எந்த நேரத்திலும் தேர்தலை எதிர்கொள்ள தேசிய மக்கள் சக்தி அரசாங்கம் தயார்

எந்தவொரு சந்தர்ப்பத்திலும் தேர்தலை எதிர்கொள்ள தேசிய மக்கள் சக்தி அரசாங்கம் தயாராக இருப்பதாக பிரதி அமைச்சர் பிரசன்ன குணசேன தெரிவித்துள்ளார்.

மாகாண சபைத் தேர்தல் நடத்தப்பட்டால் அதனை எதிர்கொள்ளத் தயாராக இருப்பதாகவும், மாகாண சபைத் தேர்தலை நடத்த முடியாத நிலை ஏற்பட்டால், 2029ஆம் ஆண்டு ஜனாதிபதித் தேர்தலே தமது தரப்புக்கு அடுத்த தேர்தலாக அமையும் என்றும் அவர் குறிப்பிட்டுள்ளார்.

மாகாண சபைத் தேர்தலை நடத்துவதற்கு பல்வேறு தரப்பினர் அழுத்தம் கொடுத்து வந்தாலும், அதற்குத் தேவையான சட்ட நடவடிக்கைகளை முறையாக நிறைவு செய்ய வேண்டியுள்ளதாக அவர் தெரிவித்துள்ளார்.

சட்ட வரையறைகளுக்கு அப்பால் சென்று தேர்தலை நடத்த முடியாது என்பதால், தேவையான சட்ட நடவடிக்கைகளை விரைவில் நிறைவு செய்து, முடிந்தளவு விரைவாக தேர்தலை நடத்த எதிர்பார்ப்பதாகவும் அவர் கூறியுள்ளார்.

ஜனாதிபதி அநுர குமார திசாநாயக்க நாடு முழுவதும் பயணம் மேற்கொள்ளும் சந்தர்ப்பங்களில் பொதுமக்கள் மத்தியில் அதிக ஆதரவை காணக்கூடியதாக இருப்பதாகவும் பிரசன்ன குணசேன தெரிவித்துள்ளார்.

அந்த மக்கள் ஆதரவை தேர்தலொன்றின் மூலம் மக்கள் ஆணையாக வெளிப்படுத்துவதற்கு தாம் விரும்புவதாகவும் அவர் மேலும் குறிப்பிட்டுள்ளார்.