ஞானசார தேரர் தொடர்பாக தற்போது எழுந்துள்ள பிரச்சினையை தற்போதைய அரசாங்கத்தால் இலகுவாகத் தீர்க்க முடியும் என முன்னாள் நாடாளுமன்ற உறுப்பினர் சமன் ரத்னப்பிரிய தெரிவித்துள்ளார்.
முன்னாள் ஜனாதிபதி மைத்திரிபால சிறிசேனவினால் ஞானசார தேரருக்கு மன்னிப்பு வழங்கப்பட்டிருந்த போதிலும், அந்தச் செயல்முறையில் காணப்பட்ட குறைபாடு ஒன்றின் காரணமாக அவர் மீண்டும் சிறையில் அடைக்கப்பட வேண்டிய நிலை ஏற்பட்டதாக அவர் குறிப்பிட்டுள்ளார்.
அந்தச் செயல்முறையில் காணப்படும் குறைபாட்டை தற்போதைய ஜனாதிபதியால் இலகுவாகச் சரிசெய்ய முடியும் என்றும், அவ்வாறு செய்யாமலிருப்பது ஞானசார தேரரை விடுதலை செய்வதைவிட அவரைத் தொடர்ந்து சிறையில் வைத்திருக்க வேண்டும் என்ற நோக்கில் ஜனாதிபதியும் அரசாங்கமும் செயற்படுகின்றன என்ற உணர்வைத் தமக்கு ஏற்படுத்துவதாகவும் சமன் ரத்னப்பிரிய தெரிவித்துள்ளார்.
ஞானசார தேரரை விடுதலை செய்யுமாறு கோரி முன்னெடுக்கப்படும் ஆர்ப்பாட்டங்கள் மற்றும் பேரணிகள் தொடர்பாகக் கருத்துத் தெரிவித்த அவர், அந்தக் கோரிக்கை நியாயமானது என்றும் குறிப்பிட்டுள்ளார்.
சரத் பொன்சேகா மற்றும் ரஞ்சன் ராமநாயக்க போன்றவர்கள் சுதந்திரமாக இருக்கும்போது, ஞானசார தேரர் மாத்திரம் சிறையில் இருப்பது நியாயமற்றது என்றும் அவர் தெரிவித்துள்ளார்.
இந்த விவகாரம் காரணமாக சிங்கள பௌத்த சமூகத்திற்குள் பிளவு ஏற்பட்டு வருவதாகவும், அரசாங்கத்திற்கு எதிரான எதிர்ப்பும் அதிருப்தியும் அதிகரித்து வருவதாகவும் சமன் ரத்னப்பிரிய சுட்டிக்காட்டியுள்ளார்.
மேலும், அரசாங்கத்திற்கு ஆதரவான தரப்பினரைப் பயன்படுத்தி ஆர்ப்பாட்டங்களுக்கு எதிரான நடவடிக்கைகளை முன்னெடுப்பதன் மூலம் பெரும்பான்மை சமூகத்தைப் பிளவுபடுத்தி மோதல் நிலைமையை உருவாக்க முயற்சிக்கப்படுகிறதா என்பது தொடர்பில் பாரிய சந்தேகம் எழுந்துள்ளதாகவும் அவர் தெரிவித்துள்ளார்.
ஒரு நாட்டை முன்னேற்றப் பாதையில் கொண்டு செல்வதற்கும் அபிவிருத்தியை நோக்கி நகர்த்துவதற்கும் சமூக அமைதியும் மக்கள் மத்தியில் நிலவும் நம்பிக்கையும் அவசியம் என அவர் மேலும் குறிப்பிட்டுள்ளார்.
இவ்வாறான மோதல் நிலைமைகள் தொடர்ந்து அதிகரித்தால், அரசாங்கத்திற்கும் நாட்டிற்கும் முன்னோக்கிச் செல்வது கடினமாகிவிடும் என்றும் சமன் ரத்னப்பிரிய தெரிவித்துள்ளார்.
