web log free
May 08, 2021
editor

editor

இந்தியாவிலிருந்து சட்டவிரோதமான முறையில் படகுமூலமாக மஞ்சள் கட்டிகள் மற்றும் ஏலக்காய் பொதிகளுடன் 12 இந்தியப் பிரஜைகள் இலங்கைக் கடற்படையினரால் யாழ்ப்பாணம் - குதிரைமலை கடற்பிரதேசத்தில் வைத்து நேற்று (28) இரவு கைது செய்யப்பட்டுள்ளனர்.

அத்துடன் இவர்கள் பயணித்த இரண்டு படகுகளும் இலங்கைக் கடற்படையினரால் பறிமுதல் செய்யப்பட்டுள்ளன என்று கடற்படை வெளியிட்டுள்ள அறிக்கையில் தெரிவிக்கப்பட்டுள்ளது.

கொரோனா அச்சுறுத்தல் காரணமாக இலங்கை - இந்திய மீனவர்களுக்கு இடையிலான எந்த கொடுக்கல் வாங்கலையும் செய்யே வேண்டாம் என இருநாட்டு அரசாங்கங்களும் அறிவித்திருக்கின்ற நிலையிலேயே இந்த சம்பவமும் இடம்பெற்றுள்ளது.

அதற்கைமைய கைதாகிய சந்தேக நபர்கள் பயணித்த படகுகளில் இருந்து 803 கிலோ கிராம் ஏழைக்காய்களும், 2790 கிலோ கிரோம் மஞ்சள் கட்டிகளும் கைப்பற்றப்பட்டுள்ளன.

குறித்த சந்தேக நபர்கள் இலங்கை கடற்பிரதேசத்தில் பிரவேசித்து இலங்கை மீனவர்களுடன் கொடுக்கல் வாங்கலை செய்யவிருந்ததாக விசாரணையில் தெரியவந்துள்ளது.

எவ்வாறாயினும், நிலவிவரும் கோவிட் அச்சறுத்தல் காரணமாக கைதாகிய 12 இந்தியப் பிரஜைகளும் அவர்களது படகுகளும் விடுவிக்கப்பட்டுள்ளதாகவும் இலங்கைக் கடற்படை வெளியிட்ட அறிக்கையில் மேலும் கூறப்பட்டுள்ளது.

 

 

நுவரெலியா - ஹைய்பொரஸ்ட் பகுதியிலிருந்து  இராகலை நகரை நோக்கி பயணித்த தனியார்  பஸ் ஒன்று இராகலை - கோணப்பிட்டிய பிரதான வீதியில்  மாகுடுகல தோட்டப் பகுதியில் மரக்கறி தோட்டம் ஒன்றில் குடைசாய்ந்துள்ளது.

ஹைய்பொரஸ்ட் பகுதியிலிருந்து பயணிகளை ஏற்றிக் கொண்டு இராகலை பகுதிக்கு சென்ற குறித்த பஸ்  இன்று பிற்பகல் பாதையை விட்டு விலகி சுமார் 20 அடி பள்ளத்தில் பாய்ந்து விபத்துக்குள்ளாகியுள்ளது. இவ்விபத்தில் பஸ்ஸில் பயணித்த 20 பேர் படுங்காயங்களுக்குள்ளாகியுள்ளனர்.

பஸ் சாரதிக்கு ஏற்பட்ட திடீர் சுகயீனம் காரணமாக சாரதி கட்டுப்பாட்டை இழந்ததனால் இந்த விபத்து நேர்ந்ததாக நேரடி விசாரணைகளின் போது தெரியவந்துள்ளது.

இவ்விபத்தில் காயமடைந்த 20 பேரும், ஹைய்பொரஸ்ட் வைத்தியசாலையில் ஆரம்ப சிகிச்சைக்காக அனுமதிக்கப்பட்ட பின் மேலதிக சிகிச்சைக்காக  நுவரெலியா மாவட்ட வைத்தியசாலைக்கு மாற்றப்பட்டுள்ளதாகவும், அங்கு சிகிச்சை பெற்று வருவதாகவும் வைத்தியசாலை வட்டாரங்கள் தெரிவித்தன.

இவ்வாறு காயமடைந்தவர்களில் சிறுவர்களும் அடங்குகின்றனர் என  வைத்தியசாலை வட்டாரங்கள் மேலும் தெரிவித்தன.

இவ்விபத்து தொடர்பில் இராகலை போக்குவரத்து பொலிஸார் மேலதிக விசாரணைகளை மேற்கொண்டு வருகின்றனர்.

 

கொவிட் 19 தடுப்பூசியின் 2வது ஊசி செலுத்தும் பணிகள் நேற்று கொழும்பில் ஆரம்பமான நிலையில், இன்று (29) பிற மாவட்டங்களில் ஆரம்பமானது. இரண்டாவது தடுப்பூசி செலுத்தும் முதல் கட்ட பணிகள் கிளிநொச்சி மன்னார்  வைத்தியசாலையில் இடம்பெற்றது.

அதற்கு அமைவாக கிளிநொச்சி வைத்தியசாலையில் கடமையாற்றும் வைத்தியர்கள், தாதியர், சுகாதார ஊழியர்களிற்கு இரண்டாவது தடுப்பூசி ஏற்றப்பட்டது.

முதலாவது தடுப்பூசி பெற்றுக்கொண்டவர்களிற்கு இரண்டாவது தடுப்பூசி முதல்கட்டமாக இன்று செலுத்தப்பட்டிருந்தமை குறிப்பிடத்தக்கதாகும்

மன்னார் மாவட்டத்தில் உள்ள சுகாதார பணியாளர்களுக்கு 2ஆம்  கட்ட கொவிட்-19 தடுப்பூசி செலுத்தும் நடவடிக்கை இன்று வியாழக்கிழமை காலை 9 மணிக்கு ஆரம்பமாகி தடுப்பூசிகள் செலுத்தும் பணிகள் இடம் பெற்று வருகின்றது.

மாவட்ட ரீதியில் முதலாவது கொரோனா தடுப்பூசியை பெற்றுக்கொண்ட சுகாதார முன் கள பணியாளர்களுக்கு மேற்படி 2 ஆம் கட்ட தடுப்பூசி செலுத்தும் நடவடிக்கை இடம் பெற்றது.

குறிப்பாக மன்னார் மாவட்ட பிராந்திய சுகாதார சேவைகள் பணிமனை மற்றும் மாவட்ட பொது வைத்திய சாலையில் பிரதான தடுப்பூசிகள் வழங்கும் நடவடிக்கைகையும் தலைமன்னார் எருக்கலம்பிட்டி ,அடம்பன் , முசலி பகுதிகளிலும் பிரதேச ரீதியாக தடுப்பூசி செலுத்தும் நடவடிக்கை இடம் பெற்று வருகின்றது.

 

அத்துடன் தடுப்பூசிகளை பெற்றுக்கொண்ட சுகாதார பணியாளர்களுக்கான மருத்துவ ஆலோசனை அடங்கிய துண்டு பிரதிகள் மற்றும் கையேடுகளும் வழங்கப்பட்டது

 

இன்று வியாழக்கிழமை தொடக்கம் எதிர் வரும் மூன்று தினங்களுக்கு குறித்த 2 ஆம் கட்ட   தடுப்பூசிகள் வழங்கும் நடவடிக்கை இடம் பெறவுள்ளமை குறிப்பிடத்தக்கது.

 

 

றிசாட் பதியூதீனை விடுதலை செய்யுமாறு கோரி கவனயீர்ப்பு போராட்டம்

அகில இலங்கை மக்கள் காங்கிரஸின் தலைவரும் நாடாளுமன்ற உறுப்பினருமான றிசாட் பதியூதீனை விடுதலை செய்யுமாறு கோரி வவுனியாவில் ஆர்ப்பாட்டம் ஒன்று முன்னெடுக்கப்பட்டது.

வவுனியா மாவட்ட செயலகத்திற்கு முன்பாக குறித்த ஆர்ப்பாட்டம் நேற்று (28) முன்னெடுக்கப்பட்டது.

இதன்போது கருத்து தெரிவித்த ஆர்ப்பாட்டகாரர்கள்,

றிசாட் பதியூதீனை அதிகாலையில் சென்று கைது செய்யப்பட்டதையிட்டு வேதனையடைகின்றோம். நாடாளுமன்ற உறுப்பினரான அவரை கைதுசெய்வதாக சபாநாயகருக்கு கூட அறிவித்தல் விடுக்கப்படவில்லை. அவரது கைதுக்கு வன்மையாக கண்டனங்களை தெரிவிக்கின்றோம். அரசாங்கம் தன்னுடைய தோல்வியை மறைப்பதற்காக இவ்வாறான கைதுகளை முன்னெடுத்து வருகின்றது.

சிறுபான்மை சமூகங்களிற்கு முன்னெடுக்கப்படும் அநீதிகளுக்கெதிராக வீதியில் இறங்கியே நாம் போராட வேண்டியுள்ளது. எனவே, எமது தலைவரை விடுவிக்காத பட்சத்தில் நாடளாவிய ரீதியில் எமது போராட்டங்கள் தொடர்ந்து கொண்டிருக்கும். என்றனர்.

ஆர்ப்பாட்டத்தில் ஈடுபட்டவர்கள் அரசுக்கு ஆதரவு வழங்காததற்கா இந்த கைது, சிறுபான்மை தலைமைகள் விடுதலைசெய், உண்மையான சூத்திரதாரிகளை கைதுசெய், அரசே பழிவாங்காதே போன்ற வாசகங்கள் தாங்கிய பதாதைகளை ஏந்தியிருந்ததுடன் கோசங்களையும் எழுப்பியிருந்தனர்.

இதன்போது வவுனியா நகரசபையின் தமிழ் தேசியக்கூட்டமைப்பு உறுப்பினரான ரி. கே. இராசலிங்கம், இகில இலங்கை இலங்கை மக்கள் காங்கிரஸ் உறுப்பினர்களான ஏ. ஆர். எம். லரிப், அப்துல் பாரி உட்பட பலரும் கலந்துகொண்டிருந்தனர்.

இலங்கையில் கொரோனா தொற்றுக்கான எஸ்ட்ரா செனிகா என்கிற கொவிஷீல்ட் தடுப்பூசி வழங்கும் இரண்டாவது கட்டம் இன்றைய தினம் ஆரம்பிக்கப்பட்டுள்ளது.

கொழும்பு மாளிகாவத்தை மத்திய அரச மருத்துவமனையில் இன்றைய தினம் சுகாதாரப் பணியாளர்களுக்கு தொற்றுக்கான தடுப்பூசி வழங்கப்பட்டது.

குறித்த வைத்தியசாலையைச் சேர்ந்த மருத்துவப் பணியாளர்கள் மற்றும் தாதியர்களுக்கும் கொவிஷீல்ட் தடுப்பூசிகள் வழங்கப்பட்டன. 

இந்தியாவிடமிருந்து பெற்றுக்கொள்ளப்பட்ட எஸ்ட்ரா செனகா தடுப்பூசி வழங்கும் முதலாவது முயற்சி கடந்த ஜனவரிமாத இறுதியில் முன்னெடுக்கப்பட்டது.

சுமார் ஒருமாதகாலமாக இந்த நடவடிக்கை முன்னெடுக்கப்பட்டதோடு அதில் 9 இலட்சத்து 25 ஆயிரம் பேருக்கு தடுப்பூசிகள் ஏற்றப்பட்டிருந்தன.

இவர்களில் பிரதமர், அரச தலைவர், சுகாதாரப் பணியாளர்கள், முப்படையினர், நாடாளுமன்ற உறுப்பினர்கள் உள்ளிட்டவர்கள் அடங்குகின்றனர்.

அதேவேளை, வடக்கு மாகாணத்தில் மருத்துவர்கள், தாதியர்கள் உட்பட்ட சுகாதாரத் துறையினருக்கு கோவிட்-19 தடுப்பூசியின் இரண்டாவது டோஸ் வழங்கும் பணி நாளைய தினம் ஆரம்பிக்கப்படவுள்ளது.

இந்த தகவலை வடமாகாண சுகாதார சேவைகள் பணிப்பாளர், மருத்துவர் ஆ.கேதீஸ்வரன் தெரிவித்தார்.

முதல் கட்டமாக சுகாதாரத் துறையினருக்கு கோவிட் -19 தடுப்பூசி வழங்கும் திட்டம் வடமாகாணத்திலும கடந்த ஜனவரி மாதம் ஆரம்பிக்கப்பட்டது.

மருத்துவர்கள், தாதிய உத்தியோகத்தர்கள் உள்ளிட்ட மருத்துவ சேவையாளர்கள், ஊழியர்கள் என 9 ஆயிரத்து 400 பேர் மற்றும் யாழ்ப்பாணம் பல்கலைக்கழக மருத்துவ பீட மருத்துவ கல்வியாளர்கள், மருத்துவ பயிற்சியாளர்கள் 10 ஆயிரத்துக்கு மேற்பட்டோருக்கு முதல்கட்டமாக கோவிட்-19 அன்ரோசெனேகா தடுப்பூசி  வழங்கப்பட்டது.

 

அதன் இரண்டாவது டோஸ் வழங்கும் பணி நாளை ஆரம்பிக்கப்படவுள்ளமை குறிப்பிடத்தக்கது.

 

 

கடந்த சில நாட்களாக கொவிட் தொற்றாளர்களின் எண்ணிக்கை வழமைக்கு மாறாக அதிகரித்த போதிலும், நாட்டின் பொருளாதாரம் மற்றும் சமூகத்துக்கு ஏற்படும் பாதிப்பை கருத்திற்கொண்டு எந்த சந்தர்ப்பத்திலும் நாட்டை முழுமையாக முடக்காதிருக்க அரசாங்கம் தீர்மானித்துள்ளதாக பிரதமர் மஹிந்த ராஜபக்ஷ தெரிவித்துள்ளார்.

சீன பாதுகாப்பு அமைச்சருடன் இன்று இடம்பெற்ற சந்திப்பின்போதே பிரதமர் இதனை தெரிவித்தார். இதன்போது, கொவிட் தொற்று ஏற்பட்டுள்ள காலப்பகுதியில் இலங்கைக்கு சீனா வழங்கிய உதவிகளுக்கு பிரதமர் மஹிந்த ராஜபக்ஷ நன்றி தெரிவித்தார்.

சீன பாதுகாப்பு அமைச்சர் ஜெனரல் Wei Fenghe பிரதமர் மஹிந்த ராஜபக்ஸவை இன்று சந்தித்தார். சீன தேசிய பாதுகாப்பு அமைச்சர் ஜெனரல் வெய் ஃபென்க் அவர்களுடன் இடம்பெற்ற இரு தரப்பு பேச்சுவார்த்தையின் போது பிரதமர் மகிந்த ராஜபக்ஸ மேலும் கருத்து வெளியிடுகையில்,

கௌரவ அமைச்சர் அவர்களே, உங்களை இலங்கைக்கு வரவேற்க கிடைத்தமை தொடர்பில் நான் மிகுந்த மகிழ்ச்சியடைகிறேன். தொற்று நிலைமையையும் பொருட்படுத்தாது இலங்கைக்கு விஜயம் செய்வதற்கான உங்களது தீர்மானத்தை நாம் பாராட்டுகின்றோம்.

தொற்று நிலைமைக்கு மத்தியில் சீனாவின் உயர்மட்ட தூதுக்குழுவினர் பல சந்தர்ப்பங்களில் இலங்கைக்கு விஜயம் செய்தனர். உங்களது இவ்விஜயம் மற்றும் சந்திப்பின் ஊடாக எமது பலமான மற்றும் நட்பு ரீதியிலான இருதரப்பு உறவை மேலும் வலுப்படுத்துவதற்கு வாய்ப்பு கிடைக்கும் என நான் எதிர்பார்க்கின்றேன்.

முதலில், இந்த ஆண்டு இடம்பெறவுள்ள சீன கம்யூனிஸ்ட் கட்சியின் 100ஆவது ஆண்டு நிறைவு மற்றும் அதன் அனைத்து சாதனைகளுக்கும் எனது அன்பான வாழ்த்துக்களை தெரிவித்துக் கொள்கிறேன். இது உண்மையில் ஒரு மிக முக்கியமான மைல்கல்லாகும்.

மேலும், வறுமையை ஒழிப்பதில் சீனா செய்த சாதனைகள் குறித்தும் நான் வாழ்த்துகிறேன். சீன அரசாங்கம் சுமார் 100 மில்லியன் கிராமப்புற மக்களை வறுமையிலிருந்து மீட்டுள்ளது. மறுபுறம், வறுமையை ஒழிக்கும் அமெரிக்காவின் உலகளாவிய நிலையான அபிவிருத்தி இலக்குகளை 10 ஆண்டுகளுக்கு முன்னர் சீனாவிற்கு அடைய முடிந்தது. இது ஒரு பெரிய சாதனையாகும்.

கௌரவ அமைச்சர் அவர்களே, இந்த தொற்றுநோயைத் தடுப்பதற்கான ஒரே வழி தடுப்பூசி மட்டுமே என்பது தற்போது உலகளாவிய ரீதியில் தெளிவாகியுள்ளது. கொவிட் தொற்றுநோய் பரவல் ஆரம்பித்ததிலிருந்து, சகல இலங்கையர்களுக்காகவும் சீனா 600,000 சினோஃபார்ம் தடுப்பூசிகள் மற்றும் சுகாதார பாதுகாப்பு உபகரணங்கள் ஆகியவற்றை தாராளமாக நன்கொடையாக வழங்கியிருந்தமையை நான் உண்மையிலேயே பாராட்டுகிறேன். இந்த தொற்றுநோயைக் கையாள்வதில் சீன அரசாங்கத்தின் தொடர்ச்சியான ஆதரவை எதிர்பார்க்கிறோம்.

கடந்த சில வாரங்களில் கொவிட் 19 தொற்றாளர்களின் எண்ணிக்கை அதிகரித்த போதிலும், நாட்டின் பொருளாதார மற்றும் சமூக தாக்கத்தை கருத்திற்கொண்டு முழு நாட்டையும் முடக்காதிருப்பதற்கு ஒரு அரசாங்கம் என்ற ரீதியில் நாங்கள் தீர்மானித்துள்ளோம். தொற்றுநோய்க்கு பிந்தைய நிலைமைக்கு முகங்கொடுப்பதற்கு இன்னும் பலவற்றைச் செய்ய வேண்டும் என்பதை நீங்கள் ஒப்புக்கொள்வீர்கள் என்று நான் நம்புகிறேன்.

உலகளாவிய ரீதியிலிருந்து இலங்கைக்கு முதலீடுகளை ஈர்ப்பதே தற்போதைய எமது முன்னுரிமையாகவுள்ளது. அவ்வாறான முதலீட்டாளர்களின் இலங்கை மீதான நம்பிக்கையை கட்டியெழுப்புவதற்கு உங்களவு ஆதரவை நான் எதிர்பார்க்கின்றேன்.

கௌரவ அமைச்சர் அவர்களே, உங்களவு இவ்விஜயம் குறித்து மீண்டுமொரு முறை நன்றி தெரிவிப்பதுடன், தொற்றுநோயால் ஏற்படும் சவால்களை சமாளிப்பதற்கு தற்போதுள்ள ஒத்துழைப்பை மேம்படுத்திக்கொள்வதற்கும், உங்களுடனும் உங்கள் அரசாங்கத்துடனும் நெருக்கமாக தொடர்ந்து பணியாற்ற எதிர்பார்க்கின்றேன்.

ஜமேய்க்கா நாட்டிலிருந்து கூரியர் சேவை மூலமாக நாட்டுக்கு அனுப்பப்பட்ட கொக்கெய்ன் போதைப்பொருட்களை இலங்கை சுங்கப் பிரிவின் போதைப்பொருள் கட்டுப்பாட்டு பிரிவு அதிகாரிகள் கைப்பற்றியுள்ளனர்.

போதைப்பொருள் அடங்கிய இந்த பொதி, சீதுவையை தளமாகக் கொண்ட ஒரு தனியார் கூரியர் சேவை மூலம் இலங்கைக்கு கொண்டு வரப்பட்டுள்ளது.

ஏறக்குறைய ஒரு வாரத்திற்கு முன்னர் நாட்டிற்கு வந்த அந்த பொதி குறித்து சந்தேகம் எழுந்த நிலையில், சுங்க அதிகாரிகள் அதன் பெறுநரை வரவழைத்து பொதியை சோதனையிட்டார்கள்.

இதன்போதே குறித்த பொதியிலிருந்து கொக்கெய்ன் போதைப்பொருள் மீட்கப்பட்டுள்ளதுடன், அவற்றின் பெறுமதி சுமார் 25 இலட்சம் ரூபா எனவும் மதிப்பிடப்பட்டுள்ளது.

இதன்போது 44 வயதான கொழும்பு, நாரஹேன்பிட்டி பகுதியில் வசிக்கும் பொதியின் பெறுநர் சுங்க அதிகாரிகளினால் கைதுசெய்யப்பட்டு தடுத்து வைக்கப்பட்டு விசாரணைக்குட்படுத்தப்பட்டுள்ளார்.

 

சீனப் பாதுகாப்பு அமைச்சர் ஜெனரல் வெய் பிங்கின் இலங்கைக்கான திடீர் விஜயத்தின் பின்னணியில் உள்ள இரகசியம் குறித்து சந்தேகம் எழுந்துள்ளதாக முன்னாள் இராணுவத் தளபதியும், நாடாளுமன்ற உறுப்பினருமான பீல்ட் மார்ஷல் சரத் பொன்சேகா தெரிவித்துள்ளார்.

சீனப் பாதுகாப்பு அமைச்சர் நேற்று இரவு இலங்கைக்கு விஜயம் மேற்கொண்டுள்ளதோடு இன்றைய தினம் அரச தலைவர், பிரதமர் என பலரையும் சந்தித்துள்ளார். 

கொழும்பு போர்ட் சிட்டி திட்டத்தின் ஊடாக சீனாவின் கொலணியொன்றே இலங்கையில் உதிக்கப் போவதாக எழுந்துள்ள விமர்சனங்களுக்கு மத்தியில் சீனப் பாதுகாப்பு அமைச்சரின் இந்த விஜயம் குறித்து சரத் பொன்சேகா கொழும்பில் இன்று நடைபெற்ற ஊடக சந்திப்பின்போது கேள்வி எழுப்பினார்.

அவர் மேலும் கருத்து வெளியிடுகையில், சாதாரணமாக எமது படையினர் சிரேஸ்ட அதிகாரிகள் வெளிநாடுகளின் அழைப்பின் பேரில் சென்றுவருவது வழக்கமாகும். இந்நிலையில், வெளிநாடுகளிலுள்ள சிரேஷ்ட உறுப்பினர்கள் எமது நாட்டிற்கு விஜயம் செய்வது பிரச்சினையல்ல. இருப்பினும், கடந்த காலத்தில் அமெரிக்காவின் இராணுவத் தளபதி இலங்கைக்கு இதுவரை விஜயம் மேற்கொண்டிருக்கவில்லை. வலய நாடுகளின் இராணுவத் தளபதிகள் விஜயம் செய்திருந்தாலும் பெரும்பாலான நாடுகளின் இரண்டாம், மூன்றாம்நிலை அதிகாரிகளே விஜயம் மேற்கொண்டிருக்கின்றனர். இந்த நிலையில், சீனப் பாதுகாப்பு அமைச்சரை எடுத்துக்கொண்டால் அவர் எமது நாட்டுடன் பாதுகாப்பு சார்ந்த கொடுக்கல் வாங்கலில் ஈடுபடுபவர் அல்ல. எமது நாட்டின் பாதுகாப்புடன் சர்வதேச  பாதுகாப்பை ஒப்பிடும்போது நாங்கள் மிகவும் கீழ்நிலையில்தான் உள்ளோம். அதனால், மிகவும் அதிகாரமுடைய ஒருவர் திடீரென இலங்கைக்கு விஜயம் மேற்கொண்டிருப்பது சந்தேகத்தையே ஏற்படுத்தியுள்ளது. இலங்கையின் அரச தலைவர்கள் மற்றும் பிரதிநிதிகள் வெளிநாடு சென்று சொக்கலைட்டுக்கள் உட்பட பொருட்கொள்வனவில் ஈடுபடுவதுபோல் சீனப் பாதுகாப்பு அமைச்சரது இலங்கை விஜயத்தை ஒப்பிடக்கூடாது. அப்படிப்பட்ட ஒருவர் இலங்கைக்கு தற்சமயம் விஜயம் மேற்கொண்டிருப்பதன் பின்னணி மிகவும் அவசியமான காரணமாகவே இருக்கலாம். அந்த இரகசிய காரணம் என்ன என்பதுதான் எமக்குள்ள  கேள்வியாகும். அவர் வெறுமனே விடுமுறையைக் கழிப்பதற்காக இங்கு விஜயம் செய்யவில்லை என்றார்.

 

 

 

இரண்டுநாள் உத்தியோகபூர்வ விஜயம் மேற்கொண்டு இலங்கை வந்துள்ள சீன பாதுகாப்பு அமைச்சர் வெய் பிங் (Wei Fenghe) அவர்களுக்கும் ஜனாதிபதி கோட்டாபய ராஜபக்ஷ அவர்களுக்குமிடையிலான உத்தியோகபூர்வ சந்திப்பு இன்று (28) ஜனாதிபதி அலுவலகத்தில் இடம்பெற்றது.

ஜனாதிபதி அலுவலகத்திற்கு வருகை தந்த சீன பாதுகாப்பு அமைச்சரை ஜனாதிபதியின் செயலாளர் பீ.பி.ஜயசுந்தர மற்றும் வெளிவிவகார செயலாளர் அட்மிரல் பேராசிரியர் ஜயநாத் கொலம்பகே ஆகியோர் வரவேற்றனர்.

ஜனாதிபதி அவர்களுக்கும் தனக்குமிடையிலான இருதரப்பு பேச்சுவார்த்தை மிகவும் பயனுள்ளதாக அமைந்திருந்ததாக சீன பாதுகாப்பு அமைச்சர் தெரிவித்தார்.

அதேபோன்று இருநாடுகளுக்குமிடையிலான உறவுகள் இந்த விஜயத்தின் மூலம் பலமடைந்திருப்பதாகவும் அவர் மேலும் தெரிவித்தார்.

சீன பாதுகாப்பு அமைச்சர் ஜெனரல் வெய் பிங் (Wei Fenghe) அவர்கள் தனது வருகையை நினைவுகூரும் வகையில் விசேட விருந்தினருக்கான நினைவுப் புத்தகத்தில் கைச்சாத்திட்டார்.

இலங்கைக்கான சீன தூதுவர் கீ சென்ஹொங் (Qi Zhenhong), சீன மக்கள் இராணுவத்தின் ஒன்றிணைந்த பணிக்குழாம் திணைக்களத்தின் தலைவரும் சர்வதேச விவகாரங்களுக்கான பணிப்பாளர் நாயகம் ஷாஓ யென்மின்ங் (Lt. Gen. Shao Yuanming), மேஜர் ஜெனரல் சீ கோவை (Ci Guowei) உள்ளிட்ட சிரேஷ்ட பிரதிநிதிகள், ஜனாதிபதியின் செயலாளர் பீ.பி.ஜயசுந்தர ஆகியோர் இந்த நிகழ்வில் கலந்துகொண்டனர்.

 

 

அரச தரப்பினால் எவ்வளவுதான் கட்டுப்பாடுகளை விதித்தாலும்
பொதுமக்களின் ஒத்துழைப்பின்றி மட்டக்களப்பில் கொரோனா வைரசின் மூன்றாவது பரவலை கட்டுப்படுத்த முடியாதென மட்டக்களப்பு மாவட்ட செயலாளரும் அரசாங்க அதிபருமாகிய கே. கருணாகரன் தெரிவித்துள்ளார்.

மட்டக்களப்பு மாவட்ட கொரோனா தடுப்பு செயலணியின் விசேட கூட்டம் மாவட்ட செயலகத்தில் இடம்பெற்றது. இதன்போது ஊடகங்களுக்கு கருத்து வெளியிடுகையிலேயே அரசாங்க அதிபர் இவ்வாறு தெரிவித்துள்ளார்.

மேலும் அவர் இங்கு கருத்து வெளியிடுகையில்,

கொவிட் 19 தொடர்பான கட்டுப்பாட்டு இராஜாங்க அமைச்சர் அவர்களினால் அண்மையில் வெளியிடப்பட்டுள்ள சுற்று நிருபத்திற்கு அமைய எவ்வாறான நடவடிக்கைகளை மட்டக்களப்பு மாவட்டத்தில் எடுக்க வேண்டுமென  தெளிவான விளக்கங்கள் இதன்போது வழங்கப்பட்டதாகவும்,
அதற்கு அமைவாக மக்கள் கூடும் இடங்களை எவ்வாறு கட்டுப்படுத்துவது, வர்த்தக நிலையங்களில் எவ்வாறாக சுற்றறிக்கைகளை நடைமுறைப்படுத்துவது போன்ற பல்வேறுபட்ட விடயங்களுக்கான தெளிவுபடுத்தல்கள் இன்றைய கூட்டத்தின் போது வழங்கப்பட்டுள்ளதாகவும் தெரிவித்தார்.

இன்றிலிருந்து பொலிசார் பல்வேறு நடவடிக்கைகளை சுகாதார திணைக்கள அதிகாரிகளின் ஒத்துழைப்புடன் நடைமுறைப்படுத்தவுள்ளதாகவும்,
மட்டக்களப்பு மாவட்டத்தில் கடந்த 24 மணித்தியாலங்களுக்குள் 42 அன்ரிஜன் பரிசோதனைகள் செய்யப்பட்டதில் 2 பேர் காத்தான்குடியிலும் 2 பேர் களுவாஞ்சிகுடியிலும் மேலும் 5 பொலிசாருமாக மொத்தமாக 9 பேர் கொவிட் 19 பொசிட்டீவ் ஆக இனங்காணப்பட்டுள்ளனர்.

கடந்த இரண்டு அலைகளைப் போலல்லாது இம்முறை  மட்டக்களப்பில் ஆரம்பத்திலேயே ஒரளவு கட்டுப்பாட்டிற்குள் இருப்பதாக கருதுவதுடன், இருந்தாலும் இதை விரிவடையாமல் கட்டுப்பாட்டிலே வைத்திருப்பதற்கு பொது மக்களின் ஒத்துழைப்பு பெரிதும் அவசியமானது, பொதுமக்கள் அநாவசியமான தேவைகளுக்காக வீடுகளைவிட்டு வெளியில் செல்வதை தவிர்க்க வேண்டுமெனவும், அவசிய காரணங்களிற்கு மாத்திரம் வீட்டை விட்டு வெளியேற வேண்டுமென கேட்டுக்கொண்டதுடன், ஏனைய நோக்கங்களுக்காக வீட்டைவிட்டு வெளியேற வேண்டாமென பொது மக்களை மிக வினையமாக கேட்டுக்கொள்வதாக தெரிவித்திருந்தார்.

அதேவேளை பொது மக்கள் கடந்த காலங்களிலே எவ்வாறு அரசாங்க சுற்று நிருபத்திற்கும் அரசாங்க அறிவுறுத்தலுக்கும் சுகாதார திணைக்கள அதிகாரிகளுக்கும் பொலிசாருக்கும் இராணுவத்தினருக்கும் ஒத்துழைப்பு வழங்கினீர்களே அதே போன்று இம் முறையும் அதை உணர்ந்து செயற்படுமாறு கேருவதுடன், இம்முறை இந்த மூன்றாவது அலையானது சிறார்களையும் மாணவர்களையும் ஏனைய இளைஞர் யுவதிகளையும் தாக்குவதை நாம் கண்கூடாக காண்கின்றோம் இதை பொதுமக்கள் முற்று முழுதாக விளங்கி மட்டக்களப்பு மாவட்டத்திலே இந்த அறிவுறுத்தல்களை கண்டிப்பாக கடைப்பிடிக்குமாறு அரசாங்க அதிபர் அன்பாக கேட்டுக்கொண்டுள்ளார்.

இவ்விசேட கூட்டத்தில் மேலதிக அரசாங்க அதிபர் திருமதி சுதர்சினி ஸ்ரீகாந்த், மாவட்ட பிரதிப் பொலிஸ்மா அதிபர் லக்சிறி விஜயசேன, இராணுவ அதிகாரிகள், மாவட்ட செயலக மற்றும் சுகாதார திணைக்கள உயர் அதிகாரிகள்,  பிரதேச செயலாளர்கள், வலயக் கல்விப் பணிப்பாளர்கள், வர்த்தக சங்க பிரதிநிதிகள்  உட்பட மட்டுப்படுத்தப்பட்ட அளவிலானோர் கலந்துகொண்டிருந்தனர்.

 

 

Page 6 of 649
© 2021 All Rights Reserved by Asian Mirror Pvt Ltd