயிரைக் காப்பதற்காக, இவரது கை முற்றாக வெட்டி அகற்றப்பட்டுள்ளது.

இளைஞன் இரத்த வெள்ளத்தில் கிடந்த பகுதியில் இருந்து, ஒரு கிலோமீற்றர் தூரத்திற்கு இரத்தத் தடயங்கள் கிடந்ததாகக் பொலிஸார் தெரிவித்துள்ளனர்.

இது இலங்கை சமூகத்தினரிடையே நடந்த மோதல் என்றும், இது ஒரு பழிவாங்கல் நடவடிக்கை என்றும் பொலிஸார் தெரிவித்துள்ளனர். மேலதிக விசாரணைகள் நடைபெறுகின்றன.

வடமாகாண சிரேஸ்ட பிரதி பொலிஸ்மா அதிபர் ரொசாந் பெர்னாண்டோவுக்கு எதிராக தேசிய பொலிஸ் ஆணைக்குழு மற்றும் வடமாகாண ஆளுநர் அலுவலகத்தில் முறைப்பாடு செய்யப்பட்டுள்ளது.

வட மாகாண சபையின் முன்னாள் எதிர்க்கட்சித் தலைவர் சி.தவராசாவால் இன்று இந்த முறைப்பாடுகள் செய்யப்பட்டுள்ளன.

கிளிநொச்சியில் போதைபொருள் கடத்தலில் ஈடுபட்டவர்கள் தொடர்பில் தகவல் வழங்கிய மாணவன் தாக்கப்பட்ட சம்பவம் தொடர்பில் உரிய நடவடிக்கை எடுக்கத் தவறியுள்ளதாக சிரேஸ்ட பிரதி பொலிஸ்மா அதிபர் மீது குற்றச்சாட்டு முன்வைக்கப்பட்டுள்ளது.

மாணவன் தாக்கப்பட்ட சம்பவம் தொடர்பில் உரிய விசாரணைகளை மேற்கொள்ள தவறியுள்ள பொலிஸார், சம்பவம் தொடர்பில் உரிய விசாரணை மேற்கொள்ள வேண்டும் என, தனது முறைப்பாட்டில் தவராசா குறிப்பிட்டுள்ளார்.

வடமாகாணத்தில் உள்ள சட்டவிரோத பதாதைகள் மற்றும் சுவரொட்டிகளை அகற்றுமாறு, வடக்கு ஆளுநர் கலாநிதி சுரேன் ராகவன் அதிகாரிகளுக்கு உத்தரவிட்டுள்ளார்.

அத்துடன், நகரங்களுக்கு அருகில் வைக்கப்பட்டுள்ள பதாதைகள் மற்றும் சுவரொட்டிகளின் உண்மைத்தன்மை மற்றும் சட்டத்தன்மையை உரிமையாளர்கள் இரண்டு வாரங்களுக்குள் உறுதிப்படுத்த வேண்டும் என்றும் அறிவுறுத்தப்பட்டுள்ளது.

மேலும், அதனை செய்யத்தவறும் உறுதிப்படுத்தாக சுவரொட்டிகள் மற்றும் பதாதைகள் உடனடியாக அகற்றப்பட வேண்டும் என்று ஆளுநர் உத்தரவிட்டிருப்பதாக, ஆளுநர் அலுவலகம் தெரிவித்துள்ளது.

அத்துடன், சட்டவிரோத பதாதைகள் மற்றும் சுவரொட்டிகளை வைத்த நபர்களுக்கு எதிராக சட்ட நடவடிக்கை எடுக்கப்படும் என்றும் அறிவுறுத்தப்பட்டுள்ளது.

ஒருங்கிணைக்கப்பட்ட குற்றங்கள் மற்றும் போதைப்பொருள் கடத்தல்கள் ஈடுபட்டுவந்த மாகந்துர மதுஷை கைதுசெய்தமை தொடர்பில் இராஜதந்திர மட்டத்தில் தமக்கு இதுவரை அரசாங்கத்துக்கு அறிவிக்கப்படவில்லை என, பாதுகாப்பு ராஜாங்க அமைச்சர் ருவான் விஜயவர்தன கூறியுள்ளார்.

எனினும், டுபாய் அரசாங்கத்துடன் கலந்துரையாடி மாகந்துர மதுஷை இலங்கைக்கு கொண்டுவர நடவடிக்கை மேற்கொள்ளப்படும் என்றும் அவர் குறிப்பிட்டுள்ளார்.

மாகந்துர மதூஸ் உள்ளிட்ட 25 பேர் டுபாயில் வைத்து நேற்றைய தினம் கைதுசெய்யப்பட்டிருந்தனர்.

இந்த சந்தேக நபர்கள், டுபாயிலுள்ள சிறைச்சாலையில் தடுத்து வைக்கப்பட்டு விசாரிக்கப்பட்டு வருவதாக அந்த நாட்டுத் தகவல்கள் குறிப்பிடுகின்றன.

சந்தேக நபர்களின் இரத்த மாதிரிகள் பெற்றுக்கொள்ளப்பட்டுள்ளதுடன், தற்போது முன்னெடுக்கப்பட்டுள்ள விசாரணைகளின்

பின்னரே அடுத்து மேற்கொள்ளப்படவேண்டிய நடவடிக்கைகள் தொடர்பில் தீர்மானிக்கப்படும் என, டுபாய் பொலிஸார் கூறியுள்ளனர்.

இதேவேளை, கைதுசெய்யப்பட்டவர்களில் காணப்படும் பாதாள உலக குழு உறுப்பினர்களை இலங்கைக்கு கொண்டு வருவதற்கான

நடவடிக்கைகள் தற்போது முன்னெடுக்கப்பட்டுள்ளதாக பொலிஸார் கூறியுள்ளனர்.

வட கொரியாவின் அணுவாயுத, ஏவுகணை திட்டங்கள் இன்னும் செயல்படுவதாக ஐக்கிய நாட்டு நிறுவனத்தின் நிபுணர்கள் கூறியுள்ளனர்.

விமான நிலையங்களிலும் பொது இடங்களிலும் அணுவாயுதங்களை அது மறைத்து வைத்திருப்பதாகக் கூறப்பட்டது.

ஐக்கிய நாட்டு நிறுவனப் பாதுகாப்பு மன்றத்துக்கு அனுப்பிய அறிக்கை ஒன்றில் நிபுணர்கள் அவ்வாறு குறிப்பிட்டனர்.

வட கொரியா மீது விதிக்கப்பட்டிருக்கும் தடைகளுக்கு எவ்வித பயனும் இல்லை என நிபுணர்கள் கூறுகின்றனர்.

சட்டவிரோதமாக எண்ணெய்ப் பொருள்களைப் பெற்றுக்கொள்வது, தடைசெய்யப்பட்ட நிலக்கரி, ஆயுதங்கள் ஆகியவற்றை விற்பது போன்ற நடவடிக்கைகளை வட கொரியா மேற்கொண்டு வருகிறது.

அமெரிக்க ஜனாதிபதி டொனால்ட் ட்ரம்ப், வட கொரிய தலைவர் கிம் ஜொங் உன்னை இரண்டாம் முறையாக சந்திக்க ஏற்பாடு செய்யப்படும் வேளையில், அந்தத் தகவல் வெளியிடப்பட்டிருக்கிறது.

 

 

 

பாதாள உலக குழு தலைவர்களில் ஒருவரான மாகந்துரே மதூஸ் என அழைக்கப்படும் மதூஸ் லக்ஷித்த உள்ளிட்டவர்களை நாட்டுக்கு அழைத்து வருவதற்கான நடவடிக்கைகள் முன்னெடுக்கப்பட்டுள்ளன.

வெளிவிவகார மற்றும் பாதுகாப்பு ஆகிய அமைச்சுக்கள் இணைந்து இதற்கான நடவடிக்கைகளை முன்னெடுப்பதாக பொலிஸ் விஷேட அதிரடிப்படையின் கட்டளை அதிகாரி சிரேஷ்ட பிரதி பொலிஸ் மா அதிபர் எம்.ஆர்.லத்தீப் தெரிவித்துள்ளார்.

போதைப் பொருள் வர்த்தகம் உள்ளிட்ட நாட்டில் இடம்பெற்ற பல்வேறுப்பட்ட குற்றச் செயல்களுடன் தொடர்புடைய மாகந்துரே மதூஸ் டுபாயிலுள்ள விருந்தகம் ஒன்றில் வைத்து கைது செய்யப்பட்டார்.

அவருடன் நான்கு பாதாள உலக குழு உறுப்பினர்கள் உள்ளிட்ட 25 பேர் கைது செய்யப்பட்டனர்.

கைதானவர்களில் இலங்கை பாடகர் அமல் பெரேரா மற்றும் அவரது புதல்வர் நதீமால் பெரேரா ஆகியோரும் உள்ளடங்குவதாக தெரிவிக்கப்பட்டுள்ளது.

இதுதவிர, பாதாள உலக குழு உறுப்பினர்களான கெசல்வத்தே தினுக, கஞ்ஜிபானி இம்ரான், ரனாலே சூட்டா மற்றும் அங்கொட சுத்தா ஆகியோரும் உள்ளடங்குகின்றனர்.


கடந்த 6 நாட்களாக முன்னெடுத்து வந்த சட்டப்படி வேலை செய்யும் போராட்டம் நேற்று இரவுடன் கைவிடப்பட்டுள்ளதாக சுங்க அதிகாரிகள் சங்க தலைவர் உதித்த ஜயசிங்க தெரிவித்துள்ளார்.

சுங்க திணைக்களத்தின் பணிப்பாளர் நாயகமாக கடமையாற்றிய பி.எஸ்.எம் சார்ள்ஸை மீண்டும் அந்த பதவிக்கு நியமிப்பதாக நிதியமைச்சு உத்தியோகபூர்வமாக அறிவித்ததை அடுத்து, இந்த போராட்டம் கைவிடப்பட்டுள்ளது.

பி.எஸ்.எம் சார்ள்ஸை அந்த பதவியில் இருந்து நீக்குவதற்காக நிதியமைச்சர் மங்கள சமரவீர முன்வைத்த அமைச்சரவை பத்திரம் நேற்றைய தினம் வாபஸ் பெற்றுக் கொள்ளப்பட்டது.

இதற்கமைய சுங்க பணிப்பாளர் நாயகம் பதவியிலிருந்து நீக்கப்பட்ட பி.எஸ்.எம் சார்ள்ஸை மீண்டும் மூன்று மாதகாலப்பகுதிக்காக நியமிக்க அமைச்சரவை அனுமதி கிடைக்க பெற்றுள்ளமை குறிப்பிடத்தக்கது.

© 2019 Asian Mirror (pvt) LTD