web log free
March 07, 2021
editor

editor

வெளிநாடுகளிலிருந்து குளிரூட்டப்பட்ட தேங்காய்களை இறக்குமதி செய்யும் வேலைத்திட்டம் இவ்வாரம் முதல் ஆரம்பிக்கப்படவுள்ளது.

நாட்டில் தேங்காய்களுக்கு ஏற்பட்டுள்ள தட்டுப்பாட்டை நிவர்த்தி செய்யும் வகையில் இந்த விசேட வேலைத்திட்டம் முன்னெடுக்கப்படவுள்ளதாக தெங்கு அபிவிருத்தி அதிகார சபையின் பணிப்பாளர் பி.எதிரிமான்ன தெரிவித்துள்ளார்.

அதற்கமைய இந்தோனேசியா, பிலிப்பைன்ஸ், வியட்நாம் உள்ளிட்ட நாடுகளிலிருந்து தேங்காய்கள் இறக்குமதி செய்யப்படவுள்ளன.

கடந்த வருடம் நிலவிய சீரற்ற காலநிலை காரணமாக தேங்காய்களின் உற்பத்தி வீழ்ச்சியடைந்துள்ளமையினால் தற்போது நாட்டில் தேங்காய்களுக்கான தட்டுப்பாடு நிலவிவருகின்றது.

அதன்காரணமாக நாட்டில் தேங்காய்களின் விலை சடுதியாக அதிகரித்துள்ளது.

இந்நிலையில், இந்த தட்டுப்பாட்டை நிவர்த்திக்கும் வகையிலும், விலை அதிகரிப்பை கட்டுப்படுத்தும் வகையிலும் வெளிநாடுகளிலிருந்து தேங்காய்களை இறக்குமதி செய்யவுள்ளதாக தெங்கு அபிவிருத்தி அதிகார சபையின் பணிப்பாளர் பி.எதிரிமான்ன தெரிவித்துள்ளார்.

இலங்கையில் கடந்த வருடத்தில் டெங்கு காய்ச்சலால் பாதிக்கப்பட்ட 30, 601 பேர் அடையாளம் காணப்பட்டுள்ளதாக தேசிய டெங்கு ஒழிப்புப் பிரிவு தெரிவித்துள்ளது.

இவர்களில் 35 பேர் உயிரிழந்துள்ளதாகவும் தேசிய டெங்கு ஒழிப்புப் பிரிவு குறிப்பிட்டுள்ளது.

எனினும், 2019 ஆம் ஆண்டுடன் ஒப்பிடுகையில் 2020 ஆம் ஆண்டில் மிகவும் குறைந்தளவானவர்களே டெங்கால் பாதிக்கப்பட்டுள்ளதாக தெரிவிக்கப்பட்டுள்ளது.

குறிப்பாக 2019 ஆம் ஆண்டில்  150,049 பேரே பாதிக்கப்பட்டுள்ளதாக டெங்கு ஒழிப்புப் பிரிவின் பணிப்பாளர் விசேட வைத்தியர் அருண ஜயசேகர தெரிவித்துள்ளார்.

எவ்வாறாயினும் டெங்கு பரவும் அபாயம் தொடர்ந்தும் இருப்பதாகவும் அவர் சுட்டிக்காட்டியுள்ளார்.

டெங்கு நுளம்பின் தாக்கம் காலை 6 மணியிலிருந்து 8 மணிவரையும், மாலை 4 மணியிலிருந்து 7 மணிவரையும் அதிகரித்து காணப்படுவதாகவும் அவர் குறிப்பிட்டுள்ளார்.

ஆகவே, மக்கள் சுற்றுப்புறச் சூழலை மிகவும் தூய்மையாக வைத்திருக்க வேண்டியது அவசியமாகும் என்று தேசிய டெங்கு ஒழிப்புப் பிரிவு வலியுறுத்தியுள்ளது.

கொரோனா வைரஸ் பரவலை கட்டுப்படுத்த ஜப்பான் தலைநகர் டோக்கியோவிலும், அதனை சுற்றியுள்ள 3 மாகாணங்களிலும் அவசர நிலை பிரகனடப்படுத்தப்பட்டுள்ளது.

ஜப்பானில் இதுவரையில் 2 இலட்சத்து 40 ஆயிரத்துக்கும் அதிகமானோர் கொரோனா வைரஸ் தொற்றால் பாதிக்கப்பட்டுள்ளதோடு 3, 548 பேர் உயிரிழந்துள்ளனர்.

கடந்த சில தினங்களாக டோக்கியோ உள்ளிட்ட நகரங்களில் கொரோனா தொற்று வேகமாகப் பரவி வருகிறது.

இந்நிலையில், வைரஸ் தொற்றைத் கட்டுப்படுத்தும் பொருட்டு, டோக்கியோ உள்ளிட்ட 3 மாகாணங்களில் அவசர கால  நிலையை ஜப்பானின் மத்திய அரசு அறிவித்துள்ளது.

கொரோனா வைரஸ் பரவலைக் கட்டுப்படுத்திய பல நாடுகளிலும் தற்போது கொரோனா வைரஸ் மீண்டும் பரவத் தொடங்கியுள்ளது.

இதன் காரணமாக பல நாடுகளிலும் கட்டுப்பாடுகள் படிப்படியாக கடுமையாக்கப்பட்டு வருகின்றமையும் குறிப்பிடத்தக்கது.

இயக்குனர் நெல்சன் திலீப் குமார் இயக்கத்தில் சிவகார்த்திகேயன் நடித்துள்ள டாக்டர் திரைப்படத்தின் படப்பிடிப்பு கடந்த சில மாதங்களாக நடைபெற்று வந்த நிலையில் தற்போது நிறைவடைந்துள்ளதாக படக்குழுவினர் அறிவித்துள்ளனர்.

படப்பிடிப்பு நிறைவடைந்ததை ஒட்டி படக்குழுவினர் கேக் வெட்டி கொண்டாடியுள்ளனர் . கேக் வெட்டி கொண்டாடிய புகைப்படங்கள் தற்போது இணையத்தில் வைரலாகி வருகின்றன.

இந்த விழாவில் படத்தின் கதாநாயகன் சிவகார்த்திகேயன்,இயக்குனர் நெல்சன் ,கதாநாயகி கல்யாணி பிரியதர்ஷன் உட்பட படக்குழுவினர் கலந்து கொண்டனர்.

இந்நிலையில் டாக்டர் படத்தை அடுத்து இயக்குனர் நெல்சன் தளபதி விஜய் நடிக்கும் படத்தை இயக்க உள்ளார் என்ற அதிகாரபூர்வ அறிவிப்பு ஏற்கனவே வெளியாகியது.

தளபதி விஜய் நடிக்கும் படத்தின் படப்பிடிப்பு வரும் ஏப்ரல் மாதம் தொடங்கும் என்றும் கூறப்படுகிறது. அதற்கு முன்னதாக தளபதி 65 படத்தில் நடிக்கும் நடிகர், நடிகையர் மற்றும் தொழில்நுட்ப கலைஞர்கள் தேர்வு செய்யப்பட இருப்பதாக தகவல் வெளியாகியுள்ளது.

இந்தப்படத்தில் தளபதி விஜய்க்கு ஜோடியாக தெலுங்கு நடிகை ரஷ்மிகா மந்தனா நடிக்க வாய்ப்பு இருப்பதாகவும் சினிமா வட்டாரத்தில் தகவல்கள் வலம் வருகின்றன.

தற்போது படப்பிடிப்பு நிறைவடைந்த நிலையில் மிக விரைவில் டாக்டர் திரைப்படத்தை திரையில் காண ரசிகர்கள் ஆவலாக இருக்கிறார்கள்.

டாக்டர் சின்னம் பொறித்த கேக் செய்யப்பட்டு அதனை வெட்டிக் கொண்டாடியுள்ளனர் படக்குழுவினர்.

சிவகார்த்திகேயன் இறுதியாக நடித்த படங்கள் எதிர்பார்த்த அளவு பேசப்படவில்லை என்றாலும், இந்த டாக்டர் படம் தரமான படைப்பாக அமைந்திருக்கும் என எதிர்பார்க்கப்படுகிறது. இயக்குனர் நெல்சன் அடுத்ததாக தளபதி விஜயை வைத்து படம் எடுக்கவுள்ள நிலையில் டாக்டர் படம் மீதான எதிர்பார்ப்பு எகிறியுள்ளது.

இந்திய திரையுலகில் மிகப் பிரம்மாண்டமான படைப்பாக திரைக்கு வந்த படங்கள் ஏராளம். அதில் பாகுபலி1, பாகுபலி 2 போன்ற படங்கள் அடங்குகின்றன.

தற்போது அந்த படங்களை விட மிக பிரமாண்டமான முறையில் தயாராகி வருகிறது பொன்னியின் செல்வன் படம்.

பொன்னியின் செல்வன் படத்திற்காக இயக்குனர் மணிரத்தினம் அயராது உழைத்து வருவதாக தகவல் வெளியாகியுள்ளது.

இந்தப் டத்தில் சரத்குமாருக்கு ஜோடியாக ஐஸ்வர்யாராய் நடிக்கவுள்ளதாகவும் இதற்காக பிரம்மாண்டமான அரங்கில் படப்பிடிப்பு நடைபெற உள்ளதாகவும் தகவல் வெளியாகியுள்ளது.

பொன்னியின் செல்வன் படத்தின் முதல்கட்ட படப்பிடிப்பு மலேசியாவில் நடைபெற்றது. இந்நிலையில் அடுத்த கட்ட படப்பிடிப்பு ஹைதராபாத்தில் உள்ள ராமோஜிராவ் பிலிம் சிட்டியில் நடைபெற இருக்கிறது.

பொன்னியின் செல்வன் படத்திற்காக அங்கு பிரம்மாண்ட அரண்மனை அரங்கு அமைக்கப்பட்டுள்ளது.வரும் 6ம் திகதி முதல் அங்கு படப்பிடிப்பு நடைபெற இருப்பதாக கூறப்படுகிறது.

மிகப்பெரிய நட்சத்திர பட்டாளமே இந்த படப்பிடிப்பில் கலந்து கொள்ள இருக்கிறது. ஜெயம் ரவி ,சரத்குமார் ,பார்த்திபன் ,கார்த்தி ,ரகுமான், பிரகாஷ்ராஜ் ,நிழல்கள் ரவி, ஐஸ்வர்யா லட்சுமி, த்ரிஷா, ஐஸ்வர்யாராய் ஆகியோர் முக்கிய கதாபாத்திரங்களில் இந்த படத்தில் நடிக்கிறார்கள்.

ஹைதராபாத்தில் 6 ஆம் திகதி தொடங்கும் படப்பிடிப்பு மார்ச் மாதம் இறுதி வரை நடைபெற உள்ளதாக தகவல் வெளியாகி உள்ளது.

கருணா அம்மான் என்றழைக்கப்படும் விநாயகமூர்த்தி முரளிதரனை கத்தி மற்றும் அரிவாளுடன் சந்திக்க சென்ற ஒருவர் பொலிஸாரால் கைது செய்யப்பட்டுள்ளார்.

நேற்றைய தினம் கிளிநொச்சிக்கு சென்றுள்ள விநாயகமூர்த்தி முரளிதரன் முரசுமோட்டை பகுதியில் தங்கியிருந்த போது, அவரை சந்திப்பதற்காக சென்ற ஒருவரை அங்கு பாதுகாப்பு கடமையில் இருந்த பொலிஸார் சோதனையிட்டுள்ளனர்.

இதன்போது அந்த நபரிடமிருந்து கத்தியொன்றும், அரிவாள் ஒன்றும் மீட்கப்பட்டுள்ளது. இதனையடுத்து அவரை சந்தேகத்தில் பொலிஸார் கைது செய்துள்ளனர்.

தான் கத்தி மற்றும் அரிவாள் ஆகியவற்றை வயலிற்கு பசைளை இடுவதற்காக எடுத்து சென்றதாகவும், திரும்புகையில் கருணா அம்மானை சந்திக்க சென்றதாகவும் சந்தேக நபர் பொலிஸாரிடம் தெரிவித்துள்ளதாக கூறப்படுகின்றது.

இந்த சம்பவம் தொடர்பாக பொலிஸார் விசாரணைகளை நடத்தி வருகின்றனர்.

கொட்டதெனிய- கரபொட்டுவாவ பிரதேசத்திலுள்ள இரும்பு உருக்கும் பட்டறையின் கொதிகலன் ஒன்று வெடித்தத்தில் ஒருவர் உயிரிழந்து, இருவர் காயமடைந்துள்ளனர்.

இன்று (3) காலை இந்த வெடிப்பு சம்பவம் இடம்பெற்றதுடன், இதில் மரணமடைந்த மற்றும் காயமடைந்த மூவரும் இந்தியர்கள் என்றும் கொட்டதெனிய பொலிஸார் தெரிவித்துள்ளனர்.

ஜாவிட் என்ற இந்தியரே இவ்வெடிப்பு சம்பவத்தில் உயிரிழந்தவர் என்றும்; தெரிவித்துள்ள பொலிஸார் படுகாயமடைந்த இருவரும் வத்துபிட்டிவல ஆரம்ப வைத்தியசாலையில் அனுமதிக்கப்பட்டுள்ளதாகவும் தெரிவித்துள்ளனர்.

அதிகமான இந்தியர்கள் கடமையாற்றும் இந்த நிறுவனம், இந்தியாவுக்குச் சொந்தமான நிறுவனம் என்றும் தெரிவிக்கப்பட்டுள்ளது.

பொலநறுவை கொரோனா சிகிச்சை நிலையத்தில் இருந்து தப்பிச் சென்ற மூன்று நோயாளர்களின் புகைப்படங்கள் ஊடகங்களில் வெளியிடப்பட்டுள்ளன.

கல்லேல்ல கொரோனா சிகிச்சை நிலையத்தில் அனுமதிக்கப்பட்டிருந்த 5 பேர் கடந்த 31ஆம் திகதி தப்பிச் சென்றனர். அதில் ஒரு தொற்றாளர் கண்டுபிடிக்கப்பட்ட நிலையில் ஏனையவர்களை கண்டுபிடிக்க பொலிஸார் நடவடிக்கை மேற்கொண்டனர்.

மறைந்திருக்கும் தொற்றாளர்களான நாமர்மல, மாரவில. பொரலெஸ்ஸ மற்றும் வைக்கால பிரதேசத்தை சேர்ந்தவர் என பொலிஸார் தெரிவித்துள்ளனர்.

பொலிஸாரினால் வெளியிடப்பட்ட தொற்றாளர்கள் மூவரின் புகைப்படங்கள் மற்றும் அவர்களின் தகவல்கள் உள்ளடக்கப்பட்டுள்ளது.

அவர்கள் தொடர்பில் ஏதாவது தகவல் கிடைத்தால் 071 8 591 233 என்ற இலக்கம் ஊடாக அல்லது 119 என்ற இலக்கத்திற்கு தகவல் வழங்குமாறு பொலிஸார் பொது மக்களிடம் கேட்டுள்ளனர்.

இந்த நோயாளர்கள் குறித்து மக்கள் மிகுந்த அவதானத்துடன் செயற்பட வேண்டும் எனவும் பொலிஸார் எச்சரித்துள்ளனர்.

மாரடைப்பினால் பாதிக்கப்பட்டு மருத்துவமனையில் அனுமதிக்கப்பட்டுள்ள சௌரவ் கங்குலியின் உடல்நிலை சீராக உள்ளதாகவும், அவர் முழு சுயநினைவுடன் இருப்பதாகவும் மருத்துவர்கள் தெரிவித்துள்ளனர்.

இந்திய கிரிக்கட்சபையின் தலைவரும் முன்னாள் அணித் தலைவருமான கங்குலிக்கு  சனிக்கிழமை காலை உடற்பயிற்சிக்குப் பின்னர் கங்குலிக்கு நெஞ்சு வலி ஏற்பட்டுள்ளது.

இதனையடுத்து அவர் உடனடியாக கொல்கத்தா வூட்லண்ட்ஸ் மருத்துவமனையில் சேர்க்கப்பட்டார். அங்கு அவருக்கு ஆஞ்சியோபிளாஸ்டி அறுவை சிகிச்சை மேற்கொள்ளப்பட்டது.

கங்குலியின் உடல்நிலை சீராக உள்ளதாகவும் தொடர்ந்து கண்காணிக்கப்பட்டு வருவதாகவும் மருத்துவர்கள் ஊடங்களிடம் தெரிவித்துள்ளனர்.

அவருக்கு இருதயத்தில் இரண்டு அடைப்புகள் உள்ளதாகவும் அது தொடர்பான சிகிச்சைகள் தொடர்பில் வரும் திங்களன்று தீர்மானிக்கப்படும் என்றும் மருத்துவர்கள் கூறியுள்ளனர்.

மாரடைப்புக்குப் பின்னர் அவருக்கு இப்போது ஓய்வு தேவைப்படுவதாகவும், ஆபத்தான நிலை ஏதும் இல்லை என்றும் அவர்கள் தெரிவித்துள்ளனர்.

சச்சின் டெண்டுல்கார் இது குறித்து  தனது டுவீட்டர் பக்கத்தில் பதிவொன்றையும் செய்துள்ளார்.

கொழும்பு மருத்துவமனையில் சிகிச்சை பெற்றுவந்த தமிழ்த் தேசியக் கூட்டமைப்பின் தலைவர் இரா.சம்பந்தன் குணமடைந்து வீடு திரும்பிவிட்டதாக தெரிவித்துள்ளார்.

மூத்த அரசியல் தலைவரான சம்பந்தன், புத்தாண்டு பிறப்புக்கு முதல்நாள் இரவு உடல் உபாதைகள் காரணமாக கொழும்பு ஆஸிரி மருத்துவமனையின் அதிதீவிர சிகிச்சைப் பிரிவில் சேர்க்கப்பட்டிருந்தார்.

பின்னர் மறுநாள் இரவு உடல்நிலை சீராக இருந்தமையால் சாதாரண கண்காணிப்பு விடுதிக்கு அவர் மாற்றப்பட்டிருந்தார்.

இந்நிலையில், நேற்று சனிக்கிழமை மாலை 6.30 மணியளவில் மருத்துவமனையிலிருந்து அவர் கொழும்பிலுள்ள வீட்டுக்குத் திரும்பியுள்ளார்.

இதையறிந்து தொலைபேசியூடாக ஊடகவியலாளர்கள் அவரைத் தொடர்புகொண்டபோது, “நான் நலமுடன் இருக்கின்றேன். மருத்துவமனையிலிருந்து வீடு திரும்பி விட்டேன்” என்று பதிலளித்தார்.

Page 7 of 614
© 2019 Asian Mirror (pvt) LTD