இலங்கை வரலாற்றில் முதல் முறையாக எந்த வெளிநாட்டு கடனும் பெறாமல், நாட்டின் கருவூல நிதியை மட்டும் பயன்படுத்தி ரம்புக்கணை அதிவேக நெடுஞ்சாலையின் நிர்மாணப் பணிகள் இன்று அல்லது நாளை ஆரம்பிக்கப்படவுள்ளதாக பிரதியமைச்சர் டிபி சரத் தெரிவித்துள்ளார்.

இதற்கு முன்பு நாட்டில் நிர்மாணிக்கப்பட்ட அனைத்து அதிவேக நெடுஞ்சாலைகளும் வெளிநாட்டு கடனுதவியின் கீழ் அமைக்கப்பட்டதாகவும், ஆனால் தற்போதைய அரசு ஊழல் மற்றும் மோசடிகள் இன்றி கருவூலத்தை வலுப்படுத்தியதன் காரணமாகவே இந்த வாய்ப்பு உருவாகியுள்ளதாகவும் அவர் குறிப்பிட்டார்.

இந்த அபிவிருத்தித் திட்டங்கள் குறித்து மேலும் கருத்து தெரிவித்த பிரதியமைச்சர், 2029ஆம் ஆண்டுக்குள் தம்புள்ளை வரை அதிவேக நெடுஞ்சாலையை நிர்மாணித்து முடிக்க தேவையான ஆரம்ப கட்ட பணிகள் தற்போது முன்னெடுக்கப்பட்டு வருவதாக தெரிவித்தார்.

அதிவேக நெடுஞ்சாலைகள் மட்டுமன்றி, நாட்டின் பிற அடிப்படை தேவைகளுக்காகவும் உள்நாட்டு நிதிகளை ஒதுக்க அரசு நடவடிக்கை எடுத்துள்ளதாக அவர் கூறினார்.

அதன்படி, அடுத்த ஆண்டில் குடிநீர் வசதிகளை வழங்குவதற்காக எந்தக் கடனும் பெறாமல், உள்நாட்டு கருவூலத்திலிருந்து பல பில்லியன் ரூபாய் ஒதுக்க திட்டமிடப்பட்டுள்ளதாகவும் தெரிவித்தார்.

மேலும், இந்த ஆண்டுக்குள் மட்டும் 100,000 வீடுகள் நிர்மாணிக்க நிதி ஒதுக்கப்பட்டுள்ளதாகவும் கூறினார். இதில் வடக்கு மற்றும் கிழக்கு மாகாணங்களில் நிர்மாணிக்கப்படும் 30,000 வீடுகளுக்கு ஒவ்வொரு வீட்டிற்கும் 20 இலட்சம் ரூபாய் வழங்கப்படவுள்ளதாகவும், மற்ற பகுதிகளுக்கான வீடுகளுக்கு தலா 10 இலட்சம் ரூபாய் ஒதுக்கப்பட்டுள்ளதாகவும் அவர் தெரிவித்தார்.

அதேபோல், சஜித் பிரேமதாச ஜனாதிபதி கனவை முன்னிறுத்தி ஆரம்பித்து, 10,000 முதல் 50,000 ரூபாய் வரையிலான குறைந்த தொகைகளை வழங்கி பாதியிலேயே கைவிடப்பட்ட வீட்டு திட்டங்களால் மக்கள் பெரிதும் பாதிக்கப்பட்டுள்ளதாகவும், அவ்வாறு அரைமுறையாக நிறுத்தப்பட்ட வீடுகளையும் அரசின் தலையீட்டின் மூலம் பூர்த்தி செய்ய நடவடிக்கை எடுக்கப்படும் என்றும் பிரதியமைச்சர் வலியுறுத்தினார்.