அரசு முன்வைத்துள்ள கல்வி சீர்திருத்தங்களில் உள்ள குறைபாடுகள் மற்றும் நாட்டின் அரசியல் செயற்பாட்டாளர்களின் வீழ்ச்சியடைந்த நடத்தை குறித்து விமர்சனம் செய்து, இலங்கை தொழிலாளர் மக்கள் முன்னணி விசேட ஊடக சந்திப்பொன்றை நடத்தியது.
இந்த சந்திப்பில், கொள்கை சார்ந்த அரசியலுக்கு பதிலாக தனிநபர் அவதூறுகளை ஊக்குவிக்கும் “அருவருப்பான அரசியல்” முறையை மக்கள் நிராகரிக்க வேண்டும் என கட்சி தலைமையினர் வலியுறுத்தினர்.
இந்த ஊடக சந்திப்பில் இலங்கை தொழிலாளர் மக்கள் முன்னணியின் தலைவர் சமீர பெரேரா, பொதுச் செயலாளர் நோயல் ஜன்ஸ்டர், தேசிய அமைப்பாளர் மிலான் பெரேரா, பொருளாளர் ஜூலியானா உள்ளிட்டோர் கலந்துகொண்டனர்.
பெண்களுக்கு எதிரான அவதூறு அரசியல் மற்றும் “பாதாள கலாசாரம்” தொடர்பாக, கல்வி மற்றும் உயர் கல்வி அமைச்சர் ஹரிணி அமரசூரிய அவர்களை குறிவைத்து சமீபகாலமாக மேற்கொள்ளப்பட்ட தனிப்பட்ட தாக்குதல்களுக்கு கட்சி கடும் கண்டனம் தெரிவித்தது.
இவ்வகையான செயற்பாடுகள் கொள்கை அரசியலின் அடையாளமல்ல என்றும், ராஜபக்ச மற்றும் விக்கிரமசிங்க முகாம்களில் இன்னமும் நிலவும் “பாதாள அரசியல் கலாசாரத்தின்” தொடர்ச்சியே எனவும் கட்சி தெரிவித்தது. பெண்களை இழிவுபடுத்தும் இத்தகைய போக்குகளை நாட்டின் முன்னேற்றமான மக்கள் அருவருப்புடன் நிராகரிப்பார்கள் என்றும் வலியுறுத்தப்பட்டது.
மேலும், என்.எம். பெரேரா, கொல்வின் ஆர். டி. சில்வா, விவியன் குணவர்தன போன்ற உண்மையான இடதுசாரி தலைவர்கள் பெரும் தியாகங்களின் மூலம் பெற்றுத் தந்த இலவச கல்வி மற்றும் சுகாதார உரிமைகளை எந்த விதத்திலும் துரோகிக்க அனுமதிக்கமாட்டோம் என கட்சி தெரிவித்தது.
கல்வியை வணிகமயமாக்குவதற்கும், நியோ-லிபரல் கொள்கைகளின் அடிப்படையில் வெட்டுக் குறைப்புகளை மேற்கொள்வதற்கும் எதிராக கட்சி முன்னணியில் இருந்து போராடும் என்றும், குறிப்பாக பள்ளி மூடல் தீர்மானங்களுக்கு எதிராக தீவிரமாக செயற்படும் என்றும் தெரிவிக்கப்பட்டது.
அத்துடன், ராஜபக்சர்களின் “சால்வை அரசியல்” குறித்து கருத்து தெரிவித்த கட்சி, ஜனாதிபதி அனுர குமார திசாநாயக்க கூறுவது போல் சீர்திருத்தங்கள் அவசியமானவையாக இருந்தாலும், அவை திறந்த மற்றும் வெளிப்படையான மக்கள் கலந்துரையாடல்கள் மூலம் முன்னெடுக்கப்பட வேண்டும் எனக் கூறியது.
நாமல் ராஜபக்ச ஜனாதிபதியாகினால் புதிய சீர்திருத்தங்களை கொண்டு வருவேன் என கூறியதை கட்சி இங்கு கேலியாக விமர்சித்தது.
ராஜபக்சர்களின் “சால்வை அரசியல்” ஏற்கனவே மக்கள் மூலம் வரலாற்றின் குப்பைத் தொட்டியில் வீசப்பட்டுள்ளதாகவும், அவர்கள் மீண்டும் அதிகாரத்திற்கு வர எந்தவித வாய்ப்பும் இல்லை என்றும் கட்சி தலைமையினர் மேலும் தெரிவித்தனர்.