web log free
March 07, 2021
editor

editor


இலங்கையில் பரவிவரும் சேனா படைப்புழு தொடர்பில் ஆய்வுகளை மேற்கொண்டு, தேவையான பரிந்துரைகளை வழங்குவதற்காக ருவாண்டாவின் நிபுணர் குழுவொன்று இலங்கை வந்துள்ளனர்.

இலங்கையில் சேனா படைப்புழு அதிகளவில் தாக்கத்தை ஏற்படுத்தியுள்ள பகுதிகளுக்கு சென்று ஆய்வுகளை மேற்கொண்டு, படைப்புழுவை இல்லாதொழிப்பதற்கான பரிந்துரைகளை வழங்கவே அவர்கள் இலங்கை வந்துள்ளனர்.

கடந்த இரு வருடங்களாக நாட்டின் பல்வேறு பகுதிகளைச் சேர்ந்த விவசாயிகளும் சேனா படைப்புழு அச்சுறுத்தலால் பாதிக்கப்பட்டுள்ளனர்.

சேனா படைப்புழு இலங்கையில் முதன்முதலாக 2018 ஆம் ஆண்டு இறுதிப் பகுதியில் கண்டறியப்பட்டு, கட்டுப்பாட்டுக்குள் கொண்டுவரப்பட்டதும் குறிப்பிடத்தக்கது.

மீண்டும் ஏற்பட்டுள்ள சேனா படைப்புழு பரவலால் இலங்கையின் பல மாவட்டங்களிலும் பயிர்ச்செய்கை பாதிக்கப்பட்டுள்ளதுடன், எதிர்பார்க்கப்பட்ட விளைச்சலும் குறைவடைந்துள்ளதாக விவசாயிகள் தெரிவித்துள்ளனர்.

இதேவேளை, 6 பேர் அடங்கிய ருவாண்டா நிபுணர் குழுவினர் கட்டுநாயக்க விமான நிலையத்தில் ரெபிட் என்டிஜன் பரிசோதனைக்கு உட்படுத்தப்பட்ட பின்னரே நாட்டினுள் அனுமதிக்கப்பட்டதாகவும் தெரிவிக்கப்பட்டுள்ளது.

புதிய வகை உருமாறிய கொரோனா வைரஸ் பரவலைக் கட்டுப்படுத்த பிரான்ஸில் இன்று முதல் இரவுநேர ஊரடங்கு உத்தரவு அமுல்ப்படுத்தப்படவுள்ளதாகத் தெரிவிக்கப்பட்டுள்ளது.

பிரான்ஸின் 15 பிராந்தியங்கள் மற்றும் முக்கிய நகரங்களில் இன்று மாலை 6 மணி முதல் ஊரடங்கு உத்தரவு அமுல்ப்படுத்தப்படவுள்ளதாகத் தெரிவிக்கப்பட்டுள்ளது.

உலகளவில் கொரோனா தொற்றினால் அதிக பாதிப்பினை எதிர்கொண்ட 5 ஆவது நாடாக பிரான்ஸ் விளங்குவதுடன், அங்கு இதுவரையில் 26 இலட்சத்து 39 ஆயிரத்து 773 பேர் கொரோனா தொற்றுக்கு உள்ளாகியுள்ளதுடன் 64 ஆயிரத்து 765 பேர் உயிரிழந்துள்ளனர்.

பிரான்ஸில் கடந்த 24 மணித்தியாலங்களில் 19,348 பேர் கொரோனா தொற்றுக்கு உள்ளாகியுள்ளதுடன் 133 பேர் உயிரிழந்துள்ளதாகக் குறிப்பிடப்பட்டுள்ளது.

கொரோனா வைரஸ் பரவலைக் கட்டுப்படுத்திய பல நாடுகளிலும் தற்போது புதிய வகை உருமாறிய கொரோனா வைரஸ் பரவத் தொடங்கியுள்ளது.

இதன் காரணமாக பல நாடுகளிலும் கட்டுப்பாடுகள் படிப்படியாக கடுமையாக்கப்பட்டு வருகின்றமையும் குறிப்பிடத்தக்கது.

தேசிய மருந்துகள் ஒழுங்குப்படுத்தல் அதிகார சபையில் பதிவு செய்யப்படாத கைத்தொற்று நீக்கி திரவங்களை (சானிடைசர்)  விற்பனை செய்வதை தடை செய்து விசேட வர்த்தமானி அறிவித்தலொன்று வெளியிடப்பட்டுள்ளது.

அதற்கமைய, பதிவு செய்யப்படாத கைத்தொற்று நீக்கிகளை இறக்குமதி செய்தல், மொத்தமாக சேமித்து வைத்திருத்தல் மற்றும் வர்த்தகத்தில் ஈடுபடுதல் என்பன தடை செய்யப்பட்டுள்ளது.

குறித்த தடை எதிர்வரும் பெப்ரவரி 1 ஆம் திகதி முதல் அமுலுக்கு வருவதாக வர்த்தமானி அறிவித்தலில் குறிப்பிடப்பட்டுள்ளது.

நாட்டில் கொரோனா தொற்று அச்ச நிலைமை ஏற்பட்டதை தொடர்ந்து, தொற்று நீக்கி திரவங்களின் விற்பனைகள் அதிகரித்திருந்ததுடன், அதன் விலைகளும் அதிகரிக்கப்பட்டிருந்தன.

இவ்வாறான நிலைமையில் தரமற்ற தொற்று நீக்கி திரவங்களும் சந்தைகளில் விற்பனை செய்யப்படுவதாக கிடைக்கப்பெற்ற முறைப்பாடுகளை தொடர்ந்தே அதனை கட்டுப்படுத்தும் வகையில் கட்டாயம் அதனை பதிவு செய்ய வேண்டுமென்று அறிவிக்கப்பட்டுள்ளது.

2021 ஆம் ஆண்டின் முதல் நாளான நேற்று மட்டும் இந்தியாவில் புதிதாக 60 ஆயிரம் குழந்தைகள் பிறந்திருப்பதாக ஐக்கிய நாடுகள் சபையின் யூனிசெப் அமைப்பு தெரிவித்துள்ளது.

இதுகுறித்து ஐக்கிய நாடுகள் சபையின் யூனிசெப் அமைப்பு வெளியிட்டுள்ள அறிக்கையின்படி, உலகம் முழுவதும் ஜனவரி ஒன்றாம் திகதி மட்டும் புதிதாக 3,71,504 குழந்தைகள் பிறந்துள்ளதாகவும் இதில் இந்தியாவில் தான் அதிகபட்சமாக 60,000 குழந்தைகள் பிறந்துள்ளதாக தெரிவிக்கப்பட்டுள்ளது.

அடுத்தபடியாக சீனாவில் 35,615 குழந்தைகள், நைஜீரியா (21,439), பாகிஸ்தான் (14,161), இந்தோனேசியா (12,336), எத்தியோப்பியா (12,006), அமெரிக்கா (10,312).

இதனை தொடர்ந்து எகிப்து (9,455), பங்களாதேஷ் (9,236) மற்றும் காங்கோ ஜனநாயக குடியரசு (8,640) குழந்தைகள் பிறந்துள்ளதாக ஐக்கிய நாடுகள் சபையின் யூனிசெப் அமைப்பு தெரிவித்துள்ளது.

சிவப்பு எறும்பு சட்னி சாப்பிடுவதால் கொரோனா வைரஸ் குணமாகுமா என்பது குறித்து மூன்று மாதங்களுக்குள் முடிவு எடுக்குமாறு ஒடிஷா நீதிமன்றம் உத்தரவிட்டுள்ளது.

உலகம் முழுவதும் பெரும் பாதிப்புகளை ஏற்படுத்தியுள்ள கொரோனா வைரஸிற்கு இதுவரை அதிகாரப்பூர்வ தடுப்பு மருந்து கண்டுபிடிக்கப்படவில்லை. தடுப்பு மருந்து கண்டுபிடிக்கும் முயற்சியில் உலக நாடுகள் ஈடுபட்டுவருகிறது.

இந்நிலையில் சிவப்பு எறும்பு சட்னி சாப்பிட்டால் கொரோனா வைரஸ் குணமாகும் எனவும், அதுகுறித்து முடிவெடுக்கும்படியும் நயாதர் பதியால் என்னும் பொறியாளர் கடந்த ஜூன் மாதம் கூறியிருந்தார்.

அவர் கூறிய தகவலில், "சிவப்பு எறும்பு சட்னியில் ஃபார்மிக் அமிலம், புரதம், கால்சியம், விட்டமின் பி12, துத்தநாகம் மற்றும் இரும்பு சத்துகள் இருப்பதால் அது நோய் எதிர்ப்பு சக்தியை அதிகரிப்பதாகவும், ஒடிஷா, சட்டிஸ்கர் உள்ளிட்ட சில பகுதிகளில் வசித்துவரும் சில பழங்குடியின மக்கள் இந்த சிவப்பு எறும்பு சட்னியை சாப்பிட்டுவருவதாகவும், காய்ச்சல், சளி, இருமல், உடல் சோர்வு போன்ற பிரச்சனைகளுக்கு அவர்கள் இந்த சட்னியை பயன்படுத்திவருவதாக தெரிவித்துள்ளார்.

மேலும், இந்த சிவப்பு எறும்பு சட்னியை உணவில் சேர்ப்பவர்கள் மத்தியில் கொரோனா வைரஸ் பாதிப்பு மிக மிக குறைவாக காணப்படுவதாகவும், இந்த சிவப்பு எறும்பு சட்னியில் ஃபார்மிக் அமிலம், புரதம், கால்சியம், விட்டமின் பி12, துத்தநாகம் மற்றும் இரும்பு சத்துகள் இருப்பதால் அது நோய் எதிர்ப்பு சக்தியை அதிகரிப்பதாக பதியால் தெரிவித்திருந்தார்".

அவர் தெரிவித்திருந்த இந்த கருத்து மீது இதுவரை எந்த ஒரு நடவடிக்கையும் எடுக்கப்படாமல் இருந்த நிலையில், ஒடிஷா உயர்நீதிமன்றத்தில் பதியால் இதுகுறித்து வழக்கு தொடர்ந்தார். வழக்கை விசாரித்த நீதிபதிகள், இந்த விவகாரத்தில் மூன்று மாதங்களுக்குள் முடிவு எடுக்குமாறு ஆயுஷ் அமைச்சகம், அறிவியல் மற்றும் தொழில்துறை ஆராய்ச்சி கவுன்சிலுக்கு உத்தரவிட்டுள்ளனர்.

ஏற்கனவே பல்வேறு தடுப்பூசிகள் சோதனை முயற்சியில் இருக்கும்போது, தற்போது இந்த பட்டியலில் சிவப்பு எறும்பு சட்னியும் இணைந்துள்ளது.

இலங்கையில் சுகாதார ஒழுங்குவிதிகளுடன் கிறிஸ்தவ தேவாலயங்களில் புத்தாண்டு ஆராதனைகள் நடைபெற்றன.

முன்னைய வருடங்களில் தேவாலயங்களில் புத்தாண்டு நள்ளிரவு ஆராதனைகள் நடத்தப்பட்ட போதும், தற்போது நாட்டில் நிலவும் கொரோனா தொற்று நிலைமையால் இந்த வருடம் நள்ளிரவு ஆராதனைகளுக்கு அனுமதி வழங்கப்பட்டிருக்கவில்லை.

எனினும் இன்று காலை மட்டுப்படுத்தப்பட்ட எண்ணிக்கையிலானோரை கொண்டு தேவாலயங்களில் விசேட ஆராதனைகள் நடத்தப்பட்டன.

சுகாதார நடைமுறைகளை பின்பற்றி அவர்கள் அந்த ஆராதனைகளில் கலந்துகொண்டனர்.

ஆராதனை நிகழ்வுகளின் போது, பொலிஸாரும் மற்றும் இராணுவத்தினரும் தேவாலய பகுதிகளில் விசேட பாதுப்பை வழங்கியிருந்தன.

முகக்கவசம் அணியாமை மற்றும் சமூக இடைவெளியை பேணாமை தொடர்பில் இதுவரை 2 ஆயிரத்திற்கும் மேற்பட்டோர் கைது செய்யப்பட்டுள்ளதாக பொலிஸ் ஊடகப்பேச்சாளர் பிரதி பொலிஸ்மா அதிபர் அஜித் ரோஹண தெரிவித்துள்ளார்.

இன்று காலை 6 மணியுடன் முடிவடைந்த 24 மணித்தியாலங்களில் மாத்திரம் 25 பேர் கைதுசெய்யப்பட்டுள்ளனர்.

அதற்கமைய ஒக்டோபர் 30ஆம் திகதி முதல் இதுவரையில் 2,024 பேர் கைது செய்யப்பட்டுள்ளனர்.

முகக்கவசம் அணிதல் மற்றும் சமூக இடைவெளியை பேணுதல் தொடர்பில் தொடர்ந்தும் பொலிஸார் சோதனை நடவடிக்கைகளை முன்னெடுத்து வருகின்றனர்.

அதனால், நாட்டில் எந்த பகுதிகளில் இருந்தாலும் இந்த விதிமுறைகளை கடைப்பிடிக்க வேண்டியது கட்டாயமாகும்.

இந்த சட்டவிதிகளை மீறும் நபர்களை கைதுசெய்வதுடன் அவர்களுக்கு எதிராக சட்டநடவடிக்கை எடுக்கப்படும் என அவர் மேலும் குறிப்பிட்டுள்ளார்.

பைசர்- பயோன்டெக் நிறுவனங்கள் இணைந்து தயாரித்துள்ள கொரோனா தடுப்பு மருந்தை அவசரகால பயன்பாட்டுக்கு உபயோகப்படுத்தி கொள்ள உலக சுகாதார ஸ்தாபனம் அனுமதியளித்துள்ளது.

சீனாவின் வூஹான் மாநிலத்தில் இருந்து 2019 ஆம் ஆண்டு இறுதியில் முதன் முதலாகக் கண்டறியப்பட்ட கொவிட் 19, தற்போது முழு உலகுக்கும் பரவியுள்ளது.

இதனையடுத்து, பல்வேறு நாடுகள் கொரோனா வைரஸூக்கு எதிராக தடுப்பு மருந்துகளை கண்டறியும் பணிகளை முன்னெடுத்துள்ளன.

இந்நிலையில் பைசர் – பயோன்டென் நிறுவனங்களினால் தயாரிக்கப்பட்டுள்ள தடுப்பு மருந்தை அவசர தேவைக்கு பயன்படுத்தி கொள்ள முடியுமென்று உலக சுகாதார ஸ்தாபனம் அறிவித்துள்ளது.

உலகம் முழுவதும் உள்ள பல்வேறு நாடுகள் குறித்த தடுப்பூசிக்கு ஒப்புதல் வழங்கி, தமது நாட்டிற்கு தேவையான தடுப்பூசிகளை பெற்றுக்கொள்ள முடியுமென உலக சுகாதார ஸ்தாபனம் அறிவித்துள்ளது.

இலங்கையில்  கொரோனா வைரஸை கட்டுப்படுத்துவம் வகையில் முன்னெடுக்கும் நடவடிக்கைகளுக்காக, 25 மாவட்டங்களுக்கும் உயர் இராணுவ அதிகாரிகள் நியமிக்கப்பட்டுள்ளனர்.

கொவிட் தடுப்புக்கான தேசிய செயலணியின் தலைவரும் இராணுவத் தளபதியுமான ஜெனரல் ஷவேந்திர சில்வாவின் பரிந்துரைக்கமைய கொவிட் தடுப்பு ஒருங்கிணைப்பு பணிகளுக்காக உயர் இராணுவ அதிகாரிகள் நியமிக்கப்பட்டுள்ளனர்.

இந்த நியமனம் நேற்றைய தினம் வழங்கப்பட்டதுடன், அவர்கள் அனைவரும் இன்று முதல் தமது கடமைகளில் ஈடுப்படவுள்ளனர்.

மேஜர் ஜெனரல்கள், பிரிகேடியர்கள் மற்றும் கேணல் ஆகிய தரத்திலுள்ள இராணுவ அதிகாரிகள் இவ்வாறு மாவட்ட ரீதியான ஒருங்கிணைப்பு பணிகளை மேற்கொள்ள நியமிக்கப்பட்டுள்ளனர்.

அந்தந்த பகுதிகளில் உள்ள கொரோனா வைரஸ் பாதிக்கப்பட்ட நோயாளிகளுடன் தொடர்புபட்ட அனைவரையும் கண்டறிந்து, அவர்களை தனிமைப்படுத்தல் செயற்பாடுகளுக்கு உற்படுத்தல், சிகிச்சையளித்தல், மருந்துப் பொருள் விநியோகம், உலர் உணவு பொருள் விநியோகம், தொழில்நுட்ப தேவைகைளை பூர்த்தி செய்தல் மற்றும் பிற அத்தியாவசிய பொருட்கள் விநியோகம் உள்ளிட்ட பல்வேறு பணிகளுக்காக ஒருங்கிணைப்பு நடவடிக்கைகளை இந்த அதிகாரிகள் இன்று முதல் மேற்கொள்வார்கள் என அறிவிக்கப்பட்டுள்ளது.

பிறக்கும் புத்தாண்டில் எத்தகைய தடைகளுக்கு முகம்கொடுக்க நேர்ந்தாலும் அவற்றை வெற்றிகொள்வதற்கான ஆத்ம பலமும் தைரியமும் எம்மிடம் உள்ளது என்று நாங்கள் உறுதியாக நம்புகிறோம் என்று ஜனாதிபதி கோட்டாபய ராஜபக்‌ஷ தெரிவித்துள்ளார்.

தனது புத்தாண்டு வாழ்த்துச் செய்தியிலேயே ஜனாதிபதி இவ்வாறு குறிப்பிட்டுள்ளார்.

புத்தாண்டின் விடியல், கடந்து செல்லும் ஒவ்வொரு தருணத்திலும் நாம் எதிர்நோக்கும் சவால்களை சரியாகப் புரிந்துகொண்டு வாழ்க்கையைத் திட்டமிடுவதற்கும், உறுதியுடன் முன்னேறுவதற்கும் எம்மை ஊக்குவிக்கின்றது. எனவே, 2021 ஆம் ஆண்டை ஒரு நேர்மறையான மனப்பாங்குடனும், திடவுறுதி மற்றும் அர்ப்பணிப்புடனும் நாம் வரவேற்கிறோம் என்று ஜனாதிபதி கூறியுள்ளார்.

சுபீட்சத்தை நோக்கிய பயணம் வெற்றிகரமாக ஆரம்பித்துள்ள நிலையில், எதிர்பாராத விதமாக நாட்டில் ஏற்பட்டுள்ள கோவிட் நோய்த்தொற்றினை வெற்றிகொள்ள முழு உலகுடனும் இணைந்து நாமும் முன்னிலை வகித்துள்ளோம். கடுமையான சவால்கள் மற்றும் தடைகளுக்கு மத்தியிலும், தேசிய அபிலாஷைகளின் அடிப்படையில் நிலையான அபிவிருத்திக்கு அடித்தளம் அமைக்க எமக்கு முடிந்தது.

மக்களின் எதிர்பார்ப்புகளை அடைந்துகொள்வதற்கு எடுக்கப்பட்ட நடவடிக்கைகளை புதிய ஆண்டில் மேலும் வலுப்படுத்த அரசாங்கம் தயாராக உள்ளது. மக்களை மையமாகக் கொண்ட அபிவிருத்தி மற்றும் தேசிய தனித்துவத்தைப் பாதுகாக்கும் எதிர்பார்ப்புடனேயே புதிய அரசாங்கம் உருவாக்கப்பட்டது.

நாட்டுக்கும் மக்கள் ஆணைக்கும் எதிராக அரசாங்கம் செயற்படாது என்ற அரசாங்கத்தின் மீதான மக்கள் நம்பிக்கை வீண்போக நாம் இடமளிக்கமாட்டோம் என்று ஜனாதிபதி கோட்டாபய ராஜபக்‌ஷ தனது வாழ்த்துச் செய்தியில் மேலும் கூறியுள்ளார்.

நாடு எதிர்கொண்டுள்ள சவால்களை மலர்ந்துள்ள புத்தாண்டில் நாம் ஒன்றிணைந்து வெற்றிக்கொள்ள முடியுமென்று நம்பிக்கை கொள்வதாக பிரதமர் மகிந்த ராஜபக்‌ஷ தனது புத்தாண்டு வாழ்த்துச் செய்தியில் தெரிவித்துள்ளார்.

எமது எதிர்கால தலைமுறையினரின் எதிர்காலத்திற்காகவே இன்று நாம் இத்தாய்நாட்டிற்காக கடினமாக உழைத்து எம்மை அர்ப்பணித்து வருகின்றோம். எனவே சமூக கலாசார மற்றும் மத சகவாழ்வுடன் செயற்படுவதன் மூலம் இலங்கையர்கள் என்ற ரீதியில் ஒன்றிணைந்து நாட்டை கட்டியெழுப்புவதற்கு மலர்ந்துள்ள இப்புத்தாண்டை ஒரு வாய்ப்பாக்கிக் கொள்ளுமாறு அனைவரிடமும் கேட்டுக்கொள்கின்றோம் என்று தெரிவித்துள்ளார்.

© 2019 Asian Mirror (pvt) LTD