web log free
May 08, 2021
editor

editor

ஆஸ்திரேலியாவின் பிரபல நாளிதழான The Daily Telegraph இல் வெளியான கேலிச்சித்திரமொன்று இந்துக் கடவுள்களில் ஒருவரான விநாயகரை இழிவுபடுத்தும் வகையில் அமைந்துள்ளதாகவும்,  இதுதொடர்பில் குறித்த ஊடகம் மன்னிப்புக்கோர வேண்டும் எனவும் ஆஸ்திரேலியாவிலுள்ள இந்து அமைப்புக்கள் வலியுறுத்தியுள்ளன.

இந்தியாவிலிருந்து ஆஸ்திரேலியா வருவதற்கு விதிக்கப்பட்டுள்ள பயணத்தடை தொடர்பில் The Daily Telegraph இல் மே மாதம் 4ம் திகதி வெளியான செய்திக்கட்டுரை ஒன்றில் குறிப்பிட்ட இந்த கேலிச்சித்திரம் இடம்பெற்றுள்ளது.

பல்கலாச்சார சமூகங்கள் வாழும் ஆஸ்திரேலியாவில் எந்தவொரு நம்பிக்கையையும், மதத்தையும் அவமதிக்க யாருக்கும் உரிமை இல்லை எனவும், ஆஸ்திரேலியாவிலும் வெளிநாட்டிலும் வாழும் இந்துக்களின் நம்பிக்கையை The Daily Telegraph முற்றிலும் அவமதித்துள்ளதாகவும் சுட்டிக்காட்டப்பட்டுள்ளது.எதையாவது சித்தரிக்க பல வழிகள் இருக்கும்போது ஒருசாராரின் மத நம்பிக்கையை ஏன் அவமதிக்க வேண்டும் எனவும் கேள்வியெழுப்பப்பட்டுள்ளது.

இதையடுத்து குறித்த கட்டுரையை வெளியிட்டதற்காக The Daily Telegraph மன்னிப்புக்கோர வேண்டும் எனவும் இந்துக்களின் நம்பிக்கைகள் தொடர்பில் ஆஸ்திரேலிய ஊடகங்கள் தமது ஊழியர்களுக்கு அறிவூட்ட வேண்டும் எனவும் வலியுறுத்தி Gaurav Chauhan என்பவர் சார்பில் கையெழுத்து வேட்டையும் ஆரம்பிக்கப்பட்டுள்ளது.

 

மட்டக்களப்பு மாவட்டத்தில் 14 நாட்களில் 190 கொரனா தொற்றாளர்கள் இனங்காணப்பட்டுள்ளதாகவும் ஒரு வாரத்தில் 143 பேர் இனங்காணப்பட்டுள்ளதாகவும் மட்டக்களப்பு மாவட்ட பிராந்திய சுகாதார சேவைகள் பணிப்பாளர் வைத்தியர் நாகலிங்கம் மயூரன் தெரிவித்தார்.

மட்டக்களப்பு பிராந்திய சுகாதார சேவைகள் பணிமனையில் நேற்று நடைபெற்ற விசேட ஊடக சந்திப்பிலேயே அவர் இதனை தெரிவித்தார்.

மட்டக்களப்பு மாவட்டத்தில் மூன்றாவது அலையில் 14 நாட்களில் 190 பேர் தொற்றுக்குள்ளானதாகவும் கடந்த ஒரு வாரத்தில் மட்டும் 143 பேர் கொரனா தொற்றாளர்கள் இனங்காணப்பட்டுள்ளதாகவும் அவர் தெரிவித்தார்.

மட்டக்களப்பு மாவட்டத்தில் உள்ள கொவிட் சிகிச்சை நிலையங்கள் முற்றுமுழுதாக நிரம்பியுள்ளதன் காரணமாக மட்டக்களப்பு மாவட்டத்தில் இனங்காணப்படும் கொரனா தொற்றாளர்கள் வேறு மாவட்டங்களுக்கு அனுப்பவேண்டிய நிலையில் உள்ளதாகவும் அவர் தெரிவித்தார்.

இதன்போது தொடர்ந்து கருத்து தெரிவித்த அவர்,

மட்டக்களப்பு மாவட்டத்தில் கடந்த 24 மணித்தியாலத்தில் 30 கொரனா தொற்றாளர்கள் இனங்காணப்பட்டுள்ளனர். இவர்களின் 12 பேர் களுவாஞ்சிகுடியிலும் 09 பேர் மட்டக்களப்பிலும் 05 பேர் செங்கலடி பகுதியிலும் 04 பேர் காத்தான்குடியிலும் கண்டுபிடிக்கப்பட்டுள்ளனர்.

இதுவரையில் மட்டக்களப்பு மாவட்டத்தில் 1173 கொரனா தொற்றாளர்கள் இனங்காணப்பட்டுள்ள நிலையில் இவர்களின் 1020 பேர் குணமடைந்து வீடு சென்றுள்ளனர்.

143 பேர் தொடர்ந்து சிகிச்சை பெற்றுவருகின்றனர். இதுவரையில் 10 மரணங்கள் ஏற்பட்டுள்ளது.

மூன்றாவது அலையினைப்பொறுத்தவரையில் 14 நாட்களில் 190 கொரனா தொற்றாளர்கள் இனங்காணப்பட்டுள்ளனர். அதிலும் இறுதி ஏழு நாட்களும் 143 பேர் கொரனா தொற்றாளர்களாக இனங்காணப்பட்டுள்ளனர். மூன்றாவது அலை காரணமாக ஒரு மரணம் ஏற்பட்டுள்ளது.

மட்டக்களப்பு மாவட்டத்தில் மூன்று கொரனா சிசிச்சை நிலையங்கள் ஸ்தாபிக்கப்பட்டுள்ளன. காத்தான்குடி, கரடியனாறு, பெரியகல்லாறு ஆகிய இந்த மூன்று வைத்தியசாலைகளும் 400 நோயாளர்களை பராமரிக்ககூடிய வகையில் உள்ளன. இந்த மூன்று வைத்தியசாலைகளும் முற்றுமுழுதாக நிரம்பிய நிலையில் காணப்படுகின்றன. இதன்காரணமாக புதிதாக அடையாளம் காணப்படுபவர்கள் அனுப்பவேண்டிய நிலையேற்பட்டுள்ளது.

ஒவ்வொரு மாவட்டங்களிலும் 1000 கட்டில்களை அதிகரிக்குமாறு பணிப்புரைகள் வழங்கப்பட்டுள்ளன. இன்னும் ஒரு வாரகாலத்திற்குள் நூறு கட்டில்களை அதிகரிக்கவுள்ளோம்.

கொரனா மூன்றாவது அலையின் காரணமாக ஒட்சிசன் தேவைப்பாடு அதிகளவில் காணப்படுகின்றது.

மட்டக்களப்பு மாவட்டத்தில் ஒட்சிசன் சிலின்டர்கள் தயார் நிலையில் உள்ளன.

மட்டக்களப்பு மாவட்டத்தில் ஒட்சிசன் திட்டம் இல்லாத காரணத்தினால் ஒட்சிசன் தேவைக்காக மகாஓயா, தெகியத்தன்கண்டிய பகுதிகளில் இருந்து ஒட்சிசனை எடுத்துவரவேண்டியுள்ளது. ஒரு ஒட்சிசன் தொகுதியை நிறுவுவதற்கு 42மில்லியன் ரூபா தேவைப்படுகின்றது. அதற்கான நடவடிக்கைகள் முன்னெடுக்கப்பட்டுள்ளன.

கொவிட் தொற்றாளர்கள் தீவிரமான நிலையினையடைந்து நியுமோனியாவுக்கு தள்ளப்படும்போது அவர்களை பராமரிப்பதற்காக காத்தான்குடி, களுவாஞ்சிகுடி, வாழைச்சேனை போன்ற வைத்தியசாலைகளில் எச்யு மற்றும் ஐசியு ஆகியவற்றினையும் நிறுவவுள்ளோம். அதற்கான நடவடிக்கைகள் முன்னெடுக்கப்பட்டுவருகின்றன.ஏழு நாட்களில் அவை செயற்பாட்டுக்குவருமெனவும் தெரிவித்தார்.

 

உயிர் பிழைப்பதற்காக இலங்கைக்குள் ஊடுருவுகின்ற இந்தியப் பிரஜைகளை தடுப்பதற்கான எந்தவொரு ஏற்பாட்டினையும்  இலங்கை அரசாங்கம் இதுவரை செய்யவில்லை என்று ஐக்கிய தேசியக்கட்சி குற்றஞ்சாட்டியுள்ளது.

இரண்டாம்கட்ட தடுப்பூசி வழங்குவதை நழுவவிட்ட இலங்கை அரசாங்கத்தின் செயற்பாட்டினால் இந்தியாவின் நிலைமையே இலங்கையிலும் ஏற்படும அபாயம் இருப்பதாகவும் அந்தக்கட்சி சுட்டிக்காட்டியுள்ளது.

ஐக்கிய தேசியக்கட்சியின் வாராந்த ஊடகவியலாளர் சந்திப்பு கொழும்பு கோட்டையிலுள்ள அக்கட்சியின் தலைமையகத்தில் இன்றைய தினம் (05) நடைபெற்றது.

இதில் கலந்துகொண்டு உரையாற்றிய ஐக்கிய தேசியக்கட்சியின் முன்னாள் நாடாளுமன்ற உறுப்பினரும், இலங்கை தாதியர் சங்கத்தின் தலைவருமான சமன் ரத்னப்பிரிய, இலங்கை நிலைமை இந்தியாவை நோக்கி நகர ஆரம்பித்திருப்பதாக எச்சரித்தார்.

இந்தியாவிலுள்ளவர்கள் இலங்கைக்குள் பிரவேசிப்பதை அரசாங்கம் இதுவரை தடுக்கவில்லை. இந்தியாவைச் சேர்ந்தவர்களை முதலீடு உட்பட பல காரணங்களுக்காக 100 வீதம் இலங்கைக்குள் பிரவேசிப்பதை நிறுத்தவில்லை என்று சுற்றலாத்துறை அமைச்சர் பிரசன்ன ரணதுங்க தெரிவித்திருந்தார். கடற்படையினர் நேற்றிலிருந்தே கைது செய்யும் முயற்சிகளையும் ஆரம்பித்துள்ளது. புலம்பெயர் நாடுகளிலுள்ள பலரும் வடக்கு, கிழக்குப் பிரதேசங்களில் இந்தியப் பிரஜைகளுக்காக தனிமைப்படுத்தல் பொதிகளை அறிமுகஞ் செய்து வர்த்தகத்தில் ஈடுபட்டிருப்பதோடு அரசாங்கமும் வர்த்தகத்திலேயே ஈடுபட்டிருக்கின்றது.

இந்தியப் பிரஜைகள் வெறுமனே  இலங்கைக்கு வராமல் கொரோனா தொற்றினையும் சுமந்துகொண்டே வருகின்றனர். இந்தியாவில் பரவுகின்ற திரிபடைந்த தொற்று இலங்கையிலும் பரவும் ஆபத்திருப்பதாக தொற்றுநோய் ஆய்வுப் பிரிவுத் தலைவர் சுதத் சமரவீர எச்சரித்திருந்தார். இந்தியாவில் மிகப்பெரிய அழிவு ஏற்பட்டு வருவதோடு நாளாந்தம் கோவிட் மரணங்கள் மூவாயிரத்தையும் கடந்து பதிவாகின்றன. இந்த நிலையில் இந்தியப் பிரஜைகளை உள்நாட்டிற்குள் அனுமதிப்பதை நிறுத்த தக்கநடவடிக்கை எடுக்கவில்லை. கொரோனா தொற்றுக்கான இரண்டாம் கட்டதடுப்பூசியை வழங்குவதற்கு அரசாங்கம் இதுவரை நடவடிக்கை எடுக்கவில்லை. பெப்ரவரி 13ஆம் திகதியே கொரோனா தொற்றின் புதிய வைரஸ் இலங்கையில் பரவத்தொடங்கிய போதிலும், ஏப்ரல் 30ஆம் திகதி வரை இலங்கை அரசாங்கம் அதனைத்தடுப்பதற்கு எந்த நடவடிக்கையையும் எடுக்கவில்லை என்பது கவலைக்குரிய விடயமாகும். இப்படியே நிலைமை சென்றால் அதனை தடுக்கவும் முடியாமற் போய்விடும். ஆகவே நாட்டை குறுகிய காலத்திற்கு முடக்கஞ்செய்து பி.சி.ஆர் பரிசோதனைகளை அதிகரிக்க வேண்டும் என்றார்.

 

 

ஜனாதிபதி கோட்டாபய ராஜபக்ஷ  இன்று (05) முற்பகல் பாராளுமன்றத்திற்கு விஜயம் செய்தார். அமைச்சர் ஜோன்ஸ்டன் பெர்னாண்டோ, இராஜாங்க அமைச்சர்களான கஞ்சன விஜேசேக்கர, கனக ஹேரத், பாராளுமன்ற உறுப்பினர்களான திஸ்ஸ குட்டியாரச்சி மற்றும் யூ.கே. சுமித் ஆகியோர் பாராளுமன்ற கட்டிடத் தொகுதி வளாகத்தில் ஜனாதிபதி அவர்களை வரவேற்றனர்.

பாராளுமன்ற சபா மண்டபத்திற்கு வருகை தந்த ஜனாதிபதி அவர்கள் அங்கிருந்து பாராளுமன்ற உறுப்பினர்களின் உரைகளை செவிமடுத்தார்.

புதிய பாராளுமன்ற கூட்டத் தொடரை ஆரம்பித்து வைத்து உரையாற்றியதன் பின்னர் ஜனாதிபதி அவர்கள் சபைக்கு வருகைதந்த ஐந்தாவது சந்தர்ப்பம் இதுவாகும்.

 

இந்திய மற்றும் இலங்கை மீனவர் பிரச்சினைக்கு தீர்வு காண புதியதாக தெரிவு செய்யப்பட்டுள்ள தமிழகத்தின் புதிய அரசு முயற்சிகளை மேற்கொள்ளவேண்டும் என இலங்கையின் வடபகுதி மீனவர்கள் கோரிக்கை முன்வைத்துள்ளார்கள்.

இது தொடர்பில் யாழ். மாவட்ட  கடற்றொழிலாளர் கூட்டுறவுச் சங்க சமாசங்களின் சம்மேளனம் தலைவர் அன்னலிங்கம் அன்னராசா நேற்றைய தினம் யாழ்ப்பாணத்தில் இடம்பெற்ற ஊடக சந்திப்பில் கருத்து வெளியிட்டார்.

தமிழகத்தின் புதிய அரசு இலங்கையின் மீன்பிடித்துறை அமைச்சுடன் பேச்சுக்களை நடாத்தி இந்திய இலங்கை மீனவர்களின் பிரச்சினைக்கு ஒரு சுமுகமான தீர்வை வழங்கவேண்டும் என்றும், அதன் மூலமாக தமது வாழ்வாதாரத்தை மீட்டுத்தரவேண்டும் என்றும் தெரிவித்துள்ளார்.

சட்டவிரோதமாக இலங்கைக் கடல் எல்லைக்குள் மீன்பிடியில் ஈடுபட்ட 86 இந்திய மீனவர்களையும் 11 மீன்பிடிப் படகுகளையும் இலங்கைக் கடற்படை கைப்பற்றியுள்ளது.

கடல் வழிகள் மூலம் சட்டவிரோதமாக இலங்கைக்கு இந்தியாவிலிருந்து வருபவர்களால் நாட்டில் கொரோனா வைரஸ் தொற்று நோய் பரவும் அபாயம் ஏற்பட்டுள்ளது எனச் சுட்டிக்காட்டி, இதைக் கட்டுப்படுத்த, வடமேற்கு மற்றும் வடக்கு கடல் பகுதிகளில் 24 மணி நேரமும் ரோந்துப் பணிகளை அதிகரிப்பதாக கடற்படை அறிவித்திருந்தது.

இதற்கமைய மேற்கொள்ளப்பட்ட விசேட ரோந்து நடவடிக்கையின்போதே இவர்கள் கைதுசெய்யப்பட்டுள்ளனர் என்று கடற்படை மேலும் தெரிவித்துள்ளது.

இவ்வாறு கைதுசெய்யப்பட்டவர்கள் தொடர்பில் இந்தியத் தூதரகம் மற்றும் இந்தியக் கடலோரக் காவல் படைக்குத்  தகவல் வழங்கப்பட்டுள்ளது எனக் கடற்படை குறிப்பிட்டுள்ளது.

இதையடுத்து 86 இந்திய மீனவர்கள் மற்றும் அவர்களின் 11 மீன்பிடிப் படகுகள் இந்திய அதிகாரிகளிடம் ஒப்படைக்க ஏற்பாடுகள் செய்யப்பட்டுள்ளதாகவும் கடற்படை செய்தி வெளியிட்டுள்ளது.

இதேவேளை, கடல் வழியாக சட்டவிரோதமான முறையில் நாட்டிற்குள் நுழைய முயற்சிக்கும் எவரையும் தடுக்க கடற்படை தொடர்ந்து வடமேற்கு மற்றும் வடக்கு கடற்பரப்பில் கண்காணிப்பில் ஈடுபடும் எனவும் அறிவித்துள்ளது.

படை வீரர்கள் நினைவு மாதத்தை பிரகடனப்படுத்தி தேசிய படை வீரர்கள் கொடி ஜனாதிபதி கோட்டாபய ராஜபக்ஷ அவர்களுக்கு இன்று (04) முற்பகல் ஜனாதிபதி அலுவலகத்தில் வைத்து அணிவிக்கப்பட்டது.

ரணவிரு சேவா அதிகார சபையின் பதில் தலைவர் திருமதி சோனியா கோட்டேகொடவினால் படை வீரர்கள் கொடி ஜனாதிபதி அவர்களுக்கு அணிவிக்கப்பட்டது.

மூன்று தசாப்த காலமாக நிலவிய பயங்கரவாதத்தை முடிவுக்குக் கொண்டு வந்து சுதந்திரமானதொரு தேசத்திற்காக அர்ப்பணிப்புகளை செய்த படை வீரர்களை நினைவுகூரும் வகையில் படை வீரர்கள் மாதம் அனுஷ்டிக்கப்படுகின்றது.

மே மாதம் முதலாம் வாரத்தில் ஜனாதிபதி அவர்களுக்கு தேசிய படை வீரர்கள் கொடி அணிவிக்கப்பட்ட நாள் முதல் படை வீரர்கள் நினைவு மாதம் ஆரம்பமாகிறது.  பாதுகாப்பு செயலாளர் ஜெனரல் (ஓய்வுபெற்ற) கமல் குணரத்னவும் இந்த நிகழ்வில் கலந்துகொண்டார்.

 

யாழ்ப்பாணம் - காங்கேசன்துறை கடற்பரப்பில் மிதந்து வந்த 183 கிலோ கிராம் கேரள கஞ்சா இலங்கை கடற்படையினரால் நேற்று(03)  காலை மீட்கப்பட்டுள்ளது.

சந்தேகத்திற்கிடமான பொதிகள் கடலில் மிதந்து வந்தவேளை அதனை கடற்படையினர் சோதனையிட்டபோது அதில் 183 கிலோ கிராம் நிறை கொண்ட கேரளா கஞ்சா பொதிகள் காணப்பட்டுள்ளது.

தற்போதைய கொரானா அச்சம் காரணமாக நேற்று மாலை குறித்த கஞ்சா பொதிகள் தீயிட்டு எரிக்கப்பட்டமை குறிப்பிடத்தக்கது.

 

கொரோனா வைரஸ் தடுப்பூசி வகைகளில் ஒன்றான ஸ்புட்னிக் V தடுப்பூசியில் ஒருதொகை ரஷ்யாவினால் வழங்கப்பட்ட நிலையில் அவை இன்று (04) அதிகாலை நாட்டிற்கு கொண்டுவரப்பட்டது.

கட்டார் நாட்டிற்குச் சொந்தமான விமானத்தில் ஸ்புட்னிக் V என்ற  15,000 தடுப்பூசிகள் இலங்கைக்கு கொண்டுவரப்பட்டதாக கட்டுநாயக்க விமான நிலையத்தின் கடமை நேர முகாமையாளர் தெரிவித்தார்.

இலங்கைக்கான ரஷ்யாவின் பிரதி தூதுவர்,  இந்த ஸ்புட்னிக் V தடுப்பூசி தொகையை ஔடத உற்பத்தி, விநியோகம், ஒழுங்குபடுத்தல் இராஜாங்க அமைச்சர் சன்ன ஜயசுமனவிடம் கையளித்தார்.

அரச மருந்தாக்கல் கூட்டுத்தாபனத்தின் தலைவர், விசேட வைத்திய நிபுணர் பிரசன்ன குணசேன உள்ளிட்டோர் இதன்போது பிரசன்னமாகியிருந்தனர்.

 

நோர்வூட் இன்ஜஸ்ட்ரி கிராம அலுவலகர் காரியாலயத்திற்கு உட்பட்ட தோட்ட பகுதிகள் இன்று (03) பிற்பகல் முதல் தனிமைப்படுத்தப்பட்டுள்ளதாக பொகவந்தலாவ சுகாதார வைத்திய அதிகாரி காரியாலயம் தெரிவித்துள்ளது.

நோர்வூட் ஹொன்சி பகுதி, இன்ஜஸ்ட்ரி, பாத்போட் பிரிவு, பிரட், பிலின்கிபோனி மற்றும் அபகனி, ஆகிய பகுதிகளே இவ்வாறு தனிமைப்படுத்தப்பட்டுள்ளன.

கடந்த 30 ஆம் திகதி புளியாவத்தை பகுதியில் அமைந்துள்ள தொழிற்சாலையில் ஒன்றில் 180 பேருக்கு மேற்கொள்ளப்பட்ட பீ.சீ.ஆர் பரிசோதனைக்கு அமையவே இவ்வாறு தொற்றாளர்கள் அடையாளம் காணப்பட்டுள்ளனர்.

இதன்படி இன்ஜஸ்ட்ரி தோட்டத்தில் 19 பேருக்கும், என்பீல்ட் தோட்டத்தில் 5 பேருக்கும் போடைஸ் தோட்டத்தில் 5 பேருக்கும் தொற்று உறுதி செய்யப்பட்டுள்ளது.

இந்த நிலையில் அந்த பகுதிக்குள் உட் பிரவேசிக்கவும் அங்கிருந்து வெளிச் செல்லவும் தடை விதிக்கப்பட்டுள்ளது.

இவ்வாறு அமுலாகியுள்ள பயணத்தடை மீள் அறிவிக்கும் வரை அமுலில் இருக்கும் என பொகவந்தலாவ சுகாதார வைத்திய அதிகாரி காரியாலயம் தெரிவித்துள்ளது.

இந்த நிலையில் அங்;கு பலத்த பொலிஸ் பாதுகாப்பு வழங்கப்பட்டுள்ளது.

இதுவரை பொகவந்தலாவ சுகாதார வைத்திய அதிகாரி பிரிவில் சுமார் 29 கொவிட் தொற்றாளர்கள் அடையாளம் காணப்பட்டுள்ளதாக பொகவந்தலாவ சுகாதார வைத்திய அதிகாரி காரியாலயம் தெரிவித்துள்ளது.

 

Page 2 of 649
© 2021 All Rights Reserved by Asian Mirror Pvt Ltd