வரும் நாட்களில் மழைப்பொழிவு அதிகரிக்கும் என எதிர்பார்க்கப்படுவதாகவும், இன்று (11) குறைந்த காற்றழுத்த மண்டலம் ஒன்று உருவாகக்கூடும் என்றும் வானிலை ஆய்வு திணைக்களம் தெரிவித்துள்ளது.

தற்போதைய நிலை தென்மேற்கு பருவமழைக்கு முந்தைய காலநிலை நிலவரமாக இருப்பதாகவும், பருவமழை காலநிலை மே 20ஆம் திகதி அளவில் உருவாகும் வாய்ப்பு உள்ளதால் அதன் மூலம் மேலும் காலநிலை மாற்றங்கள் ஏற்படக்கூடும் என்றும் செயற்பாட்டு வானிலை ஆய்வாளர் மாலித் பெர்னாண்டோ தெரிவித்துள்ளார்.

தேசிய கட்டிட ஆராய்ச்சி நிறுவனம் எச்சரிக்கை விடுத்துள்ளதாவது, ‘டிட்வா’ புயலால் பாதிக்கப்பட்ட பகுதிகள் இன்னும் நிலைகுலைந்த நிலையில் உள்ளன. தளர்ந்த கற்கள் மற்றும் மண் காரணமாக லேசான மழை பெய்தாலும் கூட மண்சரிவு அபாயம் அதிகரிக்கலாம் என தெரிவித்துள்ளது.

மூத்த புவியியல் நிபுணர் வசந்த சேனாதீர கூறுகையில், இதற்கு முன்பு செயலற்ற நிலையில் இருந்த பகுதிகளும் மீண்டும் செயல்படக்கூடும் என்றும், பதுளை மற்றும் மொனராகலை மாவட்டங்களின் சில பகுதிகளுக்கு முதலாம் கட்ட மண்சரிவு எச்சரிக்கை விடுக்கப்பட்டுள்ளதாகவும் தெரிவித்தார்.

நீர்ப்பாசன திணைக்களம் தெரிவித்ததாவது, தற்போது 9 முக்கிய நீர்த்தேக்கங்களும் 5 நடுத்தர அளவிலான நீர்த்தேக்கங்களும் நீரை வெளியேற்றி வருகின்றன. களனி, களு, வளவே மற்றும் தெதுறு ஓயா உள்ளிட்ட நதிகளின் நீர்மட்டம் சற்று உயர்ந்துள்ளதாலும், அவை இன்னும் அபாய நிலையை எட்டவில்லை என்றும், எனினும் அருகிலுள்ள பகுதிகளில் வாழும் மக்கள் அவதானமாக இருக்க வேண்டும் என்றும் பிரதம பொறியியலாளர் சாமர யாப்பா ஆராச்சி தெரிவித்துள்ளார்.

அதேவேளை, அனர்த்த முகாமைத்துவ மையம் நாட்டின் 25 மாவட்டங்களிலும் நிலைமையை நெருக்கமாக கண்காணித்து வருவதாக தெரிவித்துள்ளது.

நதிக்கரைகள் மற்றும் மண்சரிவு அபாயம் உள்ள பகுதிகளில் வாழும் மக்கள் மிகுந்த எச்சரிக்கையுடன் இருக்க வேண்டும் என்றும், அவசர நிலை ஏற்பட்டால் 117 என்ற அவசர தொலைபேசி இலக்கத்தை தொடர்புகொள்ளுமாறும் அதன் பணிப்பாளர் பிரதீப் கொடிப்பிலி கேட்டுக்கொண்டுள்ளார்.