சேவையாளர் ஊழியர் நல நிதி (EPF) தொகையை ஒரே முறையாக பெற்றுக்கொள்வதற்குப் பதிலாக, தனியார் துறை ஊழியர்களுக்கு ஓய்வூதியம் வழங்கும் முறையை அறிமுகப்படுத்துவது குறித்து அரசு கவனம் செலுத்தி வருவதாக தெரிவிக்கப்பட்டுள்ளது.

இதனை தொழில் பிரதி அமைச்சர் மகிந்த ஜயசிங்க  பாராளுமன்றத்தில் தெரிவித்தார்.

ஓய்வு பெற்ற பின்பு ஊழியர்களின் சமூக பாதுகாப்பை உறுதிப்படுத்தும் நோக்கில் சேவையாளர் ஊழியர் நல நிதி அறிமுகப்படுத்தப்பட்டது.

எனினும், தனியார் துறை ஊழியர்கள் தங்களின் EPF தொகையை ஒரே தடவையில் பெற்றுக்கொள்ளும் போது, ஓய்வுக்குப் பிந்தைய காலத்திற்கான சமூக பாதுகாப்பு ஆபத்துக்குள்ளாகும் நிலை உருவாகுகிறது.

இதன் காரணமாக, தனியார் துறை ஊழியர்கள் ஓய்வு பெற்ற பின்பு முழு வாழ்க்கைக்காலத்திற்கும் ஓய்வூதியம் பெறக்கூடிய வகையில், ஓய்வூதியத் திட்டம் போன்ற ஒரு முறையை அறிமுகப்படுத்துவது குறித்து அரசு கவனம் செலுத்தி வருவதாக அவர் கூறினார்.

இதனிடையே, EPF பங்களிப்புத் தொகைகளை சரியாக செலுத்தாத நிறுவனங்களுக்கு எதிராக நடவடிக்கைகள் கடுமைப்படுத்தப்பட்டுள்ளதாக தொழில் அமைச்சகம் அறிவித்துள்ளது. இதன்படி, தொழிலாளர் துறையின் அதிகாரப்பூர்வ இணையதளம் மூலமாக ஊழியர்கள் தங்களின் புகார்களை நேரடியாக பதிவு செய்யும் வசதி தற்போது ஏற்படுத்தப்பட்டுள்ளதாகவும் தெரிவிக்கப்பட்டுள்ளது.