நாட்டில் பொருளாதார வளர்ச்சி ஏற்பட்டுள்ளதாக அரசு கூறினாலும், நடைமுறையில் பணவீக்கமும் வாழ்க்கைச் செலவும் நாளுக்கு நாள் அதிகரித்து வருவதாக நாடாளுமன்ற உறுப்பினர் ரவி கருணாநாயக்க தெரிவித்துள்ளார்.
கொழும்பில் நடைபெற்ற ஊடக சந்திப்பில் கலந்து கொண்டு அவர் இதனைத் தெரிவித்தார்.
மத்திய வங்கி பணவீக்கத்தை கட்டுப்படுத்தியுள்ளதாக அறிவித்தாலும், பேருந்து கட்டணம் உள்ளிட்ட அத்தியாவசிய சேவைகளின் கட்டணங்கள் உயர்ந்துள்ளதால் பொதுமக்கள் கடுமையான சிரமங்களை எதிர்கொண்டு வருவதாக அவர் சுட்டிக்காட்டினார்.
பொருளாதாரம் வலுப்பெற்று வருவதாக அரசு கூறினாலும், அதன் உண்மையான பலன் பொதுமக்களுக்கு எப்போது கிடைக்கும் என்பதை தெளிவுபடுத்த வேண்டும் என்றும் அவர் வலியுறுத்தினார்.
நெல் கொள்வனவு தொடர்பில் அரசு நேரடியான பதிலை வழங்க வேண்டும் எனக் கூறிய அவர், “அப்போது ஒரு கிலோ நெல்லை 150 ரூபாய்க்கு வாங்க முடிந்திருந்தால், இன்று ஏன் அது முடியவில்லை?” என்று கேள்வி எழுப்பினார்.
விவசாயிகளும் நுகர்வோரும் பாதுகாக்கப்படும் வகையில், கேள்வி மற்றும் வழங்கல் (Demand and Supply) அடிப்படையில் நெல் விலை நிர்ணயிக்கப்பட வேண்டும் என்பதே தனது நிலைப்பாடு என அவர் தெரிவித்தார்.
அரசியல் நிலவரம் குறித்து கருத்து தெரிவித்த அவர், ஐக்கிய மக்கள் சக்தி (SJB) மற்றும் ஐக்கிய தேசியக் கட்சி (UNP) ஆகிய இரு கட்சிகளுக்கும் வலுவான தலைமையின் தேவை இருப்பதாகக் கூறினார்.
ஜனநாயகத்தை பாதுகாக்க தேர்தல்கள் அவசியம் நடத்தப்பட வேண்டும் என்றும், குறிப்பாக நீண்ட காலமாக ஒத்திவைக்கப்பட்டுள்ள மாகாண சபைத் தேர்தலை விரைவாக நடத்த வேண்டும் என்றும் அவர் வலியுறுத்தினார்.
முன்னாள் பொலிஸ் மா அதிபரின் மரணம் மிகவும் உணர்வுபூர்வமான சம்பவம் என்பதால், அதன் உண்மைத் தன்மை குறித்து செய்தி வெளியிடும் போது ஊடகங்கள் அதிக பொறுப்புடன் செயல்பட வேண்டும் என்றும் அவர் குறிப்பிட்டார்.
மேலும், தமிழ் அரசியல் கட்சிகள் ஒன்றிணைவது குறித்து பல்வேறு கருத்துகள் முன்வைக்கப்பட்டாலும், மக்களின் வெற்றிக்காக அனைத்து கட்சிகளும் ஒரு பொதுவான நோக்கத்திற்காக ஒன்றிணைந்து செயல்பட வேண்டும் என்றும் ரவி கருணாநாயக்க தெரிவித்தார்.
