இலங்கையில் மதுபானப் பயன்பாடு காரணமாக சராசரியாக ஒவ்வொரு நாளும் கிட்டத்தட்ட 50 பேர் உயிரிழப்பதாக அந்நாட்டின் மதுசாரம் மற்றும் போதைப்பொருள் தகவல் நிலையம் (ADIC) தெரிவித்துள்ளது.

சட்டப்பூர்வமான மற்றும் கள்ளத்தனமான (Illicit Liquor) மதுப் பயன்பாடு ஆகிய இரண்டின் மூலமும் நாளொன்றுக்கு சுமார் 50 பேர் இறக்கின்றனர். மதுவினால் ஆண்டுதோறும் சுமார் 15,000 முதல் 20,000 பேர் வரை உயிரிழப்பதாக உலக சுகாதார நிறுவனம் (WHO) மற்றும் சுகாதார அமைச்சின் தரவுகள் தெரிவிக்கின்றன.

கள்ளச் சாராயத்தின் புழக்கம் அண்மைக் காலங்களில் 300% அதிகரித்துள்ளதாகக் கூறப்படுகிறது. இதனால் மட்டுமே நாளொன்றுக்கு 5-6 மரணங்கள் ஏற்படுகின்றன. குறிப்பாக, கடந்த ஜனவரி 6-ஆம் தேதி வென்னப்புவ (Wennappuwa) பகுதியில் கள்ளச் சாராயம் அருந்திய 5 பேர் உயிரிழந்த சம்பவம் பெரும் பரபரப்பை ஏற்படுத்தியது.

இருப்பினும் இலங்கை மக்கள் தொகையில் 20 விழுக்காட்டிற்கும் குறைவானவர்களே மது அருந்துகின்றனர்.

15 வயதிற்கு மேற்பட்ட ஆடவர்களில் 34.8% பேர் மது அருந்துகின்றனர். பெண்களிடையே மதுப் பயன்பாடு 0.5% என்ற அளவில் மிகவும் குறைவாகவே உள்ளது.

மேலும் இலங்கையில் நிகழும் உயிரிழப்புடன் கூடிய சாலை விபத்துக்களில் 20% மதுபோதையுடன் தொடர்புடையவை என்றும் கூறப்படுகிறது.

மதுவினால் ஏற்படும் நோய்களுக்குச் சிகிச்சை அளிக்க அரசாங்கம் ஆண்டுதோறும் சுமார் 237 பில்லியன் ரூபாய் செலவிடுகிறது. மது விற்பனை மூலம் கிடைக்கும் வருமானத்தை விட, அதனால் ஏற்படும் சுகாதார மற்றும் சமூகப் பாதிப்புகளுக்கான செலவு அதிகமாக இருப்பதாகப் பொருளாதார வல்லுநர்கள் சுட்டிக்காட்டுகின்றனர்.

இதேபோல், புகையிலை மற்றும் சிகரெட் பயன்பாட்டால் இலங்கையில் ஆண்டுதோறும் 22,000 பேர் உயிரிழப்பதாகவும், இலங்கையில் நிகழும் மரணங்களில் 83% தொற்றா நோய்களினால் (NCDs) ஏற்படுவதாகவும் அந்த அறிக்கை மேலும் குறிப்பிட்டுள்ளது.