2026 ஏப்ரல் 1 முதல் அமலுக்கு வரும் புதிய வரி திருத்தங்களால் வாகன இறக்குமதிக்கு விதிக்கப்படும் மொத்த சுங்க வரி அமைப்பில் எந்த மாற்றமும் ஏற்படாது என மோட்டார் வாகன இறக்குமதியாளர்கள் சங்கம் தெரிவித்துள்ளது.

புதிய சுங்க வரி திருத்தங்கள் குறித்து பொதுமக்களுக்கு விளக்கம் அளித்த அந்தச் சங்கம், நிதி அமைச்சின் நிதிக் கொள்கை துறையின் அதிகாரிகளிடமிருந்து கிடைத்த தகவல்களின் அடிப்படையில் சில மாற்றங்கள் செய்யப்படவுள்ளதாக குறிப்பிட்டுள்ளது.

அதன்படி,

• சுங்க இறக்குமதி வரி (CID) தற்போது உள்ள 20% இலிருந்து 30% ஆக உயர்த்தப்பட உள்ளது.
• அதே நேரத்தில் தற்போது அமலில் உள்ள 50% சுங்க வரி மேலதிக கட்டணம் (Surcharge) தனி கசேட் அறிவிப்பின் மூலம் ரத்து செய்யப்படும்.

இந்த மாற்றங்களின் மொத்த விளைவாக, வாகனங்களை இறக்குமதி செய்வதற்கான மொத்த சுங்க வரி அமைப்பில் எந்த மாற்றமும் ஏற்படாது என மோட்டார் வாகன இறக்குமதியாளர்கள் சங்கம் உறுதி செய்துள்ளது.

ஆனால், 2026 ஏப்ரல் 1 முதல் இறக்குமதி செய்யப்படும் வாகனங்களுக்கு, தற்போது உள்ள வரிகளுக்கு மேலாக 2.5% சமூக பாதுகாப்பு பங்களிப்பு வரி (SSCL) மட்டும் சேர்க்கப்படும் என தெரிவிக்கப்பட்டுள்ளது.

இதுவே வாகன இறக்குமதியாளர்கள் ஏற்க வேண்டிய ஒரே கூடுதல் செலவாகும் எனவும் அந்தச் சங்கம் மேலும் தெரிவித்துள்ளது.