சிறார்களின் சமூக ஊடகப் பயன்பாட்டிற்கு கட்டுப்பாடுகளை விதிப்பது தொடர்பில் அரசு கவனம் செலுத்தி வருவதாக, டிஜிட்டல் பொருளாதாரத்திற்கான பிரதி அமைச்சர் எரங்க வீரரத்தன தெரிவித்துள்ளார்.

இணையத்தை சார்ந்த தீங்கான சம்பவங்கள் வேகமாக அதிகரித்து வருவதால், குழந்தைகளின் பாதுகாப்பை உறுதி செய்ய சமூக ஊடக பயன்பாட்டிற்கு வரம்புகளை விதிக்கும் சாத்தியங்கள் குறித்து தற்போது கலந்துரையாடல்கள் ஆரம்பிக்கப்பட்டுள்ளதாக அவர் கூறினார்.

சமீப காலமாக சமூக ஊடகங்களில் பெரும் விவாதத்திற்கு உள்ளான மாணவர்கள் மற்றும் ஆசிரியர்களை தொடர்புடைய பல்வேறு உணர்ச்சிவசப்பட்ட சம்பவங்களை அடிப்படையாகக் கொண்டு இந்த கலந்துரையாடல்கள் மீண்டும் முன்னிறுத்தப்பட்டுள்ளன.

இவ்வாறான உள்ளடக்கங்கள் மிக வேகமாக பரவுவதன் காரணமாக, மாணவர்களுக்கும் ஆசிரியர்களுக்கும் உரிய தனிப்பட்ட வாழ்க்கைக்கு கடும் பாதிப்புகள் ஏற்பட்டுள்ளதாக பிரதி அமைச்சர் சுட்டிக்காட்டினார். ஒழுக்க நடவடிக்கைகள் மேற்கொள்ளப்படும் போது, சம்பந்தப்பட்ட உண்மைகள் முறையாக உறுதிப்படுத்தப்பட்ட பின்னரே நடவடிக்கை எடுக்கப்பட வேண்டும் என்பதையும் அவர் வலியுறுத்தினார்.

“இது தொடர்பாக இன்னும் இறுதி முடிவு எடுக்கப்படவில்லை. இருப்பினும், சமூக ஊடகங்களின் மூலம் சிறார்களின் மனநலத்திற்கு ஏற்படும் பாதிப்புகளைத் தடுப்பதற்காக ஒரு நாட்டாக நாம் நடவடிக்கை எடுக்க வேண்டிய அவசியம் உள்ளது,” என அவர் தெரிவித்தார்.

உலகின் பல நாடுகள் ஏற்கனவே இவ்வாறான கட்டுப்பாடுகளை அமல்படுத்தியுள்ளன என்றும், அதற்குத் தேவையான தொழில்நுட்ப திறன்கள் இலங்கைக்கு உள்ளன என்றும் அவர் கூறினார்.

அரசு ஒரு முறையான திட்டத்தை தயாரித்த பின்னர், இலங்கையின் தொலைத்தொடர்பு நிறுவனங்கள் ஊடாக சமூக ஊடக தளங்களை இயக்கும் நிறுவனங்களுக்கு தேவையான வழிகாட்டுதல்களை வழங்கி, சம்பந்தப்பட்ட கட்டுப்பாடுகளை அமல்படுத்த முடியும் என்பதும் அவரது கருத்தாகும்.

சமூக ஊடகப் பயன்பாட்டினால் சிறார்களின் மனநலம் பாதிக்கப்படுவதும், இணைய வழி தொல்லைகள் (Cyberbullying) அதிகரிப்பதும் கருத்தில் கொண்டு, உலகின் பல நாடுகள் கடுமையான சட்டங்களை அமல்படுத்தி வருகின்றன.