22ஆவது அரசியலமைப்பு திருத்தச் சட்டமூலம் 178 மேலதிக வாக்குகளால் நேற்று (21) திருத்தங்களுடன் நிறைவேற்றப்பட்டது.

மசோதாவுக்கு ஆதரவாக 179 வாக்குகளும் எதிராக ஒரே ஒரு வாக்கும் பதிவாகின.

ஸ்ரீலங்கா பொதுஜன பெரமுனவின் கொழும்பு மாவட்ட நாடாளுமன்ற உறுப்பினர் கலாநிதி சரத் வீரசேகர சட்டமூலத்திற்கு எதிராக வாக்களித்தமை விசேட அம்சமாகும்.

வாக்கெடுப்பின் போது சபையில் இருந்த ஆளுங்கட்சியின் ஏனைய உறுப்பினர்கள் மற்றும் எதிர்க்கட்சி உறுப்பினர்கள் அனைவரும் (சமகி ஜன பலவேகய, ஜாதிய ஜன பலவேகய மற்றும் ஸ்ரீலங்கா சுதந்திரக் கட்சி) சட்டமூலத்திற்கு ஆதரவாக வாக்களித்தனர்.

வாக்குப்பதிவு நேரத்தில், அரசு மற்றும் எதிர்க்கட்சி உறுப்பினர்கள் நாற்பத்தாறு பேர் சபையில் இல்லை.

முன்னாள் ஜனாதிபதி மஹிந்த ராஜபக்ஷ, ஆளும் கட்சியின் பிரதான அமைப்பாளர் பிரசன்ன ரணதுங்க, சாகர காரியவசம், ஜோன்ஸ்டன் பெர்னாண்டோ, காமினி லோககே, ரோஹித அபேகுணவர்தன, ஜனக பண்டார தென்னகோன், சஞ்சீவ எதிரிமான்ன, பவித்ரா வன்னியாராச்சி, அகில இலங்கை தமிழ் காங்கிரஸின் தலைவர் கஜேந்திரகுமார் பொன்னம்பலம், த.தே.கூ. எம்.ஏ.சுமந்திரன், சாணக்கியன் இராசமாணிக்கம் உள்ளிட்ட எம்.பிக்கள் கலந்துகொள்ளவில்லை.

உறுப்பினர்களான சமல் ராஜபக்ஷ, நாமல் ராஜபக்ஷ மற்றும் ஷசீந்திர ராஜபக்ஷ ஆகியோர் சட்டமூலத்திற்கு ஆதரவாக வாக்களித்தனர்.

அரசாங்கத்தின் 22ஆவது அரசியலமைப்பு திருத்தச் சட்டமூலம் மீதான விவாதம் இரண்டு நாட்கள் நடைபெற்றது.

விவாதத்தின் போது ஆளும் கட்சி மற்றும் எதிர்க்கட்சி உறுப்பினர்கள் 50க்கும் மேற்பட்டோர் கருத்து தெரிவித்தனர்.

இரட்டைக் குடியுரிமை கொண்டவர்களின் பதவி உரிமையை நீக்குதல், சுயாதீன ஆணைக்குழுக்களுக்கு அதிகாரம் வழங்குதல், இரண்டரை வருடங்களுக்குப் பின்னர் பாராளுமன்றத்தைக் கலைக்கும் அதிகாரங்களை ஜனாதிபதிக்கு வழங்குதல் போன்ற பல விதிகள் புதிய அரசியலமைப்புத் திருத்தத்தில் இடம்பெற்றுள்ளன.