எதிர்வரும் உள்ளூராட்சி மன்றத் தேர்தலுக்கான வேட்புமனுக்களை ஏற்றுக்கொள்ளும் நடவடிக்கைகள் இன்று (20) நிறைவடைகின்றன.

இன்று நண்பகல் 12:00 மணிக்குப் பிறகு வேட்புமனுக்கள் ஏற்றுக்கொள்ளப்படமாட்டாது என தேர்தல் ஆணைக்குழு தெரிவித்துள்ளது.

336 உள்ளூராட்சி நிறுவனங்களுக்கான வேட்புமனுக்களை ஏற்றுக்கொள்ளும் நடவடிக்கை கடந்த 17 ஆம் திகதி தொடங்கியது.

 வேட்புமனுக்கள் ஏற்றுக்கொள்ளப்பட்ட பின்னர் தேர்தலுக்கான திகதி அறிவிக்கப்படும்.

இலங்கையில் புதுப்பிக்கத்தக்க எரிசக்தி திட்டங்கள் குறித்து அதானி தொடர்ந்து கலந்துரையாடி வருவதாக இந்திய ஊடகங்கள் செய்தி வெளியிட்டுள்ளன.

இந்த திட்டங்கள் தொடர்பாக அதானி மற்றும் இலங்கை அரசாங்கத்திற்கு இடையே இன்னும் கலந்துரையாடல்கள் நடந்து வருவதாக இந்தியாவின் “தி இந்து” செய்தித்தாள் செய்தி வெளியிட்டுள்ளது.

அந்தத் திட்டங்களுக்கான கட்டணங்கள் தொடர்பாக பரஸ்பர உடன்பாட்டை எட்டுவதற்கு பொருத்தமான கலந்துரையாடல்கள் நடைபெற்று வருவதாகத் தெரிவிக்கப்பட்டுள்ளது.

மன்னாரில் நிர்மானிக்கப்படவிருந்த புதுப்பிக்கத்தக்க காற்றாலை மின் திட்டத்திலிருந்து கட்டணப் பிரச்சினை காரணமாக விலகுவதாக அதானி நிறுவனம் சமீபத்தில் எழுத்துப்பூர்வ அறிவிப்பை வழங்கியிருந்தது.

இருப்பினும், கேள்விக்குரிய திட்டத்தை முற்றிலுமாக நிறுத்த எந்த நடவடிக்கையும் எடுக்கப்படவில்லை என்று இந்திய ஊடகங்கள் சுட்டிக்காட்டுகின்றன.

கட்டணங்கள் குறித்து பரஸ்பர உடன்பாட்டை எட்டிய பின்னர், ஜூன் மாதத்திற்குள் இந்தத் திட்டத்தின் பணிகள் மீண்டும் தொடங்கும் என்று “தி இந்து” செய்தித்தாள் தனது அறிக்கையில் மேலும் குறிப்பிட்டுள்ளது.

இதற்கிடையில், இலங்கை அரசாங்கமும் சமீபத்தில் அதானி நிறுவனத்துடன் தொடர்புடைய திட்டம் தொடர்பாக தொடர்ந்து கலந்துரையாடுவதாகக் கூறியது.

மரண தண்டனை விதிக்கப்பட்டு 9 வருடங்களாக வெலிக்கடை சிறையில் தடுத்து வைக்கப்பட்டுள்ள துமிந்த சில்வா, மீண்டும் வெலிக்கடை சிறைச்சாலை மருத்துவமனையில் அனுமதிக்கப்பட்டுள்ளதாக தெரிவிக்கப்படுகிறது.

சில வாரங்களுக்கு முன்பு சிறைச்சாலை வார்டுக்கு மாற்றப்பட்ட துமிந்த சில்வா, 'காதுப் பிரச்சினை' இருப்பதாகக் கூறி, சிறைச்சாலை மருத்துவமனையின் வார்டு எண் 3 இல் மீண்டும் அனுமதிக்கப்பட்டுள்ளதாகக் கூறப்படுகிறது.

துமிந்த சில்வா அனைத்து வசதிகளையும் அனுபவித்து வருவதாகவும், தனி ஆடம்பரமான கழிப்பறையை ஒதுக்கி வைத்திருப்பதாகவும், சிறைச்சாலைக்கு உணவு மற்றும் பானங்கள் கொண்டு வருவதற்காக தடுப்புக் கைதிகளை நியமித்து வருவதாகவும் தெரிவிக்கப்படுகிறது.

ஐக்கிய மக்கள் சக்தியின் தவிசாளர் பதவியில் இருந்து இம்தியாஸ் பாகிர் மாக்கார் இராஜினாமா செய்துள்ளார்.

அவர் தனது இராஜினாமா கடிதத்தை கட்சித் தலைவர் சஜித் பிரேமதாசவுக்கு அனுப்பி உள்ளார்.

தான் தவிசாளர் பதவியை இராஜினாமா செய்தாலும், தொடர்ந்து ஐக்கிய மக்கள் சக்தியிலேயே இருப்பேன் என்றும் அவர் குறிப்பிட்டுள்ளார்.

ஐவி குளோபல் கெம்பஸ் இலங்கையில் சர்வதேச மூன்றாம்நிலை கல்வியின் நிலைமாறு பாய்ச்சலொன்றினை குறிக்கும்விதமாக தன்னுடைய கதவுகளை உத்தியோகப்பூர்வமாக திறந்துள்ளது. முன்னணி உலகளாவிய உயர் கல்வி வழங்குநராகும் நோக்குடன், சர்வதேச சந்தைகளில் சிறந்து விளங்க மாணவர்களுக்கு வலுவூட்டும் உலகத்தரம் வாய்ந்த கல்விசார் நிகழ்ச்சித்திட்டங்கள் மற்றும் தொழிற்சார் பயிற்சிகளை இந்நிறுவனம் வழங்கவுள்ளது.

அறிமுக நிகழ்வானது கொழும்பு தாஜ் சமுத்திரா ஹோட்டலில் சமீபத்தில் இடம்பெற்றதுடன் கலாநிதி வின்யா எஸ்.ஆரியரத்ன, தலைவர் - இலங்கைக்கான சர்வோதய இயக்கம், கலாநிதி அஜித் பொல்வத்த, பதில் பிரதி பணிப்பாளர் - பொது மூன்றாம்நிலை மற்றும் தொழிற்பயிற்சி ஆணைக்குழு, பேரா.சமத் தர்மரத்தன, சமுதாய மருத்துவத்தின் தலைமை பேராசியர் - பேராதெனிய பல்கலைக்கழகம் ஆகியோரை உள்ளடக்கிய தனித்துவமிக்க சிறப்பு விருந்தினர்களின் பங்கேற்பினால் கௌரவப்படுத்தப்பட்டது.

சிங்கப்பூர் கல்வி உன்னதங்களில் வேர்கொண்டுள்ள, நிறுவனமானது, சர்வதேச தகுதிகள் மற்றும் தொழில்வாய்ப்புகளுக்கான பன்முகப்பட்ட பாதைகளினை உறுதிப்படுத்துவதற்காக, சிங்கப்பூர், ஐக்கிய இராச்சியம், அமெரிக்கா, அவுஸ்திரேலியா மற்றும் அதற்குகப்பாலுமாக பெருமைமிகு பல்கலைக்கழங்களுடன் கைகோர்க்கின்றது.

“ஐவி குளோபல் கெம்பசில், உலகின் எப்பாகத்திலும் வெற்றிப்பெறுவதற்காக அவர்களைத் தயார்ப்படுத்தும் உண்மையான அனுபவத்தினை மாணவர்களிற்கு வழங்கி, கல்வியில் காணப்படும் எல்லைகளை தகர்ப்பதில் நாம் அர்ப்பணிப்புடன் காணப்படுகின்றோம். பிரகாசமான எதிர்காலத்துக்கு இட்டுச்செல்லும் உலகத்தரமான கற்றல், துறைசார் வெளிப்படுத்தல்கள் மற்றும் தொழிற்சார் வழிப்படுத்தல்களில் ஒவ்வொரு மாணவருக்குமான அணுகலை உறுதிப்படுத்தி, சர்வதேச வாய்ப்புக்களுடன் உள்ளுர் திறன்களை இணைப்பது எமது பணியாகின்றது.” என்கிறார் ஐவி குளோபல் கெம்பசின் நிறுவுனரும் பிரதம நிறைவேற்று அதிகாரியுமான திரு. அர்ஷாத் ரெபை அவர்கள்.

ஐவி குளோபல் கெம்பசானது சர்வதேச வெற்றிகளுக்கு மாணவர்களை தயார்ப்படுத்த வடிவமைக்கப்பட்ட உலகளாவிய ரீதியில் அங்கீகரிக்கப்பட்ட நிகழ்ச்சித்திட்டங்களின் பன்முக மட்டங்களை வழங்குகின்றது. இவை அத்தியாவசிய கல்வி மற்றும் தொழிற்சார் திறன்களை வளர்க்கும் அடிப்படை நிகழ்ச்சித்திட்டங்கள், வியாபாரம், தகவல் தொழிநுட்பம், சந்தைப்படுத்தல், விருந்தோம்பல் போன்றவற்றில் விசேடத்துவமான டிப்ளோமா நிகழ்ச்சித்திட்டங்கள், மற்றும் சுய அனுபவங்களுக்கு முக்கியத்துவமளிப்பவை, மற்றும் சிங்கப்பூர், ஐக்கிய இராச்சியம், அமெரிக்கா, அவுஸ்திரேலியா மற்றும் ஏனைய நாடுகளிலான பல்கலைக்கழகங்களின் ஒருங்கிணைவுடன் இளமாணி மற்றும் முதுமாணி நிகழ்ச்சித்திட்டங்கள் என்பவற்றை உள்ளடக்கி,மாணவர்களிற்கு அவர்களது உயர் கல்வியினை உலகளாவிய ரீதியில் நிறைவு செய்வதற்கான பல்வேறு பாதைகளை வழங்குகின்றது.

மேலதிகமாக, ஐவி குளோபல் கெம்பஸ் மாணவர்கள் உலகளவில் அதிக போட்டித்தன்மை கொண்ட துறைகளில் வெற்றிபெறுவதற்கு தேவைப்படும் திறன்கள் மற்றும் வலையமைப்புக்களை பெறுவதனை உறுதிப்படுத்தி, ஐவி கேரியர் கெம்பஸ் ஊடாக தொழில் மைய வழிக்காட்டுதல்களையும் வழங்குகின்றது.

கலப்பு கற்றல் மாதிரி ஊடாக, ஐவி குளோபலானது உண்மை நேர கலப்பு கற்றலை அனுமதித்தும் உள்ளுர் மற்றும் சர்வதேச மாணவர்களுக்கான அணுகலை உறுதிப்படுத்தியும், அதனது வகுப்பறைகளுக்குள் அதிநவீன தொழில்நுட்பத்தினை ஒருங்கிணைக்கின்றது. இந்நிறுவனமானது தகுதியான குறைந்த வருமானம் பெறுகின்ற மாணவர்களுக்கு புலமைப்பரிசில் திட்டங்களுடன் ஆதரவளிப்பதுடன் பணிப்பயிற்சிகள், வலையமைப்பாக்க வாய்ப்புக்கள் மற்றும் பணியிட தேர்வுகள் என்பவற்றை வழங்குவதற்காக முன்னணி நிறுவனங்களுடனும் கைகோர்க்கின்றது. மேலும், அதனது தொழில்வாண்மை சுழலானது சுயதொழில் மற்றும் தலைமைத்துவம் போன்ற கலாச்சாரங்களை வளர்ப்பதற்காக வழிகாட்டல் நிகழ்ச்சித்திட்டங்கள், துவக்க பொறிமுறைகள், மற்றும் புத்தாக்க ஆய்வுகூடங்கள் என்பவற்றை வழங்குகின்றது. இதனது உலகளாவிய இணைப்பு மற்றும் எதிர்கால மைய அணுகுமுறையுடன், ஐவி குளோபல் கெம்பசானது இலங்கையிலும் அதற்கப்பாலும் சர்வதேச கல்வியில் புதிய நியமங்களை விதித்துச்செல்கின்றது.

ஐவி குளோபல் கெம்பஸ் இல.141, காலி வீதி, தெஹிவளையில் அமைந்துள்ளது. ஐவி குளோபல் கெம்பஸ் குறித்தும் அதனது நிகழ்ச்சித்திட்டங்கள் குறித்தும் மேலும் அறிந்துக்கொள்ள  www.ivyglobalcampus.com அல்லது மின்னஞ்சல் வாயிலாக This email address is being protected from spambots. You need JavaScript enabled to view it. அல்லது  தொலைபேசியில் 011 2721234 ஊடாக அறிந்துக்கொள்ளலாம்.

பெற்றோர்களால் தாங்க முடியாத அளவுக்கு பாடசாலை அபிவிருத்தி கட்டணங்கள் அதிகரிக்கப்பட்டுள்ளதாகவும், எனவே கல்வி அமைச்சு உடனடியாக அந்தக் கட்டணங்களைக் குறைக்க தலையிட வேண்டும் என்றும் இலங்கை ஆசிரியர் சங்கத்தின் பொதுச் செயலாளர் ஜோசப் ஸ்டாலின் தெரிவித்தார்.

கொழும்பில் உள்ள முக்கிய பாடசாலைகளில் அபிவிருத்தி கட்டணமாக ரூ.11,000, ரூ.8,000, ரூ.7,000 போன்றவற்றை வசூலிப்பதாக பெற்றோர்கள் தனது சங்கத்தில் புகார் அளித்துள்ளதாகவும் அவர் கூறினார்.

மேலும் பேசிய ஜோசப் ஸ்டாலின் கூறியதாவது:

"ஒவ்வொரு பாடசாலையிலும் தன்னிச்சையாக அபிவிருத்தி கட்டணங்கள் அதிகரிக்கப்பட்டுள்ளன. கல்வி அமைச்சின் கீழ் இந்த கட்டணங்கள் அதிகரிக்கப்படுகின்றன. அப்பாவி குழந்தைகளும் அவர்களின் பெற்றோரும் இதனால் பாதிக்கப்படுகின்றனர். இந்த வழியில் அபிவிருத்தி கட்டணங்களை அதிகரிக்க அனுமதிக்க வேண்டாம் என்று கல்வி அதிகாரிகளிடம் கேட்டுக்கொள்கிறோம். வசூலிக்கப்படும் கட்டணம் சரியானதா என்பது குறித்து கல்வி அமைச்சகம் உடனடியாக விசாரணை நடத்த வேண்டும் என்று கேட்டுக்கொள்கிறோம். கொழும்பில் உள்ள முக்கிய பாடசாலைகளில் இந்த நியாயமற்ற அபிவிருத்தி கட்டணங்கள் அதிகரிக்கப்பட்டுள்ளன. சில பாடசாலைகளில் குழந்தைகளுக்கான வசதிகள் கூட இல்லை. இருப்பினும், அபிவிருத்தி கட்டணம் அதிகரிக்கப்படுகிறது."

இம்முறை நடைபெறவுள்ள உள்ளூராட்சி மன்ற தேர்தலில்(2025) இலங்கை தொழிலாளர் காங்கிரஸ் சார்பாக போட்டியிடுவதற்காக விண்ணப்பித்துள்ள வேட்பாளர்களுக்கு வாய்ப்பளிப்பதற்கான தேர்வுகள் இடம்பெற்றுவரும் இவ்வேளையில், ஒரு சிலரின் கருத்துக்களை அடிப்படையாகக் கொண்டு தனித்தீர்மானம் எடுக்க வேண்டாம் என்று கேட்டுக்கொள்ளப்பட்டுள்ளது.

மேலும் தான் உட்பட இ.தொ.கா தலைவர் செந்தில் தொண்டமான், நிதிச் செயலாளரும் தவிசாளருமான மருதபாண்டி ராமேஸ்வரன், உள்ளடங்கிய உயர்மட்ட குழுவினர்களால் இணைந்து எடுக்கப்படும் தீர்மானத்திற்கு அமையவே வேட்பாளர்களின் இறுதி பட்டியல் தயார்படுத்தப்படும் என ஜீவன் தொண்டமான் தெரிவித்துள்ளார். 

ஆகவே எந்த ஒரு நபரும் தவறான வதந்திகளை கருத்திற்கொண்டு செயற்பட வேண்டாமென கட்சியின் உயர்பீடம் கேட்டுக்கொண்டுள்ள அதே வேலையில், இன்னும் ஓரிரு நாட்களில் இறுதி பெயர்பட்டியல் வெளியிடப்படும் என்றார். 

2023 ஆம் ஆண்டு மாத்தறை வெலிகமவில் உள்ள W15 ஹோட்டலில் நடந்த துப்பாக்கிச் சூடு சம்பவம் தொடர்பாக தன்னைக் கைது செய்ய மாத்தறை நீதவான் நீதிமன்றம் பிறப்பித்த உத்தரவை அமுல்படுத்துவதைத் தடுக்க இடைக்காலத் தடை விதிக்கக் கோரி, முன்னாள் பொலிஸ் மா அதிபர் தேசபந்து தென்னகோன் தாக்கல் செய்த ரிட் மனுவை மேன்முறையீட்டு நீதிமன்றம் இன்று (17) தள்ளுபடி செய்தது.

அதற்கமைய, தேசபந்து தென்னகோனை உடனடியாகக் கைது செய்து நீதிமன்றத்தில் ஆஜர்படுத்துமாறு குற்றப் புலனாய்வுப் திணைக்களத்திற்கு நீதிபதிகள் அமர்வு உத்தரவிட்டது.

தேசபந்து தென்னகோன் தாக்கல் செய்த ரிட் மனு, கடந்த12 ஆம் திகதி மேல்முறையீட்டு நீதிமன்றால் பரிசீலனைக்கு எடுத்துக்கொள்ளப்பட்டது.

மேல்முறையீட்டு நீதிமன்றத்தின் பதில் தலைவர் நீதிபதி முகமது லாபர் தாஹிர் மற்றும் நீதிபதி சரத் திசாநாயக்க ஆகியோர் அடங்கிய மேல்முறையீட்டு நீதிமன்ற அமர்வு இன்று காலை மேற்படி உத்தரவை பிறப்பித்துள்ளது.