வரவு செலவுத் திட்டத்தின் பின்னர் அரசாங்கத்தின் கதி என்னவென்பதை ஶ்ரீலங்கா பொதுஜன பெரமுனவின் நாடாளுமன்ற உறுப்பினர் பேராசிரியர் சன்ன ஜயசுமண சுட்டிக்காட்டியுள்ளார்.

இந்த வருடம் பாராளுமன்றத்தில் சமர்ப்பிக்கப்படவுள்ள வரவு செலவுத் திட்டம் தோற்கடிக்கப்படும் அபாயம் இருப்பதாக அவர் குறிப்பிடுகின்றார்.

ஆளும் கட்சியில் பல கடுமையான பிளவுகளுக்கு மத்தியில் 22வது அரசியலமைப்பு திருத்தம் நிறைவேற்றப்பட்டதாக அவர் சுட்டிக்காட்டியுள்ளார்.

அரசாங்கத்தின் ஒரு குழு 22ஆம் திகதிக்கு ஆதரவளிக்கவில்லை எனவும் எதிர்வரும் வரவு செலவுத் திட்டத்திற்கு முன்னர் தமக்கு அமைச்சுப் பதவிகள் மற்றும் ஆளுநர் பதவிகளை தமது உறவினர்களுக்கு வழங்குமாறு அந்தக் குழு ஜனாதிபதிக்கு அழுத்தம் கொடுக்கவுள்ளதாக பாராளுமன்ற உறுப்பினர் ஜயசுமண தெரிவித்துள்ளார்.

கோரிக்கைகள் நிறைவேற்றப்படாவிட்டால் வரவு செலவுத் திட்டம் தோற்கடிக்கப்படும் எனவும் இருமுறை வரவு செலவுத் திட்டம் தோற்கடிக்கப்படுமாயின் நாடாளுமன்றம் கலைக்கப்படும் எனவும் அவர் தெரிவித்துள்ளார்.

தற்போது பாராளுமன்றத்தில் ஆளும் கட்சியின் பெரும்பான்மையானவர்கள் எட்டு முதல் பத்து உறுப்பினர்களைக் கொண்ட சிறிய எண்ணிக்கையில் தங்கியிருப்பதாக அவர் சுட்டிக்காட்டினார்.

ஊடகவியலாளர் சந்திப்பில் கலந்துகொண்டு கருத்து தெரிவிக்கும் போதே அவர் மேற்கண்டவாறு தெரிவித்தார்.