சபாநாயகர் வைத்தியர் ஜகத் விக்ரமரத்னவுக்கு எதிராக நம்பிக்கையில்லா தீர்மானம் கொண்டு வர, சமகி ஜன பலவேக (SJB) நாடாளுமன்ற உறுப்பினர்கள் குழு தயாராகி வருகிறது.

இதுகுறித்து  கருத்து தெரிவித்த சமகி ஜன பலவேக நாடாளுமன்ற உறுப்பினர் மற்றும் சட்டத்தரணி சுஜீவ சேனசிங்க,

இந்த நம்பிக்கையில்லா தீர்மானத்தை இன்றோ அல்லது நாளையோ கட்சி தலைமையிடத்திற்கும், எதிர்க்கட்சியின் பிற அரசியல் கட்சிகளின் தலைவர்களுக்கும் முன்வைக்க உள்ளதாக தெரிவித்தார்.

இதன்படி, எதிர்க்கட்சியின் அனைத்து கட்சிகளின் ஆதரவுடன் இந்த நம்பிக்கையில்லா தீர்மானத்தை தயாரிக்க நடவடிக்கை எடுக்கப்படும் என்றும் அவர் குறிப்பிட்டார்.

நாடாளுமன்ற துணை செயலாளர் நாயகம் மற்றும் பணியாளர் தலைவரான சட்டத்தரணி சமிந்த குலரத்னவின் பணியிடைநீக்கம், பட்சபாதமாக செயல்பட்டமை உள்ளிட்ட குற்றச்சாட்டுகளை அடிப்படையாகக் கொண்டு, சபாநாயகருக்கு எதிராக இந்த நம்பிக்கையில்லா தீர்மானத்தை கொண்டு வர எதிர்க்கட்சி எதிர்பார்க்கிறது.

சபாநாயகருக்கு எதிராக நம்பிக்கையில்லா தீர்மானம் கொண்டு வருவதற்கான முடிவு முன்னரே எடுக்கப்பட்டிருந்தாலும், சில காரணங்களால் அது ஒத்திவைக்கப்பட்டிருந்தது என்பதும் தெரிவிக்கப்படுகிறது.

மேலும் கருத்து தெரிவித்த சுஜீவ சேனசிங்க,

அரசாங்கம் சட்டமா அதிபர் திணைக்களம் உள்ளிட்ட சுயாதீன நிறுவனங்களில் தலையிடத் தொடங்கியிருப்பது மிகவும் அபாயகரமான நிலைமை என்றும் சுட்டிக்காட்டினார்.

இதுகுறித்து கருத்து தெரிவித்த சமகி ஜன பலவேக கொழும்பு மாவட்ட நாடாளுமன்ற உறுப்பினர் முஜிபுர் ரஹ்மான், சபாநாயகருக்கு எதிராக நம்பிக்கையில்லா தீர்மானம் கொண்டு வரப்பட்டால் அதற்கு முழு ஆதரவு வழங்குவதாக தெரிவித்தார்.

இதற்கிடையில், நாடாளுமன்ற உறுப்பினர் மற்றும் சட்டத்தரணி தயாசிறி ஜயசேகர, சபாநாயகருக்கு எதிரான நம்பிக்கையில்லா தீர்மானம் ஏற்கனவே தயாரிக்கப்பட்டுள்ளதாக கூறினார்.