web log free
May 08, 2021
editor

editor

அவுஸ்ரேலியாவின் விக்டோரியாவின் Geelong பகுதியைச் சேர்ந்த தமிழ் அகதி ஒருவர் அண்மையில் கார் விபத்தொன்றில் மரணமடைந்துள்ளதாக தெரிவிக்கப்படுகிறது.

இலங்கைப் பின்னணி கொண்ட 38 வயதான நிக்சன் என்பவரே கடந்த 20ம் திகதி மரணமடைந்துள்ளதாக விக்டோரிய தமிழ் சங்கத்தைச் சேர்ந்த திரு.பரமநாதன் தெரிவித்தார்.

Geelong-இல் குடும்பத்துடன் வாழ்ந்துவந்த இவருக்கு இரண்டு, ஐந்து, எட்டு மற்றும் பதின்மூன்று வயதுகளில் நான்கு பெண் பிள்ளைகள் உள்ளனர்.

முழுக்குடும்பமும் நிக்சனின் வருமானத்தில் தங்கி வாழ்ந்ததாகவும் திடீரென இவர் மரணமடைந்துள்ளதால் குடும்பத்தினர் நிர்க்கதியான நிலைக்கு தள்ளப்பட்டுள்ளதாகவும் திரு.பரமநாதன் குறிப்பிட்டார்.

படகு மூலம் வந்து ஆஸ்திரேலியாவில் புகலிடம்கோரிய நிக்சன் குடும்பத்தினரின் அகதி தஞ்ச விண்ணப்பம் நிராகரிக்கப்பட்டுள்ள நிலையில், இவர்களுக்கு Centrelink கொடுப்பனவும் கிடைக்காது என தெரிவிக்கப்படுகிறது.

இதேவேளை நிக்சனின் இறுதி நிகழ்வு எதிர்வரும் மே 8ம் திகதி நடைபெற ஏற்பாடாகியுள்ளதாகவும், இறுதி நிகழ்விற்குக் கூட பணமில்லாத நிலையிலேயே அவரது மனைவியும் குடும்பமும் உள்ளதாகவும் திரு.பரமநாதன் குறிப்பிட்டார்.

 

சீன பாதுகாப்பு அமைச்சர் வெய் ஃபெங் மூன்று நாள் உத்தியோகபூர்வ பயணம் ஒன்றை மேற்கொண்டு நேற்றிரவு (27) கொழும்பை வந்தடைந்துள்ளார்.

சீன பாதுகாப்பு அமைச்சருடன் 37 பேர் கொண்டு சீன  உயர் அதிகாரிகள் குழுவினரும் நேற்றிரவு 10.50 மணிக்கு சீன விமானப்படையின் பி -4026 சிறப்பு விமானத்தில் கட்டுநாயக்க, சர்வதேச விமான நிலையத்தை வந்தடைந்தனர்.

சீன பாதுகாப்பு அமைச்சரும் அவரது தூதுக்குழுவும் நாளை(29) வரை நாட்டில் தங்கியிருக்கும் என அரசாங்க தகவல் திணைக்களம் அறிவித்துள்ளது.

இவரது பயணமானது அரசியல் தொடர்புகள் மற்றும் பொருளாதார ஒத்துழைப்பினை அதிகரிப்பது மாத்திரமன்றி இராணுவ தொடர்புகள் பற்றியும் அவதானம் செலுத்தும்.

இலங்கை வந்துள்ள சீன பாதுகாப்பு அமைச்சர், ஜனாதிபதி கோத்தபாய ராஜபக்ஷ, பிரதமர் மஹிந்த ராஜபக்ஷ மற்றும் சிரேஷ்ட அதிகாரிகளுடன் பேச்சுவார்த்தை நடத்தவுள்ளார்.

இலங்கை வருவதற்கு முன்னர் வெய் ஃபெங், நேற்று காலை ஒரு குறுகிய பயணமாக பங்களாதேஷுக்கு விஜயம் மேற்கொண்டிருந்தார்.

2018 மார்ச் 19 அன்று 13 ஆவது தேசிய மக்கள் காங்கிரசில் சீனாவின் தேசிய பாதுகாப்பு அமைச்சின் தலைவராக ஜெனரல் வெய் ஃபெங் நியமிக்கப்பட்டார் என்பதும் குறிப்பிடத்தக்கது.

 

கொரோனா தொற்றின் அச்சுறுத்தலுக்கு மத்தியில் கொழும்பிலுள்ள வெளிநாட்டுப் பிரதிநிதிகள் எதிர்கட்சித் தலைவர் சஜித் பிரேமதாஸவை கொழும்பில் வைத்து இன்று சந்தித்திருக்கின்றனர்.

ஐரோப்பிய ஒன்றியத்தின் இலங்கைக்கான தூதுவர் டெனிஸ் சைபின், பிரான்ஸ் தூதுவர் ரீட்டா குலியானா மாநெல்லா, ஜேர்மான் தூதுவர் ஹோல்கர் சூபர்ட், ரோமேனியாத் தூதுவர் விக்டர் சூடியா உட்பட பல்வேறுபட்ட வெளிநாட்டு இராஜதந்திரிகள் இந்த அழைப்பை ஏற்று எதிர்கட்சித் தலைவரது உத்தியோகபூர்வ அலுவலகத்திற்கு இன்றைய தினம் விஜயம் மேற்கொண்டிருந்தனர்.

சுமார் ஒருமணிநேரத்திற்கும் அதிகமாக இந்த சந்திப்பு இடம்பெற்றதாக தெரிவிக்கப்படுகின்றது.

நாட்டில் ஏற்பட்டிருக்கும் கொரோனா நெருக்கடிக்கு மத்தியில் உலகளாவிய ரீதியில் பொருளாதார நிலைமை, அதற்கு சமமாக இலங்கை எதிர்கொண்டிருக்கும் நெருக்கடிகள் என பல்வேறு விடயங்களை எதிர்கட்சித் தலைவர் சஜித் பிரேமதாஸ இதன்போது தெளிவுபடுத்தியுள்ளார்.

இந்த நெருக்கடி நிலைமையை சமாளிப்பதற்கு அரசாங்கம் முன்னெடுத்துள்ள சில திட்டங்கள் குறித்து தனது கருத்தை பதிவுசெய்திருக்கும் சஜித் பிரேமதாஸ, அதன் பலவீனமான நிலைமைகள் குறித்தும்  சுட்டிக்காட்டியுள்ளார்.

மனித உரிமை, சிவில், பொருளாதாரம், சமூகம், அரசியல், ஆன்மீகம், மத மற்றும் கலாசார உரிமைகளைப் பலப்படுத்துவது குறித்தும் இதன்போது பேசப்பட்டுள்ளது.

இந்த சந்தர்ப்பத்தில் ஐக்கிய மக்கள் சக்தியின் நாடாளுமன்ற உறுப்பினர்களான எரான் விக்கிரமரத்ன, கலாநிதி ஹர்ஷ டி சில்வா உள்ளிட்டவர்களும் கலந்துகொண்டிருந்தனர்.

 

அரச பெருந்தோட்டங்களில் தொழில் புரியும் தொழிலாளர்களுக்கு 1,000 ஆயிரம் ரூபா நாளாந்த கொடுப்பனவு வழங்கப்பட்டுள்ளது. 

கூட்டுவொப்பந்தத்தில் உள்ளடக்கப்பட்டுள்ள அம்சங்களை முறையாக பெற்றுக் கொள்ள  உரிய  தரப்பினருடன்  பேச்சுவார்த்தை முன்னெடுக்கப்பட்டுள்ளது. 

மலையக மக்களின் உரிமைகளை  பாதுகாப்பதற்கு அரசாங்கம் முழுமையான ஒத்துழைப்பு வழங்கும் என  பிரதமரின் பிரதமரின் பதுளை மாவட்டத்திற்கான ஒருங்கிணைப்பு செயலாளர் திரு.செந்தில் தொண்டமான் தலைமையில் இன்று (27)  அலரி மாளிகையில் இடம்பெற்ற சந்திப்பின் பின்னர் ஊடகவியலாளர்கள் மத்தியில் பேசுகையில் தெரிவித்தார்.

அவர் மேலும் குறிப்பிடுகையில்,

பெருந்தோட்ட மலையக மக்களுக்கு   1,000 ஆயிரம் ரூபா நாளாந்த கொடுப்பனவை பெற்றுக் கொடுப்போம் என வழங்கிய வாக்குறுதியை நிறைவேற்றியுள்ளோம்.  

அரச மற்றும் தனியார்  பெருந்தோட்ட நிறுவனங்கள் 1,000 ஆயிரம் ரூபா நாளாந்த கொடுப்பனவை வழங்காமல் இருக்க தொடர்ந்து பல்வேறு வழிமுறைகளில் முயற்சிகளை மேற்கொண்டுள்ளன.

பெருந்தோட்ட அமைச்சின் கீழ் உள்ள அரச தோட்டங்களின் தொழிலாளர்களுக்கு 1,000 ஆயிரம் ரூபா கொடுப்பனவு வழங்கவில்லை என  குற்றச்சாட்டுக்கள் முன்வைக்கப்பட்டன.

கண்டி மற்றும் மாத்தளை ஆகிய மாவட்டங்களில் 16 அரச  பெருந்தோட்டங்கள் உள்ளன. இத்தோட்டங்களில் சுமார் 3,800  தொழிலாளர்கள் தொழில் புரிகிறார்கள். இவர்கள் அனைவருக்கும் கடந்த வெள்ளிக்கிழமை 1,000 சம்பள நிலுவை முழுமையாக வழங்கப்பட்டுள்ளன.

பெருந்தோட்ட  மக்களின் நலனுக்காக உருவாக்கப்பட்ட கூட்டுவொப்பந்தம் தற்போதும் நடைமுறையில் உள்ளது. கூட்டுவொப்பந்தம் இரத்து செய்யப்படவில்லை.

ஒப்பந்ததில் குறிப்பிடப்பட்டுள்ள அம்சங்களை முழுமையாக பெற்றுக் கொள்ள உரிய தரப்பினருடன் பேச்சுவார்த்தை முன்னெடுக்கப்பட்டுள்ளது. 

சம்பள அதிகரிப்பின் பின்னர் பெருந்தோட்ட மலையக மக்களுக்கு எதிராக தோட்ட நிறுவனங்கள் செயற்படுவதாக அறிய முடிகிறது. இவ்விடயம் குறித்து அதிக அவதானம் செலுத்தப்பட்டுள்ளது.

பெருந்தோட்ட மக்களின் உரிமைகளை பாதுகாக்க இலங்கை தொழிலாளர் காங்கிரஸ் அர்ப்பணிப்புடன் செயற்படும். தொழிலாளர்களின் சார்பில் அரசாங்கம் பல தீர்மானங்களை நெருக்கடியான சூழ்நிலையில் முன்னெடுத்துள்ளது.

 பெருந்தோட்ட மக்களின் முன்னேற்றத்திற்கு அரசாங்கம் முழுமையான ஒத்துழைப்பு வழங்கும் என்றார்.

 

யாழ்ப்பாணம் தெல்லிப்பளையில்  கொரோனா விழிப்புணர்வு செயற்திட்டம் பொலிஸாரினால் இன்று காலை முன்னெடுக்கப்பட்டது.

காங்கேசன் துறை சிரேஷ்ட பொலிஸ் அத்தியட்சகர் ஆனந்த ஹட்டகட்சியின் வழிகாட்டலில் தெல்லிப்பளை பொலிஸ் பரிசோதகர் மேர்சன் இந்திக சில்வாவின் தலைமையில் இந்த விழிப்புணர்வு  செயற்திட்டம் முன்னெடுக்கப்பட்டது.

வர்த்க நிலையங்களில் வர்த்தகர்கள் செயற்படும் விதம், பேருந்துகளில் பயணிப்பவர்கள் மற்றும் சந்தைகளில் வியாபார நடவடிக்கைகளில் ஈடுபடுபவர்கள் மற்றும் பொது மக்களுக்கு விழிப்புணர்வு மேற்கொள்ளப்பட்டது.

முகக்கவசம் அணிவது மற்றும் சுகாதார வழிமுறைகளை பின்பற்றுவது குறித்தும் தெளிவுபடுத்தப்பட்டது.

இதன்போது முகக்கவசம் அணியாதோர் பொஸிசாரினால் கடுமையான எச்சரிக்கை விடுக்கப்பட்டு விடுவிக்கப்பட்டிருந்தமை குறிப்பிடத்தக்கது.

 

சிரேஷ்ட ஊடகவியலாளர் சுதேவ ஹெட்டிஆரச்சி ஜனாதிபதி ஊடகப் பிரிவின் பணிப்பாளர் நாயகமாக நியமிக்கப்பட்டுள்ளார்.

ஜனாதிபதி அலுவலகத்தில் ஜனாதிபதி கோட்டாபய ராஜபக்ஷ அவர்களிடமிருந்து தனது நியமனக் கடிதத்தை பெற்றுக்கொண்ட சுதேவ ஹெட்டிஆரச்சி அவர்கள், எதிர்வரும் வாரத்தில் தமது கடமைகளை பொறுப்பேற்கவுள்ளார்.

கொழும்பு ஆனந்தா கல்லூரியின் பழைய மாணவரான சுதேவ ஹெட்டிஆரச்சி, அனுபவம் வாய்ந்த சிரேஷ்ட ஊடகவியலாளர் ஆவார்.

25 வருடகால ஊடக வாழ்வில் பிரபலமான அறிவிப்பாளராகவும் தயாரிப்பாளராகவும் முக்கிய ஊடக நிறுவனங்களில் உதவி முகாமையாளராகவும் முகாமையாளராகவும், உதவி பொது முகாமையாளராகவும் பொது முகாமையாளராகவும் பணிப்பாளராகவும் மற்றும் பிரதம நிறைவேற்று அதிகாரியாகவும் பதவிவகித்த திறமையான நிர்வாக அதிகாரியாவார்.

சுதேவ ஹெட்டிஆரச்சி ஜனாதிபதி ஊடகப் பிரிவின் பணிப்பாளர் நாயகமாக நியமனம் பெறுவதற்கு முன்னர் சுவர்னவாஹினி ஊடக வலையமைப்பின் பிரதம நிறைவேற்று அதிகாரியாக பதவி வகித்தார்.

 

நாடளாவிய ரீதியில் உள்ள அனைத்து பாடசாலைகளையும் மூடுவதற்கு அமைச்சரவையில் தீர்மானிக்கப்பட்டுள்ளது. கொவிட்-19 வைரஸ் பரவல் தீவிரமடைந்துள்ள நிலையில், அனைத்துபாடசாலைகளையும் எதிர்வரும் 30 ஆம் திகதிவரை மூடுவதற்கு அரசாங்கம் தீர்மானித்துள்ளமை குறிப்பிடத்தக்கது.

இதேவேளை, நாடளாவிய ரீதியில் அனைத்து மேலதிக வகுப்புக்களையும் எதிர்வரும் 30 ஆம் திகதி வரை நடத்துவதற்கு தடை விதிக்கப்பட்டுள்ளது.

அத்துடன் நாட்டிலுள்ள அனைத்து முன்பள்ளிகள் மற்றும் அறநெறி பாடசாலைகளை மூடுவதற்கு தீர்மானிக்கப்பட்டுள்ளதாக கல்வி அமைச்சர் ஜீ.எல்.பீரிஸ் தெரிவித்துள்ளார்.

இன்று முதல் எதிர்வரும் 30 ஆம் திகதி வரை முன்பள்ளிகள் மற்றும் அறநெறி பாடசாலைகளை மூடுவதற்கு தீர்மானிக்கப்பட்டுள்ளது.

கொழும்பில் இன்று(27) நடந்த ஊடக சந்திப்பில் அவர் இதனைத் தெரிவித்தார்.

 

இலங்கை கிரிக்கெட் அணியில் சிறந்த வீரர்கள் இருந்தும் நிர்வாகத்தின் ஊழல்வாதிகள் உள்ளதால் கிரிக்கெட் அணி பாரிய வீழ்ச்சியை கண்டு வருகின்றது என முன்னாள் அமைச்சர் அர்ஜுன ரணதுங்க தெரிவித்துள்ளார்.

கல்குடா பாசிக்குடாவில் உள்ள விடுதியொன்றில் நேற்று(27) இடம்பெற்ற ஊடகவியலாளர் சந்திப்பில் கலந்து கொண்டு உரையாற்றும் போதே மேற்சொன்னவாறு தெரிவித்துள்ளார். இதன்போது அவர் அங்கு மேலும் தெரிவிக்கையில்,

இலங்கை கிரிக்கெட் அணியில் நான் தலைமைத்துவம் வகித்த சமயத்தில் நிருவாகத்தில் சிறந்தவர்கள் இருந்தார்கள். இதன் மூலம் எங்களது திறமைகளை வெளிக் கொணர்ந்து உலக கிண்ணத்தை கைப்பற்றினோம். ஆனால், தற்போது இலங்கை கிரிக்கெட் அணியில் சிறந்த வீரர்கள் இருந்தும் கிரிக்கெட் நிர்வாகத்தின் ஊழல்வாதிகள் அதிகம் உள்ளதால் இலங்கை கிரிக்கெட் அணி பாரிய பின்னடைவை சந்தித்து வருகின்றது.

எனவே, இதில் விளையாட்டு அமைச்சர் கூடிய கவனம் செலுத்தி கிரிக்கெட்டை முன்னேற்ற நடவடிக்கை மேற்கொள்ள வேண்டும். நான் தற்போது அரசியலில் இருந்து ஒதுங்கி உள்ளேன். தனக்கு அரசியலில் மீண்டும் பிரவேசிக்க வேண்டும் என்ற எண்ணம் வரும் போது அரசியலில் மீண்டும் நிச்சயம் பயணிப்பேன்.

நாட்டில் அடிக்கடி மின்சார தட்டுப்பாடு ஏற்பட்டு வருகின்றது. இதன் காரணமாக சீர் செய்யும் வகையில் எனது நிறுவனமான டெக்கோ டெக்னோலோஜி சோளார் கம்பனியை ஆரம்பித்து சோளார் இணைப்பை வழங்கி வருகின்றேன்.

உலகத்தில் உள்ள முதல்தர சோளார் நிறுவனத்திடம் சோளார் பெற்று இலங்கை மின்சார சபையினரின் அனுமதியுடன் சோளார் விநியோகம் செய்யப்பட்டு வருகின்றது. இலங்கையில் பல்வேறு மாவட்டங்களில் சோளார் விற்பனை நிலையங்களை திறந்து வைத்துள்ளேன்.

தற்போது மட்டக்களப்பு மாவட்டத்திலும் திறந்து வைக்கப்பட்டுள்ளது. இதன் மூலம் மக்கள் சோளார் இணைப்பை ஏற்படுத்தி தங்களுக்கான மின்சார பாவனையை பெற்றுக்கொள்வதுடன், மின்சார சபைக்கு மின்சாரத்தினை வழங்கி இலாபங்களை பெற்றுக்கொள்ள முடியும் என்றார்.

 

இலங்கையில் தினசரி கொரோனா வைரஸ் தொற்று நோயாளர் தொகை கிட்டத்தட்ட ஆயிரம் என்ற அளவுக்கு அதிகரித்துள்ள நிலையில் நாட்டில் உள்ள மருத்துவமனைகளில் அதி தீவிர சிகிச்சைப் பிரிவுகள் பெரும்பாலும் நிரம்பியுள்ளதாக ஆரம்ப சுகாதார, தொற்றுநோய்கள் மற்றும் கோவிட் 19 நோய்க் கட்டுப்பாட்டு அலுவல்கள் இராஜாங்க அமைச்சர் சுதர்ஷினி பெர்னாண்டோபுள்ளே தெரிவித்துள்ளார்.

இவ்வாறான நிலையில் அதி தீவிர சிகிச்சைப் பிரிவு படுக்கைகளின் எண்ணிக்கையை அதிகரிக்க நடவடிக்கை எடுக்கப்பட்டுள்ளது எனவும் அவா் கூறியுள்ளார்.

நாட்டில் கொவிட்19 வைரஸின் புதிய பிறழ்வு அடையாளம் காணப்பட்டுள்ள நிலையில், தொற்று நோய் வேகமாகப் பரவி வருகிறது. அத்துடன் புதிய பிறழ்வு வைரஸால் இளம் வயதினர் அதிகளவில் பாதிக்கப்படுகின்றனர். அதி தீவிர சிகிச்சைப் பிரிவில் அனுமதிக்கப்படும் இள வயதினர் எண்ணிக்கையும் அதிகரித்துள்ளது எனவும் கொவிட் 19 நோய்க் கட்டுப்பாட்டு அலுவல்கள் இராஜாங்க அமைச்சர் சுதர்ஷினி பெர்னாண்டோபுள்ளே குறிப்பிட்டார். எனினும், தொற்று நோய் ஆபத்தைத் தணித்து நிலைமையைக் கட்டுப்பாட்டுக்குள் கொண்டுவரத் தேவையான நடவடிக்கைகளை எடுத்து வருவதாகவும் அவா் தெரிவித்தார்.

இதேவேளையில், நேற்று (26) இதுவரையான காலப்பகுதியில் 892 பேருக்கு கொரோனா தொற்று உறுதி செய்யப்பட்டுள்ளது எனவும், அவர்களில் 45 பேர் வெளிநாடுகளில் இருந்து வருகை தந்தோர் என இராணுவத்தளபதி தெரிவித்துள்ளார்.

 

 

குருநாகல் மாவட்டம் கிரிபாவ பகுதியில் குளத்தில் மீன்பிடிப்பதற்காக விரிக்கப்பட்டிருந்த வலையில் நான்கு  மாத யானைக்குட்டியொன்று சிக்கியதை அவதானித்த அப்பகுதியியைச் சேர்ந்த ஒருவர், குறித்த யானை குட்டியை குளத்திலிருந்து உயிருடன் மீட்டு கிரிபாவ வனஜீவராசிகள் திணைக்களத்தினருக்கு தகவல் வழங்கியுள்ளார்.

இதனையடுத்து அப்பகுதிக்கு கிரிபாவ வனஜீவராசிகள் திணைக்களத்தினர்  சென்று மீட்கப்பட்ட யானையை நிகாவெரெட்டிய மிருக வைத்தியசாலையில் ஒப்படைத்துள்ளதாக வனஜீவராசிகள் திணைக்கள அதிகாரியொருவர் தெரிவித்தார்.

குறித்த யானை உடவல யானைகள் சரணாலயத்திற்கு கொண்டு செல்ல உள்ளதாக அவர் மேலும் தெரிவித்தார்.

 

Page 7 of 649
© 2021 All Rights Reserved by Asian Mirror Pvt Ltd