ஹட்டன் பொலிஸ் பிரிவிற்குட்பட்ட அபோஸ்லி தோட்ட மொன்டெஃபேர் பிரிவில் உள்ள தோட்ட வீடுகளில் இன்று (16) ஏற்பட்ட தீ விபத்தில் ஆறு வீடுகள் பகுதியளவில் எரிந்து நாசமாகியுள்ளதாக ஹட்டன் பொலிஸார் தெரிவித்தனர்.

20 தோட்ட வீடுகளுக்குள் ஏற்பட்ட தீயானது ஏனைய வீடுகளுக்கு பரவாமல் தடுக்க தோட்ட நிர்வாக அதிகாரிகள் மற்றும் தோட்ட தொழிலாளர்கள் சமாளித்து வருகின்றனர்.

மூடப்பட்ட வீடு ஒன்றில் ஆரம்பித்த தீ மற்றைய வீடுகளுக்கும் பரவியதாகவும் தோட்ட வீடுகளின் வரிசையில் இருந்த 06 வீடுகள் பகுதியளவிலும் தீயில் எரிந்து நாசமாகியுள்ளதாக தோட்ட முகாமைத்துவ அதிகார சபை தெரிவித்துள்ளது.

இந்த தீ விபத்தில் யாருக்கும் காயம் ஏற்படவில்லை என்பதுடன், தீ விபத்துக்கான காரணம் இதுவரை வெளியாகவில்லை.

ஹட்டன் மின்சார வாடிக்கையாளர் சேவை நிலைய ஊழியர்கள் எரிந்த தோட்ட வீடுகளுக்கு வழங்கப்பட்டு வந்த மின்சாரத்தை துண்டிக்க நடவடிக்கை எடுத்துள்ளனர்.

தீயினால் ஏற்பட்ட சேதம் இதுவரை மதிப்பிடப்படவில்லை என்பதுடன், தீ விபத்து தொடர்பில் ஹட்டன் பொலிஸார் விசாரணைகளை மேற்கொண்டு வருகின்றனர்