ஜனாதிபதி அனுர குமார திசாநாயக்க வெளிப்படுத்தியதாகக் கூறப்படும் 1 பில்லியன் அமெரிக்க டொலர் பெறுமதியான பாரிய அந்நியச் செலாவணி மோசடி தொடர்பில் உடனடியாக விசாரணை நடத்துவதுடன், அதனுடன் தொடர்புடைய ஒழுங்குமுறை அமைப்புகளின் அதிகாரிகளை அரசின் நிதி தொடர்பான பாராளுமன்றக் குழுவான (COPF) முன் ஆஜர்படுத்த வேண்டும் என பாராளுமன்ற உறுப்பினர் ரவி கருணாநாயக்க கோரிக்கை விடுத்துள்ளார்.

COPF தலைவர் நோக்கி அனுப்பியுள்ள கடிதத்தில், இந்த நிதி மோசடி நாட்டின் பொருளாதார அடித்தளத்தையே அதிரவைக்கும் அளவுக்கு மிகக் கடுமையான சம்பவம் என அவர் சுட்டிக்காட்டியுள்ளார்.

2024ஆம் ஆண்டு முதல் இடம்பெற்று வந்ததாகக் கூறப்படும் இந்த மோசடி, பொருட்களை இறக்குமதி செய்யாமல் போலி ஆவணங்களை சமர்ப்பித்து வெளிநாடுகளுக்கு பணம் அனுப்பும் மோசடி வலையமைப்பின் ஊடாக நடைபெற்றதாக ஜனாதிபதி முன்னதாக வெளிப்படுத்தியிருந்தார்.

மேலும், ஆனந்த விஜேபால உறுதிப்படுத்திய தகவலின்படி, இலங்கையில் பதிவு செய்யப்பட்ட 105 போலி நிறுவனங்கள் ஊடாக சட்டவிரோதமான 953 பரிவர்த்தனைகள் மூலம் ரூ.12.89 பில்லியன் வெளிநாடுகளுக்கு அனுப்பப்பட்டுள்ளதாக தெரிவிக்கப்பட்டுள்ளது.

இந்த நிதி குற்றச்செயல் தொடர்பில் மத்திய வங்கியின் பங்கை ரவி கருணாநாயக்க கடுமையாக கேள்விக்குட்படுத்தியுள்ளார். 13 வர்த்தக வங்கிகளில் உள்ள 227 கணக்குகள் ஊடாக 26,108 மோசடி டெலிகிராபிக் பணப்பரிமாற்றங்கள் (TT) மூலம் இவ்வளவு பெரிய தொகை இரண்டு ஆண்டுகளாக நாட்டை விட்டு வெளியேறியபோதும், மத்திய வங்கியின் வங்கி மேற்பார்வைத் துறையும் நிதி புலனாய்வு பிரிவும் ஏன் நடவடிக்கை எடுக்கவில்லை என அவர் தனது கடிதத்தில் கேள்வி எழுப்பியுள்ளார்.

இந்த அமைப்புசார் தோல்வி குறித்து விளக்கம் பெற, மத்திய வங்கி ஆளுநர் மற்றும் மூத்த அதிகாரிகள், இறக்குமதி மற்றும் ஏற்றுமதி கட்டுப்பாட்டு ஆணையாளர் நாயகம், சுங்கத் துறை பணிப்பாளர் நாயகம், மேலும் மோசடியில் தொடர்புடையதாகக் கூறப்படும் 13 வர்த்தக வங்கிகளின் பிரதான இணக்கப்பாட்டு (Compliance) அதிகாரிகளை உடனடியாக COPF குழுவின் முன் ஆஜர்படுத்த வேண்டும் என்றும் அவர் வலியுறுத்தியுள்ளார்.

அத்துடன், கிரிப்டோகரன்சி போன்ற ஒழுங்குமுறைப்படுத்தப்படாத நிதி கருவிகள் மூலம் நடைபெறும் வரி ஏய்ப்பு மற்றும் அந்நியச் செலாவணி மோசடிகள் குறித்து தாம் 2025ஆம் ஆண்டிலேயே எச்சரிக்கை விடுத்திருந்த போதிலும், அதனை மத்திய வங்கி போதுமான முக்கியத்துவத்துடன் எடுத்துக்கொள்ளாததே இந்த நிலைமைக்கு காரணமாகியுள்ளது என்றும் ரவி கருணாநாயக்க மேலும் தெரிவித்துள்ளார்.