– அமைச்சர் லால் காந்த
நாட்டின் சட்டம் எவ்வித வேறுபாடுமின்றி அனைவருக்கும் சமமாக நடைமுறைப்படுத்தப்படுவதை உறுதிப்படுத்த தற்போதைய அரசாங்கம் கடமைப்பட்டுள்ளதாகவும், சமூக ஊடகங்கள் ஊடாக எவ்வளவு கடுமையான அவதூறுகளும் கேலிகளும் முன்வைக்கப்பட்டாலும், மக்கள் ஆணையின் மூலம் வழங்கப்பட்ட வாக்குறுதிகளை நிறைவேற்றும் பயணத்தை ஒருபோதும் நிறுத்தப்போவதில்லை என்றும் விவசாயம், கால்நடை வளங்கள், காணி மற்றும் நீர்ப்பாசன அமைச்சர் கே.டி. லால் காந்த தெரிவித்துள்ளார்.
விவசாயத் திணைக்களத்தில் நீண்டகாலமாக தற்காலிக மற்றும் பதிலீட்டுப் பணியாளர்களாகப் பணியாற்றியவர்களில் ஒரு குழுவினருக்கு நிரந்தர நியமனங்கள் வழங்கும் நிகழ்வில் கலந்துகொண்ட பின்னர் ஊடகங்களுக்குக் கருத்துத் தெரிவிக்கும்போதே அமைச்சர் இதனைத் தெரிவித்துள்ளார்.
மல்வத்து மற்றும் அஸ்கிரிய பீடங்களின் மகாநாயக்க தேரர்களால் முன்வைக்கப்பட்ட விசேட அறிக்கை தொடர்பாக ஊடகவியலாளர்கள் எழுப்பிய கேள்விக்குப் பதிலளித்த அமைச்சர், குறித்த கடிதத்தை அனைத்துத் தரப்பினரும் நன்கு வாசித்துப் புரிந்துகொள்ள வேண்டும் எனக் குறிப்பிட்டார்.
நாட்டில் நடைமுறையிலுள்ள சட்டத்தை தனிநபர்களின் அந்தஸ்துக்கு ஏற்ப நடைமுறைப்படுத்த முடியாது எனத் தெரிவித்த அவர், சட்டத்தை அனைவருக்கும் சமமாகவும் நியாயமாகவும் நடைமுறைப்படுத்துவதற்காக மக்கள் வழங்கிய ஆணைக்கு முரணாக எந்தவொரு கோரிக்கையையும் முன்வைக்க வேண்டாம் என அனைத்துத் தரப்பினரிடமும் கேட்டுக்கொண்டார்.
பயங்கரவாதத் தடுப்பு தொடர்பான புதிய சட்டமூலம் குறித்து எதிர்க்கட்சிகளும் பல்வேறு தரப்பினரும் முன்வைக்கும் விமர்சனங்கள் தொடர்பில் கருத்துத் தெரிவித்த அமைச்சர், ஜனநாயக நாட்டில் எந்தவொரு சட்டமூலத்திற்கும் எதிர்ப்புத் தெரிவிக்கவும், மனுக்களைச் சமர்ப்பிக்கவும், தமது கருத்துக்களை வெளிப்படுத்தவும் மக்களுக்கு முழுமையான உரிமை இருப்பதாகக் கூறினார்.
அரசாங்கம் ஒருபோதும் மக்களின் கருத்துக்களைப் புறக்கணித்துச் செயற்படாது எனத் தெரிவித்த அவர், தற்போதைய அரசாங்கம் ஆட்சிக்கு வந்ததே ஜனநாயகத்தை வலுப்படுத்துவதற்காகவே என்றும் குறிப்பிட்டார்.
ஜனாதிபதியின் விருப்பத்தின் அடிப்படையில் கைதிகளுக்கு மன்னிப்பு வழங்கும் நடைமுறைகூட ஜனநாயகத்திற்கு முரணானது என்பதால், அதனை நீக்குவது அல்லது திருத்துவது குறித்து அரசாங்கம் கவனம் செலுத்தி வருவதாகவும் அவர் தெரிவித்தார்.
அரசாங்கத்திற்கு எதிராக முன்வைக்கப்படும் விமர்சனங்கள் மற்றும் சமூக ஊடகத் தாக்குதல்கள் தொடர்பில் அமைச்சர் மேலும் தெரிவிக்கையில்:
“இன்று எம்மை எவ்வளவு திட்டுகிறார்கள், எவ்வளவு மோசமான வார்த்தைகளால் அவதூறு செய்கிறார்கள், பேஸ்புக்கில் எவ்வளவு தாக்குதல்களை நடத்துகிறார்கள் என்பதைப் பாருங்கள். ஆனால், அவற்றில் எதையும் காதில் வாங்கிக்கொள்ளாதது போன்று எமது கொள்கை ரீதியான பணிகளைத் தொடர்ந்து முன்னெடுத்து வருகிறோம். பல்வேறு யூடியூப் அலைவரிசைகள் அல்லது தனிநபர்கள் கூறும் விடயங்களுக்குப் பின்னால் ஓடுவதற்கு எமக்கு நேரமில்லை. மக்களுக்கு வழங்கிய வாக்குறுதிகளை நிறைவேற்றுவதே எமது ஒரே நோக்கமாகும்.” என அவர் தெரிவித்தார்.
இதற்கிடையில், விவசாயத் திணைக்களத்திற்குச் சொந்தமான பண்ணைகளில் 10 முதல் 13 ஆண்டுகள் வரை மிகவும் கடினமான சூழ்நிலைகளின் கீழ் பணியாற்றிய, 50 வயதைக் கடந்த பணியாளர்கள் குழுவினரை நிரந்தர சேவையில் இணைத்துக்கொள்ள முடிந்தமை மிகுந்த மகிழ்ச்சியளிப்பதாக அமைச்சர் குறிப்பிட்டார்.
அரச சேவையில் நிலவும் வெற்றிடங்களைப் படிப்படியாக நிரப்புவதுடன், அரச ஊழியர்களின் சம்பளம் மற்றும் கொடுப்பனவுகளை அதிகரித்து வலுவான அரச சேவையை உருவாக்குவதே அரசாங்கத்தின் பிரதான இலக்காகும் என்றும் அமைச்சர் மேலும் வலியுறுத்தினார்.
