web log free
March 07, 2021
editor

editor

யாழ்ப்பாணம் மாநகர சபையின் புதிய மேயராக தமிழ்த் தேசிய மக்கள் முன்னணியின் உறுப்பினர் சட்டத்தரணி வி.மணிவண்ணன் தெரிவு செய்யப்பட்டுள்ளார்.

புதிய மேயரை தெரிவு செய்வதற்காக இன்று நடத்தப்பட்ட வாக்கெடுப்பில் மணிவண்ணன் 21 வாக்குகளை பெற்றதுடன், முன்னாள் மேயர் இ.ஆனோல்ட் 20 வாக்குகளை பெற்றுள்ளார்.

இதன்படி ஒரு வாக்கு வித்தியாசத்தில் மணிவண்ணன் மேயராக தெரிவாகியுள்ளார்.

மாநகர சபையின் மேயர் தெரிவுக்கான விசேட அமர்வு வடக்கு மாகாண உள்ளூராட்சி ஆணையாளர் பற்றிக் நிரஞ்சன் தலைமையில் இன்று நடைபெற்றது.

இதன்போது மேயர் வேட்பாளர்களாக தமிழ்த் தேசியக் கூட்டமைப்பு சார்பில் முன்னாள் முதல்வர் இ.ஆனோல்ட், தமிழ்த் தேசிய மக்கள் முன்னணி சார்பில் சட்டத்தரணி வி.மணிவண்ணன் ஆகியோரின் பெயர்கள் முன்மொழியப்பட்டன.

இது தொடர்பான வாக்கெடுப்பை பகிரங்கமாக நடத்துவதா? அல்லது இரகசியமாக நடத்துவதா? என உறுப்பினர்களிடத்தில் வாக்கெடுப்பு இடம்பெற்றது.

இதன்போது, சபை உறுப்பினர் அனைவரும் பகிரங்க வாக்கெடுப்பை நடத்த வேண்டுமென்றே கோரியிருந்தனர். இதன்படி முதல்வர் தெரிவுக்கான வாக்கெடுப்பு பகிரங்கமாக நடத்தப்பட்டது.

வாக்கெடுப்பில் ஆனோல்ட்டுக்கு 20 வாக்குகளும், மணிவண்ணனுக்கு 21 வாக்குகளும் கிடைத்தன.

தமிழ்த் தேசியக் கூட்டமைப்பின் 15 உறுப்பினர்களும், ஐக்கிய தேசியக் கட்சியின் 3 உறுப்பினர்களும், தமிழர் விடுதலைக் கூட்டணியின் ஒருவரும் மற்றும் ஶ்ரீலங்கா சுதந்திரக் கட்சியின் ஒருவரும் ஆனோல்ட்டுக்கு ஆதரவாக வாக்களித்தனர்.

இதேவேளை தமிழ்த் தேசிய மக்கள் முன்னணியின் 10 உறுப்பினர்களும், ஈழ மக்கள் ஜனநாயக கட்சியின் 10 உறுப்பினர்களும், ஶ்ரீலங்கா சுதந்திர கட்சியின் ஒரு உறுப்பினரும் மணிவண்ணனுக்கு ஆதரவாக வாக்களித்தனர்.

இதன்போது தமிழ்த் தேசிய மக்கள் முன்னணியை சேர்ந்த 3 உறுப்பினர்கள், தமிழ்த் தேசியக் கூட்டமைப்பின் ஒரு உறுப்பினர் என 4 பேர் வாக்கெடுப்பில் நடுநிலை வகித்தனர்.

இதன்படி யாழ் மாநகர சபையின் மேயராக சட்டத்தரணி வி.மணிவண்ணன் தெரிவு செய்யப்பட்டுள்ளதாக, வடக்கு மாகாண உள்ளூராட்சி ஆணையாளர் பற்றிக் நிரஞ்சன் அறிவித்தார்.

கடந்த 16 ஆம் திகதி யாழ். மாநகர சபையின் வரவு செலவுத் திட்டம் இரண்டாவது தடவையாகவும் சமர்பிக்கப்பட்டு தோற்கடிக்கப்பட்டதால் மாநகர மேயராக பதவி வகித்த இ.ஆனோல்ட் தனது பதவியை இழந்திருந்தார்.

இதனால் புதிய மேயரை தேர்வு செய்வதற்கான வாக்கெடுப்பு இன்று நடத்தப்பட்டது.

உக்ரைனிலிருந்து இலங்கைக்கு வருகை தந்த சுற்றுலாப் பயணிகளில் மூவருக்கு கொரோனா தொற்று உறுதி செய்யப்பட்டுள்ளதாக பிரதி சுகாதார சேவைகள் பணிப்பாளர் நாயகம் தெரிவித்துள்ளார்.

9 மாதங்களின் பின்னர் வெளிநாட்டு சுற்றுலாப் பயணிகள் குழுவொன்று இலங்கை வந்தடைந்த முதல் சந்தர்ப்பம் இதுவாகும்.

28 ஆம் திகதி 180 பயணிகளைக் கொண்ட சுற்றுலாக் குழுவொன்றும் நேற்று 204 பயணிகளைக் கொண்ட சுற்றுலாக் குழுவொன்றும் உக்ரைனிலிருந்து இலங்கை வந்துள்ளன.

அவர்கள் 14 நாட்களுக்கு தனிமைப்படுத்தலை முடித்த பின்னர், இலங்கையில் பல்வேறு இடங்களுக்கும் சுற்றுலா செல்ல இருந்தனர்.

இந்நிலையிலேயே மூன்று உக்ரைன் பயணிகளுக்கு கொரோனா தொற்று உறுதிசெய்யப்பட்டுள்ளது.

நாட்டில் ஏற்பட்டிருந்த கொரோனா தொற்று நிலைமையை தொடர்ந்து கடந்த மார்ச் மாதம் 20 ஆம் திகதி முதல் நாட்டின் அனைத்து விமான நிலையங்களும் மூடபட்டதுடன், வெளிநாட்டு சுற்றுலாப் பயணிகளுக்கும் தடை விதிக்கப்பட்டிருந்தமை குறிப்பிடத்தக்கது.

இலங்கையில் தேயிலை உற்பத்தியை அதிகரிப்பதற்காக அடுத்த ஆண்டில் 20 மில்லியன் தேயிலைக் கன்றுகளைப் பயிரிட அரசாங்கம் நடவடிக்கை எடுத்துள்ளது.

கம்பனி தோட்டங்களை மறுசீரமைத்தல், தேயிலைத் தோட்டங்கள் சார்ந்த பயிர்ச்செய்கைகள், தேயிலை தொழிற்சாலைகளை நவீனமயப்படுத்துதல் மற்றும் தேயிலை ஏற்றுமதி மேம்பாட்டு இராஜாங்க அமைச்சர் கனக ஹேரத் இதனைத் தெரிவித்துள்ளார்.

கண்டியில் இடம்பெற்ற நிகழ்வொன்றில் கலந்துகொண்டு உரையாற்றும் போதே, அவர் இதனைக் குறிப்பிட்டுள்ளார்.

இலங்கையின் தேயிலை உற்பத்தியில் பிரதானமாக தாக்கம் செலுத்தும் சிறு தேயிலைத் தோட்டம் மற்றும் பெருந்தோட்ட நிறுவனங்களின் கீழ் உற்பத்தி செய்யப்படும் தேயிலை உற்பத்தி 2015 ஆம் ஆண்டு முதல் வீழ்ச்சியடைந்துள்ளதாகவும் அவர் சுட்டிக்காட்டியுள்ளார்.

இலங்கை 300 மில்லியன் கிலோ கிராம் தேயிலையை உற்பத்தி செய்து வந்த நிலையில், கடந்த வருடங்களில் தேயிலை உற்பத்தி 290 மில்லியன் வரையில் வீழ்ச்சியடைந்துள்ளதாகவும் தெரிவிக்கப்பட்டுள்ளது.

இந்நிலையில், வீழ்ச்சியடைந்துள்ள தேயிலை உற்பத்தியை மேம்படுத்துவதற்காக தேயிலை பயிரிடும் 500 செயற்திட்டங்களின் ஊடாக 25 மில்லியன் தேயிலைக் கன்றுகளை சிறு மற்றும் பெருந்தோட்ட தேயிலை உற்பத்தியாளர்களுக்கு வழங்குவதற்கும் நடவடிக்கை எடுத்துள்ளதாக கனக ஹேரத் தெரிவித்துள்ளார்.

Tags: இலங்கை தேயிலை
Continue Reading

கொரோனா வைரஸூக்கு எதிராக ஒக்ஸ்போர்ட் பல்கலைக்கழகம் மற்றும் அஸ்டிராஜெனேகா மருத்துவ ஆய்வு நிறுவனம் தயாரித்துள்ள தடுப்பூசியை பிரிட்டனில் பயன்படுத்த அனுமதி வழங்கப்பட்டுள்ளது.

பிரிட்டனின் சுகாதார செயலாளர் மேட் ஹேன்கொக் இந்த தகவலை வெளியிட்டுள்ளார்.

எதிர்வரும் ஜனவரி மாதம் 4 ஆம் திகதி முதல் அஸ்டிராஜெனேகா தடுப்பூசி பயன்பாட்டிற்கு வருவதாகவும், புது வருடத்தின் முதல் சில வாரங்களிலேயே தடுப்பூசி விநியோகத்தை அதிகரிக்க நடவடிக்கை எடுக்கப்படவுள்ளதாகவும் அவர் தெரிவித்துள்ளார்.

பிரிட்டன் 100 மில்லியன் அஸ்டிராஜெனேகா தடுப்பூசிகளைப் பெற்று, 50 மில்லியன் மக்களுக்கு விநியோகிக்கவுள்ளதாகவும் தெரிவிக்கப்பட்டுள்ளது.

பிரிட்டன் பைசர் தடுப்பூசி பயன்பாட்டிற்கும் இம்மாதம் அனுமதி வழங்கியுள்ளமை குறிப்பிடத்தக்கது.

இலங்கையில் பலவந்தமாக காணாமல் ஆக்கப்பட்டோரை  மீட்டுத்தரக் கோரி வடக்கில் சில பகுதிகளில் இன்று கவனயீர்ப்பு ஆர்ப்பாட்டங்கள் நடத்தப்பட்டன.

2021  மார்ச் மாதம் நடைபெறவுள்ள ஜெனிவா கூட்டத் தொடரில் இலங்கையில் காணாமல் ஆக்கப்பட்டோர் விடயத்தில் கரிசனை கொள்ளப்படவேண்டும் எனவும்,  இந்த விடயத்தில் சர்வதேச நீதியைபெற்றுத்தர வேண்டுமெனவும்  இந்த ஆர்ப்பாட்டத்தில் கலந்துகொண்டோர் கோரிக்கை விடுத்தனர்

யாழ்ப்பாணம், மன்னார் மற்றும் வவுனியா ஆகிய இடங்களில் இந்த ஆர்ப்பாட்டங்கள் நடத்தப்பட்டன.

யாழ்ப்பாணம் நல்லூர் கந்தன் ஆலயத்தின் பின்பக்க வீதியில் அமைந்துள்ள நல்லை ஆதினம் முன்பாக  கவனயீர்ப்பு ஆர்ப்பாட்டமொன்று நடத்தப்பட்டது.

இந்த ஆர்ப்பாட்டத்தில் கலந்துகொண்டவர்கள் ‘எங்கள் பிள்ளைகளை எங்களிடம் ஒப்படையுங்கள்’, ‘தமிழர்களுக்கு ஒரு நீதி சிங்களவர்களுக்கு ஒரு நீதியா’ என பல்வேறு கோஷங்களை எழுப்பினர்.

மேலும், மனிதாபிமானத்துடன் எமது பிள்ளைகளை விடுவியுங்கள், இனியும் காலம் தாழ்த்தாது பிள்ளைகளை எங்களிடம் ஒப்படையுங்கள், எமது உறவுகள் விடுதலை செய்யப்படும் வரை நாம் தொடர்ந்து போராடுவோம் எனவும் அவர்கள் தெரிவித்தனர்.

வவுனியா மாவட்டத்திலும் வலிந்து காணாமல் ஆக்கப்பட்டோரின் உறவினர்கள்  போராட்டத்தில் ஈடுபட்டனர்.

ஜெனிவா கூட்டத்தொடரில் காணாமல் ஆக்கப்பட்டோரின் விடயத்தில் கரிசனை கொள்ளப்படவேண்டும் என்ற கோரிக்கையை முன்வைத்து  ஆர்ப்பாட்டத்தில் ஈடுபட்டனர்.

அத்தோடு கையளிக்கப்பட்டு காணாமல் ஆக்கப்பட்டவர்கள் எங்கே? தமிழ் குழந்தைகள் என பயங்கரவாதிகளா? போன்ற வாசகங்கள் எழுதப்பட்ட பதாதைகளை தாங்கிவாறும் ஆர்ப்பாட்டத்தை முன்னெடுத்திருந்தமை குறிப்பிடத்தக்கது.

மன்னார் மாவட்ட வலிந்து காணாமல் ஆக்கப்பட்டோரின் உறவுகள் மன்னார் நகர பேருந்து தரிப்பிடத்திற்கு முன்னால் கவனயீர்ப்பு போராட்டத்தை முன்னெடுத்தனர்.

இதன்போது மன்னார் மாவட்ட வலிந்து காணாமல் ஆக்கப்பட்டோர் உறவுகளின் சங்க இணைப்பாளர் மனுவல் உதையச்சந்திரா கருத்து தெரிவிக்கையில்,

கடந்த 10 வருடங்களுக்கு மேலாக காணாமல் ஆக்கப்பட்ட உறவுகளை கண்டு பிடிக்கக்கோரி ஆர்ப்பாட்டத்தை முன்னெடுத்து வருகின்றோம்.

ஆனால் ஒரு தீர்வுமே எமக்கு கிடைக்கவில்லை. மேலும்,சர்வதேச விசாரனை வேண்டும் என்றே காணாமல் ஆக்கப்பட்டவர்களின் உறவினர்களாகிய நாங்கள் கேட்கின்றோம்  என்றார்.

மதுசாரம்,  எத்தனோல் உற்பத்திக்கு சோளம் பயன்படுத்துவதை முழுமையாக தடைசெய்து வர்த்தமானி அறிவித்தலை வெளியிடுமாறு மதுவரி ஆணையாளருக்கு ஜனாதிபதி கோட்டாபய ராஜபக்‌ஷ உத்தரவிட்டுள்ளார்.

இதேவேளை விவசாயிகளிடமிருந்து மஞ்சள், சோளம் உள்ளிட்ட அறுவடைகளை கொள்வனவு செய்யும் போது முறைகேடுகளில் ஈடுபடும் வர்த்தகர்களுக்கு எதிராக சட்டத்தை கடுமையாக அமுல்படுத்த நடவடிக்கையெடுக்குமாறு ஜனாதிபதியினால், சுங்கப் பணிப்பாளர் நாயகம் மற்றும் பொலிஸ் மா அதிபர் ஆகியோருக்கு அறிவுறுத்தப்பட்டுள்ளது.

இத்துறைக்கு பொறுப்பான இராஜாங்க அமைச்சர்கள், அதிகாரிகள் ஆகியோரை நேற்று சந்தித்த போதே ஜனாதிபதி இவ்வாறு அறிவுறுத்தியுள்ளார்.

உள்நாட்டு விவசாயிகள் மஞ்சள் மற்றும் சோளம் பயிர்ச்செய்கையை வெற்றிகரமாக விரிவுபடுத்தியுள்ளனர். எதிர்வரும் பெரும்போகத்தில் அவர்கள் அறுவடையை பெற்றுக்கொள்ள எதிர்பார்த்துள்ளனர். இதன்படி விவசாயிகளுக்கு நியாயமான விலை கிடைக்க வேண்டும் என்று ஜனாதிபதி வலியுறுத்தியுள்ளார்.

மேலும், சட்டவிரோதமாக கொண்டுவரப்படும் மஞ்சளை அழித்துவிடுமாறும் ஜனாதிபதி அதிகாரிகளுக்கு உத்தரவிட்டுள்ளார்.

ஜனவரி மாத நடுப்பகுதியில் நாட்டின் விமான நிலையங்களை உத்தியோகபூர்வமாக திறக்க எதிர்பார்த்துள்ளதாக, அமைச்சர் பிரசன்ன ரணதுங்க தெரிவித்துள்ளார்.

யுக்ரேன் நாட்டு சுற்றுலா பயணிகள் நாட்டுக்கு வருகை தந்துள்ளமை தொடர்பில் ஊடகங்களுக்கு கருத்துரைத்த போதே அவர் இதனை கூறியுள்ளார்.

இதன்படி, வணிக ரீதியிலான விமான சேவைகளை ஆரம்பிக்க தயாராக இருப்பதாக அவர் கூறியுள்ளார்.

அத்துடன், சுற்றுலாப் பயணிகளுக்காக நாடு மீண்டும் திறக்கப்படுவதன் காரணமாக புதிய கொரோனா கொத்தணி உருவாகும் என எவரும் அச்சப்பட வேண்டிய அவசியம் கிடையாது என அவர் தெரிவித்துள்ளார்.

மேலும், சுற்றுலாப் பயணிகள் தங்கும் ஹோட்டலில் இருந்து அவர்கள் வெளியேறியதன் பின்னர், குறித்த ஹோட்டல் பணியாளர்கள் 14 நாட்களுக்கு தனிமைப்படுத்தப்படுவார்கள் எனவும் அமைச்சர் பிரசன்ன ரணதுங்க தெரிவித்துள்ளார்.

அத்துடன், சுற்றுலாப் பயணிகளிடம் இருந்து நாட்டு மக்களுக்கோ அல்லது நாட்டு மக்களிடம் இருந்து சுற்றுலாப் பயணிகளுக்கோ கொரோனா தொற்று பரவல் ஏற்படாத வகையில் நடவடிக்கைகள் மேற்கொள்ளப்பட்டுள்ளதாகவும் அவர் சுட்டிக்காட்டினார்.

இதேவேளை, ரஷ்ய சுற்றுலா வலயத்தில் இருந்து 2 ஆயிரத்து 580 பயணிகள் நாட்டுக்கு வருகை தரவுள்ளதாகவும் அமைச்சர் பிரசன்ன ரணதுங்க தெரிவித்துள்ளார்.

ஆளும் ஸ்ரீலங்கா பொதுசன முன்னணி வசமுள்ள ருவன்வெல்ல பிரதேச சபை வரவு செலவு திட்டம் தோற்கடிக்கப்பட்டுள்ளது.

வரவு செலவு திட்டத்திற்கு எதிராக 17 வாக்குகளும் ஆதரவாக 11 வாக்குகளும் அளிக்கப்பட்டுள்ள.

ஐக்கிய தேசிய கட்சியின் 9 பேரும், சமசமாஜ கட்சியின் 3 உறுப்பினர்கள், ஸ்ரீலங்கா பொதுஜன முன்னணியின் 2 உறுப்பினர்கள்,ஜே.வி.பி மற்றும் சுயாதீன குழு உறுப்பினர்கள் என எதிர்த்து வாக்களித்துள்ளனர்.

மேலும் ஸ்ரீலங்கா பொதுஜன முன்னணியின் பெண் உறுப்பினர் ஒருவரும் சுதந்திர கட்சியின் ஓர் உறுப்பினரும் வாக்களிப்பில் கலந்துகொள்ளவில்லை.

அத்துடன் எட்டியாந்தோட்டை பிரதேச சபை உப தலைவர் கூட வரவு செலவு திட்டத்திற்கு எதிராகவே வாக்களித்திருப்பதாக கூறப்படுகிறது.

இதேவேளை அண்மைய நாட்களாக மொட்டுக்கட்சி கட்டுப்பாட்டில் உள்ள பல உள்ளூராட்சி சபைகளின் வரவு செலவுத் திட்டங்கள் தோல்வி கண்டுள்ளமை குறிப்பிடத்தக்கது.

எதிர்வரும் மார்ச் மாதத்திற்கு முன் நடத்த உத்தேசிக்கப்பட்டிருந்த மாகாண சபைகளுக்கான தேர்தலை மீண்டும் ஒத்திவைப்பதற்கு அரசாங்கம் தீர்மானித்துள்ளது.

ஜனாதிபதி செயலகத்தில் ஜனாதிபதி கோட்டாபய ராஜபக்ச தலைமையில் நேற்று இரவு நடந்த ஆளுங்கட்சி உறுப்பினர்களுக்கான கூட்டத்தின்போது மேற்படி முடிவு எடுக்கப்பட்டுள்ளது.

ஆளுங்கட்சிக்குள் ஏற்பட்டிருக்கும் மாகாண சபைக்கான எதிர்ப்பு மற்றும் கொரோனா நெருக்கடி விவகாரத்திற்கு மத்தியில் ஜனாதிபதி இந்த முடிவினை எடுத்திருப்பதாக அறியமுடிகின்றது.

கொரோனா தொற்று பரவும் வேகம் அதிகரித்துள்ளதால் தென்னாபிரிக்காவில் இரவுநேர ஊரடங்கு சட்டம் அமுல்படுத்தப்பட்டுள்ளதாக அந்நாட்டு ஜனாதிபதி ரமபோசா அறிவித்துள்ளார்.

இந்த ஊரடங்கு சட்டம் எதிர்வரும் ஜனவரி மாதம் 15 ஆம் திகதி வரை அமுலில் இருக்குமென அறிவிக்கப்பட்டுள்ளது.

உலகளவில் கொரோனா தொற்றினால் அதிக பாதிப்பினை எதிர்கொண்ட 17 ஆவது நாடாக தென்னாபிரிக்கா  விளங்குவதுடன், அங்கு இதுவரையில் 10 இலட்சத்து 11 ஆயிரத்து 871 பேர் பாதிக்கப்பட்டுள்ளதுடன் 21 ஆயிரத்து 71 பேர் உயிரிழந்துள்ளனர்.

கடந்த 24 மணித்தியாலத்தில் மட்டும் வைரஸ் தொற்றினால், 7,458 பேர் பாதிக்கப்பட்டதோடு 336 பேர் உயிரிழந்துள்ளதாக அந்நாட்டு ஊடகங்கள் தெரிவித்துள்ளன.

© 2019 Asian Mirror (pvt) LTD