2026ஆம் ஆண்டின் முதல் காலாண்டிற்கான (ஜனவரி முதல் மார்ச் வரை) மின்சாரக் கட்டணத் திருத்தம் தொடர்பாக இலங்கை மின்சார சபை (CEB) தனது பரிந்துரைகளை இலங்கை பொதுப் பயன்பாடுகள் ஆணைக்குழுவிடம் (PUCSL) சமர்ப்பித்துள்ளது.

நிதி நிலைமை மற்றும் கட்டண உயர்வுக்கான காரணங்கள்:

• துண்டுவிழும் தொகை: 2026ஆம் ஆண்டின் முதல் மூன்று மாதங்களில் இலங்கை மின்சார சபைக்கு ரூ. 13,094 மில்லியன் நஷ்டம் (Deficit) ஏற்படும் என மதிப்பிடப்பட்டுள்ளது.
• வருவாய் மற்றும் செலவு: இந்தக் காலப்பகுதியில் மின்சார சபையின் மொத்தச் செலவு ரூ. 137,016 மில்லியன் ஆக இருக்கும் நிலையில், தற்போதைய கட்டணங்களின் கீழ் எதிர்பார்க்கப்படும் வருவாய் ரூ. 113,161 மில்லியன் மட்டுமே ஆகும்.
• சூறாவளி பாதிப்பு: “டிட்வா” (Ditwah) சூறாவளியினால் மின்சார சபையின் சொத்துக்களுக்கு சுமார் ரூ. 20 பில்லியன் சேதம் ஏற்பட்டுள்ளது. இதில் ரூ. 7,016 மில்லியன் செலவுகள் 2026 முதல் காலாண்டுக்கான மதிப்பீட்டில் சேர்க்கப்பட்டுள்ளன.
• தன்னார்வ ஓய்வுத் திட்டம் (VRS): மின்சார சபையின் 2,158 ஊழியர்களுக்கான தன்னார்வ ஓய்வுத் திட்டத்திற்காக மொத்தம் ரூ. 11,554 மில்லியன் தேவைப்படுகிறது. இதில் 2026 முதல் காலாண்டிற்கான தவணைப் பணம் ரூ.874.23 மில்லியன் ஆனது நிதிச் செலவில் உள்ளடக்கப்பட்டுள்ளது.
• பராமரிப்புப் பணிகள்: புதிய லக்ஷபான நீர்மின் நிலையம் மற்றும் நுரைச்சோலை லக்விஜய மின்நிலையத்தின் இரண்டாவது அலகு ஆகியவற்றில் மேற்கொள்ளப்படவுள்ள அத்தியாவசிய வருடாந்த பராமரிப்புப் பணிகளும் செலவு அதிகரிப்பிற்கு ஒரு காரணமாகக் கூறப்பட்டுள்ளது.

வீட்டுப் பாவனைக்கான புதிய கட்டண முன்மொழிவு:

மின்சார சபையின் முன்மொழிவின் படி, வீட்டுப் பாவனைக்கான அலகு ஒன்றின் விலை மற்றும் நிலையான கட்டணங்களில் ஏற்படவுள்ள மாற்றங்கள் பின்வருமாறு (அடைப்புக்குறிக்குள் தற்போதைய விலை):

• 0-30 அலகுகள்: ஒரு அலகின் விலை ரூ. 5.29 (4.50) நிலையான கட்டணம் ரூ. 94.11 (80).
• 31-60 அலகுகள்: ஒரு அலகின் விலை ரூ. 9.41 (8.00). நிலையான கட்டணம் ரூ. 247.03 (210),.
• 61-90 அலகுகள்: ஒரு அலகின் விலை ரூ. 21.76 (18.50). நிலையான கட்டணம் ரூ. 470.54 (400),.
• 91-120 அலகுகள்: ஒரு அலகின் விலை ரூ. 28.23 (24.00). நிலையான கட்டணம் ரூ. 1,176.35 (1,000),.
• 121-180 அலகுகள்: ஒரு அலகின் விலை ரூ. 48.23 (41.00). நிலையான கட்டணம் ரூ. 1,764.53 (1,500),.
• 180 அலகுகளுக்கு மேல்: ஒரு அலகின் விலை ரூ. 71.76 (61.00). நிலையான கட்டணம் ரூ. 2,470.34 (2,100),.

சர்வதேச நாணய நிதியத்தின் (IMF) கணிப்பின்படி, 2026ஆம் ஆண்டில் இலங்கையின் மொத்த உள்நாட்டு உற்பத்தி வளர்ச்சி 3.1% ஆக இருக்கும் எனக் கருதப்படுகிறது. மேலும், இந்தக் கட்டணத் திருத்த முன்மொழிவுக்காக அமெரிக்க டொலர் ஒன்றின் பெறுமதி ரூ. 308.65 என மதிப்பிடப்பட்டுள்ளது.

இந்த முன்மொழிவு பொதுப் பயன்பாடுகள் ஆணைக்குழுவினால் பரிசீலிக்கப்பட்டு, பொதுமக்களின் கருத்துக்கள் கேட்கப்பட்ட பின்னரே இறுதித் தீர்மானம் எடுக்கப்படும்.