– பாட்டலி சம்பிக்க ரணவக்க
கலகொடஅத்தே ஞானசார தேரர் சிறையில் அடைக்கப்பட்ட பின்னர், அவரது காவி உடையை அகற்றி சிவில் உடை அணிவித்து, அந்த உடையிலேயே நீதிமன்றத்தில் ஆஜர்படுத்தப்பட்டமை சாசன ரீதியாகவும் சட்ட ரீதியாகவும் பாரதூரமான தவறு என முன்னாள் அமைச்சர் பாட்டலி சம்பிக்க ரணவக்க தெரிவித்துள்ளார்.
அவர் வெளியிட்டுள்ள சிறப்பு அறிக்கையில் இதனைத் தெரிவித்துள்ளார்.
காவி உடையை அகற்றுவதற்கான சாசன அதிகாரம்
நீதிமன்றத்தால் வழங்கப்படும் தண்டனைகளுக்கு சட்டத்தின் முன் அனைவரும் கட்டுப்பட வேண்டும் என்றாலும், ஒரு பிக்குவின் காவி உடையை அகற்றுவதற்கான அதிகாரம் சம்பந்தப்பட்ட பிக்குச் சங்கத்திற்கே உள்ளதே தவிர, சிறை அதிகாரிகளுக்கோ அரசாங்கத்திற்கோ இல்லை என அவர் தெரிவித்துள்ளார்.
ஒரு பிக்கு நான்கு குற்றங்களில் — மனிதக் கொலை, பாலியல் உறவு, பாரிய திருட்டு மற்றும் தமக்கு இல்லாத தியான நிலை அல்லது மார்க்கப் பலனைப் பெற்றதாக பொய்யாகக் கூறுதல் — ஈடுபட்டதாக நிரூபிக்கப்படாத நிலையில், அவரது காவி உடையை அகற்றுவதற்கு சிறைச்சாலைக்கு எந்த அதிகாரமும் இல்லை எனவும் அவர் குறிப்பிட்டுள்ளார்.
வரலாற்றுப் பின்னணி
பிரித்தானிய ஆட்சிக் காலத்தில் சிறையில் அடைக்கப்பட்ட உடுகெந்தவல சரணங்கர தேரரின் காவி உடையை அகற்ற முயற்சி மேற்கொள்ளப்பட்டபோது, தாம் முழு சங்க சமூகத்தின் முன்னிலையில் காவி உடையை ஏற்றுக்கொண்டதாகவும், அதனை அகற்றும் அதிகாரமும் சங்க சமூகத்திற்கே இருப்பதாகவும் அவர் தெரிவித்திருந்ததாக ரணவக்க சுட்டிக்காட்டியுள்ளார்.
பின்னர் அக்கால நீதியமைச்சர் டி.பி. ஜயதிலக்கவின் தலையீட்டின் மூலம், சரணங்கர தேரருக்கு காவி உடையுடனேயே சிறையில் இருக்க அனுமதி வழங்கப்பட்டதாகவும் அவர் தெரிவித்துள்ளார்.
அதேபோன்று, குடாப்பொல ராகுல தேரருக்கு துப்பாக்கிச் சூடு நடத்தப்படுவதற்கு முன்னர், அவரது காவி உடையை அகற்ற பிரித்தானியர்கள் மேற்கொண்ட முயற்சிக்கும் அவர் கடுமையாக எதிர்ப்பு தெரிவித்ததாகவும் ரணவக்க குறிப்பிட்டுள்ளார்.
சோமாராம தேரரின் சம்பவம்
எஸ்.டபிள்யூ.ஆர்.டி. பண்டாரநாயக்கவை கொலை செய்த சோமாராம தேரரின் சம்பவம் இதற்கு பொருந்தாது என்றும் ரணவக்க தெரிவித்துள்ளார்.
அவர் மனிதக் கொலை என்ற நான்கு பாராஜிகா குற்றங்களில் ஒன்றுடன் தொடர்புபட்டிருந்ததுடன், பின்னர் பௌத்த மதத்தை விட்டு கிறிஸ்தவ மதத்தைத் தழுவியிருந்தமையும் இதற்கான காரணங்களாகும் என அவர் குறிப்பிட்டுள்ளார்.
மத மற்றும் மனித உரிமைகள்
சிறையில் அடைக்கப்படும் பிற மதங்களைச் சேர்ந்தவர்களுக்கு, உதாரணமாக சீக்கியர்களின் தலைப்பாகை அல்லது முஸ்லிம்களின் மத அடையாள ஆடைகளை சிறையிலும் பயன்படுத்துவதற்கான உரிமை இருப்பதைப் போலவே, ஞானசார தேரருக்கும் தனது மத உரிமையைப் பாதுகாத்துக்கொள்ளும் உரிமை இருக்க வேண்டும் என பாட்டலி சம்பிக்க ரணவக்க தெரிவித்துள்ளார்.
அரசியலமைப்பின் 9ஆவது சரத்தின் கீழ் பௌத்த மதத்திற்கு வழங்கப்பட்டுள்ள பாதுகாப்பும், அடிப்படை மனித உரிமைகளும் இதன்போது கருத்தில் கொள்ளப்பட வேண்டும் என அவர் வலியுறுத்தியுள்ளார்.
கோட்டை ஸ்ரீ கல்யாணி சாமக்ரீ தர்ம மகா சங்க சபையினால் வழங்கப்பட்டுள்ள அறிவுறுத்தலை ஏற்று, இந்த விடயத்தில் உடனடியாக தலையீடு செய்யுமாறு ஜனாதிபதி மற்றும் அரசாங்கத்திடம் அவர் கோரிக்கை விடுத்துள்ளார்.
நாட்டின் மத உரிமைகளையும் நீதியையும் பாதுகாப்பதற்காக ஒட்டுமொத்த மகா சங்கத்தினரும் பொதுமக்களும் முன்வர வேண்டும் என்றும் பாட்டலி சம்பிக்க ரணவக்க மேலும் தெரிவித்துள்ளார்.
