போக்குவரத்து, நெடுஞ்சாலைகள் மற்றும் நகர அபிவிருத்தி அமைச்சர் பிமல் ரத்நாயக்க நேற்று (18) வெரஹெரவில் அமைந்துள்ள மோட்டார் வாகனப் போக்குவரத்து திணைக்கள அலுவலகத்தில் ஆய்வு விஜயம் மேற்கொண்டார்.

அந்த சந்தர்ப்பத்தில், நிலவும் நெரிசலைக் குறைத்தல், சேவைகளை அதிக செயல்திறனுடன் மாற்றுதல் மற்றும் அமைப்புகளை நவீனமயப்படுத்துதல் என்ற நோக்கில், அமைச்சர் 8 முக்கிய தீர்மானங்களை அறிவித்தார்.

அதன்படி, வெரஹெர அலுவலகத்தில் காணப்படும் நெரிசலைக் கட்டுப்படுத்த உடனடியாக முறையான வரிசை (Queue) மேலாண்மை அமைப்பை நிறுவுதல், பிரதான நுழைவாயிலின் அருகில் சிங்களம், தமிழ் மற்றும் ஆங்கிலம் ஆகிய மூன்று மொழிகளிலும் பெயர்ப்பலகைகளை விரைவாக நிறுவுதல் ஆகிய தீர்மானங்கள் எடுக்கப்பட்டுள்ளன.

மேலும், மோட்டார் வாகனப் போக்குவரத்து திணைக்களத்தின் நவீனமயப்படுத்தப்பட்ட புதிய அமைப்பு 2026 ஏப்ரல் 30ஆம் திகதிக்கு முன்னர் கட்டாயமாக செயல்படுத்தப்பட வேண்டும் என்றும், பொதுமக்களுக்கு முன்கூட்டியே அறிவித்த பின்னர், 2026 பெப்ரவரி 28ஆம் திகதி முதல் முன்பதிவு (Appointments) இன்றி வழங்கப்படும் சேவைகள் நிறுத்தப்பட வேண்டும் என்றும் அறிவிக்கப்பட்டுள்ளது.

இதனுடன், சேவைகளுக்கு உதவியாக பணியாற்றும் தன்னார்வ பணியாளர்களுக்கு தேவையான வசதிகள் மற்றும் வளங்களை உடனடியாக வழங்குதல், தற்போது அச்சிடப்படாமல் நிலுவையில் உள்ள ஓட்டுநர் உரிமங்களை அச்சிடும் பணிகளை விரைவுபடுத்துதல் ஆகிய நடவடிக்கைகளும் அறிவிக்கப்பட்டுள்ளன.

அதேபோல், தேசிய போக்குவரத்து மருத்துவ நிறுவத்தின் நிலையான நடைமுறை விதிகளின் கீழ், ஓட்டுநர் உரிமம் பெறுவதில் சிரமம் எதிர்கொள்ளும் நபர்களுக்காக வெரஹெர அலுவலகத்தில் சிறப்பு வசதிகள் ஏற்படுத்துதல், ஓட்டுநர் உரிமத்தை புதுப்பிப்பதற்கான ஆரம்ப காலவரம்பை 35 வயது வரை நீட்டிப்பதற்கான சட்ட நடவடிக்கைகளை எடுப்பதுடன், அதனால் வருமானத்தில் ஏற்படக்கூடிய தாக்கம் தொடர்பாக மதிப்பீடு மேற்கொள்ளப்பட வேண்டும் என்றும் அமைச்சர் தெரிவித்துள்ளார்.