ஞானசார தேரருக்கு நிபந்தனையற்ற விடுதலை வழங்கப்படாவிட்டால், புதிய ஜனாதிபதியைத் தேர்ந்தெடுப்பது குறித்து பரிசீலிக்க வேண்டிய நிலை ஏற்படும் என பலாங்கொட கஸ்ஸப்ப தேரர் எச்சரிக்கை விடுத்துள்ளார்.
கடந்த சனிக்கிழமை (ஒக்டோபர் 17) வைத்தியசாலையில் அனுமதிக்கப்பட்டிருந்த காசப்ப தேரர், ஞாயிற்றுக்கிழமை (ஒக்டோபர் 18) கொழும்பு விஹாரமகாதேவி பூங்காவில் நடைபெற்று வரும் போராட்டத்தில் மீண்டும் கலந்துகொண்டு இந்தக் கருத்தைத் தெரிவித்துள்ளார்.
சிறைத்தண்டனை அனுபவித்து வரும் கலகொட அத்தே ஞானசார தேரரை நிபந்தனையின்றி விடுவிப்பதே தங்களது முதன்மையான நோக்கம் என அவர் குறிப்பிட்டுள்ளார்.
அரசாங்கம் தங்களது போராட்டத்தைத் தவறாகப் புரிந்துகொண்டுள்ளதாகத் தெரிவித்த கஸ்ஸப்ப தேரர், அரசாங்கத்தைக் கவிழ்ப்பதற்காகத் தாங்கள் போராட்டத்தில் ஈடுபடவில்லை என்றும், ஞானசார தேரரை விடுவிக்கும் பொறுப்பு ஜனாதிபதியிடமே உள்ளதாகவும் கூறியுள்ளார்.
ஜனாதிபதி தமது கோரிக்கையைத் தொடர்ந்து நிராகரித்தால், வேறு வழிகளைப் பரிசீலிக்க வேண்டியிருக்கும் எனத் தெரிவித்த அவர்,
“ஜனாதிபதி தொடர்ந்து பிடிவாதமாகச் செயற்பட்டால், அவரை விடுவிக்க வேறு சட்டபூர்வமான வழி இல்லாவிட்டால் என்ன செய்வது? தேவையானால் புதிய ஜனாதிபதியைத் தேர்ந்தெடுக்க வேண்டியிருக்கும்” எனத் தெரிவித்துள்ளார்.
மேலும், கடந்த சனிக்கிழமை வைத்தியசாலையில் அனுமதிக்கப்பட்டிருந்த போதிலும், ஞானசார தேரர் சிறையில் துன்பப்படும்போது தங்களால் வசதியாக இருக்க முடியாது என்பதால், சக பிக்குகள் வழங்க முன்வந்த மேலதிக வசதிகளையும் நிராகரித்ததாக அவர் தெரிவித்துள்ளார்.
வலியுடனேயே போராட்டத்தில் மீண்டும் கலந்துகொண்டதாகக் குறிப்பிட்ட கஸ்ஸப்ப தேரர், தொடரும் போராட்டத்திற்கு வலுச்சேர்ப்பதே தனது நோக்கம் என்றும் தெரிவித்துள்ளார்.
ஜனாதிபதி செயலகத்திற்கு அருகில் முன்னதாக முன்னெடுக்கப்பட்ட போராட்டங்களைத் தொடர்ந்து, ஞானசார தேரரின் விடுதலையை வலியுறுத்தி தற்போது விஹாரமகாதேவி பூங்காவில் பிக்குகள் மற்றும் ஆதரவாளர்களின் போராட்டம் தொடர்ந்து நடைபெற்று வருகின்றது.
