"அரசமைப்பு விவகாரத்தில் தம்மிடமுள்ள அறுதிப் பெரும்பான்மையை வைத்துக் கொண்டு தாம் விரும்பியதை எங்களிடம் திணிக்க ஆட்சியாளர்கள் முயற்சிக்கின்றார்கள். அரசு கொண்டுவர யோசிக்கின்ற ஒற்றையாட்சி அரசமைப்பை நாங்கள் முதற்கட்டமாக எதிர்ப்பதற்கு எங்களிடத்தில் நாடாளுமன்றத்தில் அறுதிப் பெரும்பான்மையைக் காட்ட வேண்டும். அதற்கான நடவடிக்கைகளையே முன்னெடுக்கின்றோம்."

- இவ்வாறு தமிழ்த் தேசிய மக்கள் முன்னணியின் தலைவரும் நாடாளுமன்ற உறுப்பினருமான கஜேந்திரகுமார் பொன்னம்பலம் தெரிவித்தார்.

இலங்கைத் தமிழரசுக் கட்சியின் பதில் தலைவர் சி.வி.கே.சிவஞானத்தை யாழ். கல்வியங்காட்டில் உள்ள அவரது அலுவலகத்தில் நேற்று மாலை சந்தித்துக் கலந்துரையாடிய பின்னர் ஊடகங்களுக்குக் கருத்துத் தெரிவித்தபோதே கஜேந்திரகுமார் பொன்னம்பலம் எம்.பி. மேற்கண்டவாறு கூறினார்.

அவர் மேலும் தெரிவிக்கையில்,

"நானே சிவஞானம் அண்ணனிடம் சந்திப்புக்கு நேரம் கேட்டிருந்தேன். அதற்குக் காரணம் ஏற்கனவே பல தடவைகள் கூறியிருக்கின்றேன்.

நாடாளுமன்றத்தில் 19 தமிழ் நாடாளுமன்ற உறுப்பினர்கள் வடக்கு, கிழக்கைப் பிரதிநிதித்துவப்படுத்தி இருக்கின்றார்கள்.

எந்தவொரு கட்சிக்கும் அறுதிப் பெரும்பான்மை இல்லை. அப்படிப்பட்ட நிலையில் அரசு தமக்குத் தான் பெரும்பான்மை இருப்பதாகவும், மக்கள் தங்களுக்கு ஆணையை வழங்கியுள்ளதாகவும் என்ற தோற்றப்பாட்டை உருவாக்கித் திட்டமிட்டக் கருத்துருவாக்கத்தைச் செய்கின்றனர்.

யதார்த்தம் அப்படியல்ல. மாறாக இம்முறை தேர்தலில் தமிழ் மக்கள் தமிழ் தேசியக் கட்சிகளுக்கு அமோக ஆணையை வழங்கி இருக்கின்றார்கள்.

அரசு கொண்டுவர யோசிக்கின்ற ஒற்றையாட்சி அரசமைப்பை நாங்கள் முதற்கட்டமாக எதிர்ப்பதற்கு எங்களுக்கிடையில் அறுதிப் பெரும்பான்மையைக் காட்டவேண்டும்.

தமிழரசுக் கட்சிக்கு எட்டு ஆசனங்கள் இருக்கின்றன. 19 பேர் என்றால் இன்னும் இரண்டாக அதிகரித்தால் மட்டுமே அறுதிப் பெரும்பான்மையை உறுதிப்படுத்தலாம். தமிழ்த் தேசிய மக்கள் முன்னணிக்கு ஒன்று, ஜனநாயகத் தமிழ்த் தேசியக் கூட்டணிக்கு ஒன்று என அந்த மூன்று தரப்புகளும் ஒரு புள்ளியில் சந்தித்தால் அறுதிப் பெரும்பான்மையாகக் காட்டலாம்.

தமிழ் மக்களுடைய ஆணை பெற்ற தரப்புகள் எப்படி நாங்கள் எங்கள் மக்களுடைய அரசியல் அபிலாஷைகளைப் பூர்த்தி செய்யக் கூடிய வகையில் ஒரு புள்ளி சந்திக்கின்றது என்ற வகையில் பேசுகின்றோம். அந்தக் கோணத்தில் மூன்று தரப்புகளும் ஒன்றாக சேரவேண்டும் என்ற அடிப்படையில் ஒரு யோசனை இருந்தது.

நாடாளுமன்றத் தேர்தல் முடிவடைந்த கையோடு தமிழரசுக் கட்சியின் தலைவர் பதவி சம்பந்தமாகக் கேள்வி வந்தது. நாடாளுமன்றக் குழு அந்தக் கட்சியால் நியமிக்கப்பட்ட வகையில் நாடாளுமன்றக் குழுத் தலைவர் என்ற வகையில் சிறீதரனோடு தொடர்பு கொண்டேன்.

ஆனால், அந்த அமைப்பில் முடிவெடுக்கும் அதிகாரம் தலைமைப் பதவியில் உள்ள சிவஞானம் அண்ணைக்கும், செயலாளர் வைத்தியர் சத்தியலிங்கத்துக்கும் வழங்கி இருப்பதாகத் தெரிவிக்கப்பட்டது.

அந்த இடத்தில் சிவஞானம் அண்ணன் ஒரு பேட்டியில், உத்தியோகபூர்வமாக தலைவர் அல்லது செயலாளருக்கு அழைப்பிதழ் வரவில்லை. அழைப்பு வந்தால் பரிசீலிக்கத் தயார் என்று சொல்லப்பட்ட இடத்தில் நாங்கள் அவருடன் நேரத்தைக் கேட்டு இன்று இந்த விடயத்தை அவரிடம் பகிர்ந்து இருக்கின்றோம்.

தங்கள் கட்சியிடம் விடயத்தைப் பேசி அடுத்த கட்டமாக ஒரு முடிவை அறிவிப்பதாகச் சிவஞானம் அண்ணன் சொல்லி இருக்கின்றார். நாங்கள் அந்தச் சந்திப்பை விரைவாக மேற்கொள்கின்ற அவசியத்தை அவருக்கு தெளிவுபடுத்தி இருக்கின்றோம். அந்தவகையிலான எதிர்பார்ப்புடன் தமிழரசுக் கட்சி நல்ல முடிவை அறிவிக்கும் என்று எதிர்பார்ப்பில் இருக்கின்றோம்.

அரசினுடைய போக்கை நாடாளுமன்றத்தில் நடந்து கொள்கின்ற விதத்தைப் பார்க்கும்போது தெரிந்துகொள்ள முடிகின்றது. மூன்றில் இரண்டு பெரும்பான்மைப் பலத்தை வைத்துக்கொண்டு ஒருதலைப்பட்சமாகவே நடந்து கொள்ளுகின்றார்கள்.

எண்ணிக்கையை வைத்துக் கொண்டு எதையும் சாதிக்கலாம் என்ற நம்பிக்கை இருக்கும்போது நாடாளுமன்ற சம்பிரதாயத்தை மீறி சில விடயங்களை அரச தரப்பினர் செய்கின்றார்கள்.

தமிழ் அரசியல் தலைவர்கள் என்ற வகையில் மக்களை வழிநடத்தும் பொறுப்பு எங்களிடம் இருக்கின்றது. அதில் நாங்கள் தவறக்கூடாது.

அந்த அடிப்படையில் அவசரமாக எங்களிடத்திலேயே நாடாளுமன்றத்தில் அறுதிப் பெரும்பான்மையைக் காட்டி தவறான விடயத்தைத் தடுப்பதற்கான ஒரு புரிந்துணர்வை ஏற்படுத்த வேண்டும்." - என்றார்.

மன்னார் அருகே இலங்கை கடற்பகுதியில் இலங்கை கடல் எல்லைக்குள் அத்துமீறி மீன்பிடித்த 33 இந்திய மீனவர்களை இலங்கை கடற்படையினர் கைது செய்துள்ளனர்.

இதன்போது மூன்று இந்திய மீன்பிடி படகுகளும் பறிமுதல் செய்யப்பட்டுள்ளன.

தேர்தல் தொடர்பான வழக்குகளுக்காக தனியான நீதிமன்ற கட்டமைப்பை கோரியுள்ளதாக தேர்தல்கள்  ஆணையாளர் நாயகம் சமன் ஸ்ரீ ரத்நாயக்க தெரிவிக்கிறார்.

வழக்கு தாக்கல் செய்யும் நடவடிக்கைகளை இதன்மூலம் இலகுபடுத்த முடியும் என அவர் குறிப்பிட்டார்.

வழக்கு தாக்கல் செய்யும் அதிகாரம் தற்போது தேர்தல்கள் ஆணைக்குழுவுக்கு இல்லை என அவர் கூறினார்.

தொழில் திணைக்களம், வனப்பாதுகாப்பு திணைக்களம் போன்றவற்றுக்கு இருப்பதைப் போல தேர்தல் ஆணைக்குழு அதிகாரிகளுக்கும் வழக்குத் தாக்க செய்யும் அதிகாரம் வழங்கப்பட வேண்டும் என தேர்தல்கள்  ஆணையாளர் நாயகம் சமன் ஸ்ரீ ரத்நாயக்க வலியுறுத்தினார்.

தேர்தலொன்றின் போது இழைக்கப்படும் குற்றம் தொடர்பாக அடுத்த தேர்தலுக்கு முன்னரேனும் தண்டனை வழங்கப்படாத பட்சத்தில் மக்கள் நம்பிக்கை இழப்பர் என அவர் சுட்டிக்காட்டினார்.

இதன் காரணமாக தொழில் நீதிமன்றத்தைப் போன்று  நீதிமன்ற கட்டமைப்பிற்குள் தேர்தல் வழக்குகளை கையாள்வதற்கான பிரத்தியேக இடம் வழங்கப்படுமாயின் சிக்கல்களை தீர்க்க முடியும் என தேர்தல்கள்  ஆணையாளர் நாயகம் மேலும் கூறினார். 

எதிர்காலத்தில் சிறு மற்றும் நடுத்தர தொழில்முனைவோருக்கு பிணை இல்லாத கடன் திட்டத்தை அறிமுகப்படுத்த எதிர்பார்ப்பதாக பிரதி அமைச்சர் சதுரங்க அபேசிங்க கூறுகிறார்.

இது தொடர்பான கலந்துரையாடல்கள் தற்போது வெற்றிகரமாக நடைபெற்று வருவதாக கொழும்பில் நடைபெற்ற விழாவில் அவர் தெரிவித்தார்.

வங்கிக் கடன்களால் சரிந்துள்ள சிறு, குறு மற்றும் நடுத்தர வணிகங்கள் மற்றும் தொழிலதிபர்களைப் பாதுகாக்க அரசு வங்கிகள் மூலம் நிவாரணம் வழங்க நம்புவதாகவும் அவர் கூறுகிறார்.

இருப்பினும், மத்திய வங்கி ஆளுநர் நந்தலால் வீரசிங்க சமீபத்தில் இந்தக் கடன் திட்டம் குறித்து தனது கருத்துக்களை பின்வருமாறு தெரிவித்தார்.

"நீங்கள் பிணையம் இல்லாமல் கடன் கொடுக்கும்போது, ​​யாராவது ஒருவர் பிணையத்திற்கு உத்தரவாதம் அளிக்க வேண்டும்." அரசாங்கம் அந்த உத்தரவாதத்தை வழங்கத் தயாராக இருந்தால், அதை வழங்க முடியும். பின்னர் கடனைத் திருப்பிச் செலுத்தவில்லை என்றால், வரி செலுத்துவோரின் பணத்தில் அரசாங்கம் கடனை அடைக்கும் என்று அரசாங்கம் உத்தரவாதம் அளிக்கிறது. "வரி செலுத்துவோராக, யாராவது செலுத்தாத கடனை நீங்கள் தீர்க்க விரும்பினால், நீங்கள் அவ்வாறு செய்யலாம்." 

கைது செய்யப்பட்ட யோஷித ராஜபக்ஷ விளக்கமறியலில் வைக்கப்பட்டுள்ளார்.

அவரை வரும் 27 ஆம் திகதி வரை விளக்கமறியலில் வைக்குமாறு புதுக்கடை  எண் 5 மேலதிக நீதவான் பவித்ரா சஞ்சீவனி உத்தரவிட்டுள்ளார்.

முன்னாள் ஜனாதிபதி மஹிந்த ராஜபக்ஷவின் மகன் யோஷித ராஜபக்ஷ குற்றப் புலனாய்வுத் துறையினரால் (CID) கைது செய்யப்பட்டார்.

யோஷித இன்று (25) காலை பெலியத்த பகுதியில் கைது செய்யப்பட்டதாக பொலிஸ் செய்தித் தொடர்பாளர் SSP புத்திக மனதுங்க தெரிவித்தார்.

பணமோசடிச் சட்டத்தின் கீழ் ராஜபக்ச கைது செய்யப்பட்டதாக அவர் கூறினார்.

பணமோசடிச் சட்டத்தின் கீழ் யோஷித ராஜபக்ஷ குற்றம் செய்துள்ளார் என்பதை நிரூபிக்க போதுமான ஆதாரங்கள் இருப்பதாக சட்டமா அதிபர் CID க்கு அறிவுறுத்தினார். 

ஊவா மற்றும் தென் மாகாணங்களிலும் அம்பாறை, மட்டக்களப்பு, மாத்தளை மற்றும் நுவரெலியா மாவட்டங்களிலும் அவ்வப்போது மழையோ அல்லது இடியுடன் கூடிய மழையோ பெய்யக் கூடிய சாத்தியம் காணப்படுவதாக வளிமண்டலவியல் திணைக்களம் எதிர்வு கூறியுள்ளது.

வடக்கு மற்றும் வடமத்திய மாகாணங்களிலும் திருகோணமலை மாவட்டத்திலும் பல தடவைகள் மழை பெய்யும் என எதிர்பார்க்கப்படுகின்றது.

நாட்டின் ஏனைய பிரதேசங்களில் பல இடங்களில் மாலையில் அல்லது இரவில் மழையோ அல்லது இடியுடன் கூடிய மழையோ பெய்யக் கூடிய சாத்தியம் காணப்படுகின்றது.

ஊவா, சப்ரகமுவ மற்றும் தென் மாகாணங்களிலும் அம்பாறை, மட்டக்களப்பு மற்றும் மாத்தளை மாவட்டங்களிலும் சில இடங்களில் 75 மி.மீ அளவான ஓரளவு பலத்த மழைவீழ்ச்சி எதிர்பார்க்கப்படுகின்றது.

மத்திய மலைநாட்டின் கிழக்கு சரிவுப் பகுதிகளிலும் வடக்கு, வடமத்திய மற்றும் வடமேல் மாகாணங்களிலும் மாத்தளை மற்றும் ஹம்பாந்தோட்டை மாவட்டங்களிலும் அவ்வப்போது மணித்தியாலத்துக்கு 30-40 கிலோ மீற்றர் வரையான வேகத்தில் ஓரளவு பலத்த காற்று வீசக் கூடும் என எதிர்பார்க்கப்படுகின்றது.

இடியுடன் கூடிய மழை பெய்யும் வேளைகளில் அப் பிரதேசங்களில் தற்காலிகமாக பலத்த காற்றும் வீசக்கூடும். மின்னல் தாக்கங்களினால் ஏற்படக்கூடிய பாதிப்புகளை குறைத்துக்கொள்ள தேவையான முன்னெச்சரிக்கை நடவடிக்கைகளை எடுத்துக் கொள்ளுமாறு பொதுமக்கள் அறிவுறுத்தப்படுகின்றார்கள்.