ஜப்பானிய அரசாங்கத்தின் கடனுதவியில் புதிதாக நிர்மாணிக்கப்பட்டுள்ள புதிய களனி பாலத்திற்கு ஆபத்தை ஏற்படுத்தும் வகையில் 28 கோடி ரூபாவிற்கும் அதிகமான பெறுமதியான செப்பு கம்பிகள் மற்றும் ஆணிகளை போதைப்பொருள் பாவனையாளர்கள் களவாடியுள்ளதாக தெரியவந்துள்ளது.

மேலும் கான்கிரீட் மூடிகளை இரவு நேரத்தில் ரகசியமாக உடைத்து கான்கிரீட் கவர்கள் உள்ளே இருந்த காப்பர் கம்பிகள் அகற்றப்பட்டதும் தெரியவந்துள்ளது.

மேலும், கட்டுநாயக்கா - கொழும்பு அதிவேக நெடுஞ்சாலையில் உள்ள அதிவேக மின் கம்பிகளை கூட போதைப்பொருள் பாவனையாளர்கள் அறுத்துள்ளதாகவும், இதனால் அதிவேக நெடுஞ்சாலையில் இரவு நேரங்களில் மின்விளக்குகளை ஏற்ற முடியாத நிலை ஏற்பட்டுள்ளதாகவும் தெரியவந்துள்ளது.  அந்த சாலையில் உள்ள பாதுகாப்பு வலைகளை கூட இரும்புக்காக வெட்டி விற்பனை செய்து வருவது தெரியவந்துள்ளது.

கடந்த செவ்வாய்கிழமை (11) ஜனாதிபதி தலைமையில் கூடிய தேசிய பாதுகாப்பு சபையில் இது தெரியவந்துள்ளது.

இந்தப் பகுதியை உயர் பாதுகாப்பு வலயமாக மாற்றுமாறு குழுவின் தலைவர் சரத் வீரசேகர பரிந்துரைத்துள்ளார். இந்த நிலைமையின் அடிப்படையில் புதிய களனி பாலம் மற்றும் கட்டுநாயக்க – கொழும்பு அதிவேக நெடுஞ்சாலை ஆகியவற்றின் பாதுகாப்பை ரக்னா லங்கா நிறுவனத்திடம் ஒப்படைப்பது குறித்து கவனம் செலுத்தப்பட்டுள்ளது.

புதிய களனி பாலம் முன்னாள் ஜனாதிபதி கோட்டாபய ராஜபக்ஷவினால் நவம்பர் 24, 2021 அன்று திறந்து வைக்கப்பட்டது.