மார்ச் மாதத்துக்குள் இலங்கையில் மின்வெட்டு ஏற்படும் கடும் அபாயம் நிலவுவதாக பாராளுமன்ற உறுப்பினர் எஸ். எம். மரிக்கார் தெரிவித்துள்ளார். 

தரநிலைக்கு ஒவ்வாத நிலக்கரி தொடர்ச்சியாக நாட்டிற்கு இறக்குமதி செய்யப்பட்டால், இந்த நிலையை தவிர்க்க முடியாது எனவும், சமீபத்தில் நாட்டுக்கு வந்த மூன்று நிலக்கரி கப்பல்களில் முதல் கப்பலில் இருந்த நிலக்கரி மிகவும் தாழ்ந்த தரத்தில் இருந்ததாகவும் அவர் குறிப்பிட்டுள்ளார்.

சமகி ஜனபலவேகய தலைமையகத்தில் நடைபெற்ற ஊடக சந்திப்பில் கருத்து தெரிவித்த மரிக்கார், மற்ற இரண்டு கப்பல்களில் உள்ள நிலக்கரிக்கான தரச் சோதனை அறிக்கைகள் இதுவரை கிடைக்கவில்லை என்றும் கூறினார்.

தாழ்ந்த தர நிலக்கரி பயன்படுத்தப்படுவதால் மின் நிலையங்களின் உற்பத்தித் திறன் கணிசமாக குறைகிறது என்றும், அந்த குறைபாட்டை ஈடு செய்ய அரசு தனியார் டீசல் மின் நிலையங்களில் இருந்து அதிக விலையில் மின்சாரம் வாங்க வேண்டிய நிலை உருவாகிறது என்றும் அவர் தெரிவித்தார்.

இந்த நிலையான அசாதாரண சூழ்நிலையால், நாடு மீண்டும் மின்வெட்டுக்குத் தள்ளப்படும் பெரும் அபாயம் உள்ளதாகவும் மரிக்கார் எச்சரித்தார்.