தெறி, மெர்சல் படங்களுக்குப் பிறகு இயக்குநர் அட்லியும் நடிகர் விஜய்யும் இணைந்திருக்கும் மூன்றாவது படம் இது. ட்ரெய்லர், போஸ்டர்களில் இருந்து பலரும் யூகித்ததைப்போல விளையாட்டை அடிப்படையாகக் கொண்ட படம்தான்.
மைக்கல் (விஜய்) ஒரு லோக்கல் ரவுடி. அமைச்சரையே அலற வைப்பார். அவருடைய நண்பரான கதிர் (கதிர்) ஒரு கால்பந்தாட்ட கோச். கதிரும், மைக்கலும் ஒன்றாக சென்று கொண்டிருக்கும்போது நடக்கும் ஒரு தாக்குதலில் கதிர் படுகாயமடைகிறார். அதனால், அவர் கோச்சாக இருந்து வழிநடத்த வேண்டிய ஒரு கால்பந்தாட்ட அணிக்கு மைக்கல் கோச்சாகிறார். ஒரு ரவுடி எப்படி கோச்சாக முடியும் என்ற கேள்வி எழுகிறதல்லவா? அதற்குத்தான் ஒரு பெரிய ஃப்ளாஷ் பேக்.
அந்த ஃப்ளாஷ் பேக் முடிந்த பிறகு, வழக்கம்போல மைக்கலின் அணியில் இருப்பவர்கள் மைக்கலை ஏற்க மறுக்கிறார்கள், மைக்கல் அவர்களது நம்பிக்கையைப் பெறுகிறார், பிறகு பந்தயத்தில் வெல்கிறார். இதற்கு நடுவில் வில்லன்களையும் சமாளிக்கிறார்.
விஜய் நடித்த படங்களில் சமீப காலத்தில் எந்தப் படமும் இவ்வளவு பெரிய எதிர்பார்ப்பை ஏற்படுத்தியதில்லை. இந்தப் படம் குறித்த சின்னச் சின்ன அப்டேட்களுக்குக்கூட ரசிகர்கள் பெரிதும் காத்துக்கிடந்தார்கள். அவ்வளவு பெரிய எதிர்பார்ப்பை இந்தப் படம் பூர்த்தி செய்திருக்கிறதா என்றால் 'ம்ஹூம்' என்பதுதான் பதில்.
