– எஸ்.எம். மரிக்கார்
ஜனநாயகம் மற்றும் சட்டத்தின் ஆட்சி தொடர்பாக நிலவும் பிரச்சினைகள் காரணமாகவே முதலீட்டாளர்கள் இலங்கைக்கு வருவதற்கு தயக்கம் காட்டுவதாக நாடாளுமன்ற உறுப்பினர் எஸ்.எம். மரிக்கார் தெரிவித்துள்ளார்.
வேறொரு நாட்டில் முதலீடு செய்யும்போது, அந்நாட்டில் ஜனநாயகம் நிலவும் விதம் மற்றும் சட்டம் நடைமுறைப்படுத்தப்படும் விதம் குறித்து முதலீட்டாளர்கள் கவனம் செலுத்துவதாகவும் அவர் சுட்டிக்காட்டியுள்ளார்.
அத்துடன், துறைமுக நகரில் இரண்டு உள்நாட்டு நிறுவனங்கள் ஊடாக 500 மில்லியன் அமெரிக்க டொலர் முதலீடுகள் காணப்படுவதாக முன்வைக்கப்படும் கூற்றுகள் குறித்தும் மரிக்கார் கேள்வி எழுப்பியுள்ளார்.
சீனாவிலிருந்து துறைமுகத்திற்கு கிடைத்த 320 மில்லியன் அமெரிக்க டொலர் முதலீடு மீளப் பெறப்பட்டுள்ளதாகவும் அவர் குறிப்பிட்டுள்ளார்.
நிலக்கரி தொடர்பான நட்டங்கள், 323 கொள்கலன்கள் தொடர்பான சம்பவம், முதலீடுகள் மீளப் பெறப்படுதல் மற்றும் புதிய முதலீடுகள் நாட்டிற்கு வராமை உள்ளிட்ட பல்வேறு விடயங்களைச் சுட்டிக்காட்டிய அவர், நாட்டில் ஏற்பட்டிருப்பது மாற்றமல்ல, அழிவே எனத் தெரிவித்துள்ளார்.
மேலும், புதிய சட்டத்தின் கீழ் ஊடகவியலாளர்கள் தமது பேனா மற்றும் ஒளிப்படக் கருவியைப் பாதுகாத்துக்கொள்ள வேண்டிய பொறுப்பும் அவர்களுக்கு இருப்பதாக மரிக்கார் தெரிவித்துள்ளார்.
குறித்த சட்டத்திற்கு எதிராகக் குரல் எழுப்பி தமது எதிர்ப்பை வெளிப்படுத்த வேண்டிய பொறுப்பு ஊடகவியலாளர்களுக்கு இருப்பதாகவும் அவர் வலியுறுத்தியுள்ளார்.
