எதிர்க்கட்சியின் விமர்சனங்களை முன்வைத்து, அரசாங்கம் வழங்கக்கூடிய மிகப்பெரிய நிவாரணம் என்பது அரசு ஊழியர்களுக்கு 20 கிலோ அரிசியை கடனாக வழங்குவதே என நாமல் ராஜபக்ஷ தெரிவித்துள்ளார்.

புத்தளத்தில் நடைபெற்ற மக்கள் சந்திப்பில் உரையாற்றிய அவர், நாட்டில் வாழ்க்கைச் செலவு அதிகரிப்பு, மின்சார மற்றும் எரிபொருள் விலை உயர்வு, விவசாயிகள், மீனவர்கள், மாணவர்கள் உள்ளிட்ட பல்வேறு தரப்பினரின் பிரச்சினைகளுக்கு அரசாங்கம் தீர்வு வழங்கத் தவறிவிட்டதாக குற்றஞ்சாட்டினார்.

அரசாங்கம் மக்களிடம் அளித்த தேர்தல் வாக்குறுதிகளை நிறைவேற்றவில்லை என்றும், மக்களின் பொருளாதார சுமையைக் குறைப்பதற்கான தெளிவான திட்டம் எதுவும் இல்லையெனவும் அவர் கூறினார். அதேவேளை, அரசு ஊழியர்களுக்கு 20 கிலோ அரிசியை கடனாக வழங்கும் திட்டத்தை விமர்சித்த அவர், “கடனை செலுத்த முடியாவிட்டால் வீட்டிலிருந்தே சோற்றுப் பானையைக் கூட எடுத்துச் செல்ல வேண்டிய நிலை வரும்” என்று குறிப்பிட்டார்.

மேலும், டெங்கு நோய் பரவல், மீனவர்களின் எரிபொருள் செலவு, விவசாயிகளின் நெல் விலை, தொழிற்சாலைகள் மூடப்படுவது, வேலைவாய்ப்பு இழப்பு, உயர்தரத் தேர்வு மாணவர்களின் மனஅழுத்தம், மருத்துவர்கள் மற்றும் மருத்துவ மாணவர்களின் பிரச்சினைகள் உள்ளிட்ட பல விடயங்களில் அரசாங்கம் போதிய கவனம் செலுத்தவில்லை என்றும் அவர் தெரிவித்தார்.

நாட்டில் இன ஒற்றுமையைப் பாதிக்கும் வகையில் மக்கள் பிரிக்கப்படுவதாகவும், தேசிய பாதுகாப்பு பலவீனப்படுத்தப்படுவதாகவும், பொருளாதார சவால்களுக்கு தீர்வு காணாமல் வரிச்சுமையை அதிகரிப்பதிலேயே அரசு கவனம் செலுத்துவதாகவும் நாமல் ராஜபக்ஷ குற்றம்சாட்டினார்.

எதிர்காலத்தை முன்னிட்டு மக்களின் நம்பிக்கையைப் பெறக்கூடிய, கிராம மக்களுடன் இணைந்து செயல்படும் புதிய அரசியல் தலைமையை உருவாக்க வேண்டும் என்றும், இளைஞர்களை மையமாகக் கொண்ட வலுவான அரசியல் இயக்கத்தை கட்டியெழுப்ப வேண்டிய அவசியம் இருப்பதாகவும் அவர் வலியுறுத்தினார்.