காலநிலை மாற்றச் செயலகத்தின் பணிப்பாளர் லீல் ரந்தெனிய தெரிவிக்கையில், உலகளாவிய El Niño நிகழ்வினால் இலங்கை கடுமையாக பாதிக்கப்படுவதற்கான சாத்தியம் தற்போது மிகவும் குறைவாக இருப்பதாக கூறினார்.

வானிலை முன்னறிவிப்புகளின்படி, வெப்பமண்டல பசிபிக் பெருங்கடல் பகுதியில் வெப்பநிலை அதிகரிப்பதால் ஏற்படும் குறிப்பிடத்தக்க தாக்கங்கள் அடுத்த ஆண்டு பிப்ரவரி மாதத்திற்குப் பின்னரே தென்படக்கூடும் என அவர் தெரிவித்தார்.

தென்மேற்கு பருவமழை தற்போது தொடர்ந்து பெய்து வருவதுடன், அது செப்டம்பர் மாதம் வரை நீடிக்கும் என்றும், ஜூலை மற்றும் ஆகஸ்ட் மாதங்களில் மழையின் மொத்த தீவிரம் குறைவடைந்து இடைக்கிடையே மட்டுமே மழை பெய்யும் என எதிர்பார்க்கப்படுவதாகவும் அவர் கூறினார்.

மேலும், அக்டோபர் மற்றும் நவம்பர் மாதங்களில் இரண்டாவது இடைமழைக் காலம் எதிர்பார்க்கப்படுவதாகவும், அதன் பின்னர் வடகிழக்கு பருவமழை பிப்ரவரி மாதம் வரை நீடிக்கும் என்றும் தெரிவித்தார். முதல் இடைமழைக் காலம் மார்ச் மற்றும் ஏப்ரல் மாதங்களில் ஆரம்பமாகும் என்றும் அவர் குறிப்பிட்டார்.

எல் நினோ நிலைமைகள் மேலும் வலுப்பெற்றால், அவை தென்மேற்கு பருவமழையையோ இடைமழையையோ விட வடகிழக்கு பருவமழைக்கு அதிக தாக்கத்தை ஏற்படுத்தும் வாய்ப்பு உள்ளதாக ரந்தெனிய விளக்கமளித்தார்.

இருப்பினும், இலங்கையின் புவியியல் அமைவிடம் காற்றின் ஈரப்பதத்தை பராமரிக்க உதவுவதால், கடுமையான வறட்சி நிலை உருவாகும் அபாயம் குறைவாக இருப்பதாகவும் அவர் வலியுறுத்தினார்.