கிராமிய அபிவிருத்தி, சமூகப் பாதுகாப்பு மற்றும் சமூக வலுவூட்டல் அமைச்சின் ஊடாக, 2026ஆம் ஆண்டில் குறைந்த வருமானம் பெறும் குடும்பங்களைச் சேர்ந்த 40 வயதுக்கு மேற்பட்ட பார்வைக் குறைபாடுடைய 22,500 பேருக்கு இலவச கண் பரிசோதனைகளை மேற்கொண்டு மூக்குக் கண்ணாடிகளை வழங்க நடவடிக்கை எடுக்கப்பட்டுள்ளதாகத் தெரிவிக்கப்பட்டுள்ளது.
இதற்கான முன்னெடுப்புகளை மாற்றுத்திறனாளிகளுக்கான தேசிய செயலகம் மேற்கொண்டு வருவதாகவும் தெரிவிக்கப்படுகிறது.
அத்துடன், 18 வயதுக்குட்பட்ட பார்வைக் குறைபாடுடைய சிறுவர்களுக்கு மூக்குக் கண்ணாடிகளைக் கொள்வனவு செய்வதற்காக ஒருவருக்கு தலா 50,000 ரூபா நிதியுதவி வழங்கவும் நடவடிக்கை எடுக்கப்பட்டுள்ளது.
மேலும், மூக்குக் கண்ணாடிகள் உள்ளிட்ட மாற்றுத்திறனாளிகளுக்குத் தேவையான உதவி உபகரணங்களை வழங்குவதற்காக, 2026ஆம் ஆண்டுக்கான அமைச்சின் நிதி ஒதுக்கீட்டின் கீழ் 21 மில்லியன் ரூபா ஒதுக்கப்பட்டுள்ளதாகத் தெரிவிக்கப்பட்டுள்ளது.
