பௌத்த சாசனத்திற்கு போர்த்துக்கேயர்களை விடவும் அதிக அழிவை தற்போதைய தேசிய மக்கள் சக்தி (NPP) அரசாங்கம் ஏற்படுத்தி வருவதாக வணக்கத்திற்குரிய உலபனே சுமங்கல தேரர் குற்றஞ்சாட்டியுள்ளார்.
தேசிய மக்கள் சக்தி அரசாங்கத்தின் ஆபத்தை ஆரம்பத்திலிருந்தே தாம் உணர்ந்திருந்ததாகவும், இறுதியில் இந்த மதச்சார்பற்ற அரசாங்கம் பிக்குகளின் காவி உடைகளைக் களையும் நிலைக்குச் சென்றுள்ளதாகவும் அவர் தெரிவித்துள்ளார்.
ஞானசார தேரருக்கு வழங்கப்பட்ட ஜனாதிபதி மன்னிப்பு, அதிகாரிகளின் தொழில்நுட்பத் தவறை அடிப்படையாகக் கொண்டு இரத்துச் செய்யப்பட்டு, ஏற்கெனவே அனுபவித்து முடித்திருக்க வேண்டிய தண்டனை மீண்டும் விதிக்கப்பட்டிருப்பது பெரும் அநீதி என்றும் உலபனே சுமங்கல தேரர் சுட்டிக்காட்டியுள்ளார்.
இந்தத் தவறுக்காகத் தண்டிக்கப்பட வேண்டியவர்கள் அதிகாரிகளே தவிர, ஞானசார தேரர் அல்ல என்றும் அவர் தெரிவித்துள்ளார். அரசாங்கம் பௌத்த சாசனத்தின் மீது கொண்டுள்ள வெறுப்பைத் தீர்த்துக்கொள்வதற்காக ஞானசார தேரரைப் பயன்படுத்துவதாகவும் அவர் குற்றஞ்சாட்டியுள்ளார்.
கோட்டபிட்டியே ராகுல அனுநாயக்க தேரர் உள்ளிட்ட 30 பிக்குகளின் அறிவுரைகளையும் ஆலோசனைகளையும் பின்பற்றாமல், அவர்களுக்கு எதிராக தேசிய மக்கள் சக்தி அரசாங்கம் தடையுத்தரவைப் பெற்றுள்ளதாகவும் உலபனே சுமங்கல தேரர் தெரிவித்துள்ளார்.
பிரித்தானிய ஆட்சிக் காலத்தில் வணக்கத்திற்குரிய வலியாபொல சுமங்கல தேரருக்கு இழைக்கப்பட்ட அவமதிப்புக்குப் பின்னர், இவ்வாறானதொரு அவமானத்தை ஏற்படுத்தியிருப்பது தற்போதைய அரசாங்கமே என்றும் அவர் குற்றஞ்சாட்டியுள்ளார்.
பௌத்த சாசனத்திற்கு அரசாங்கம் ஏற்படுத்திய அவமதிப்பைச் சரிசெய்யும் வரை தமது போராட்டத்தைக் கைவிடப்போவதில்லை என்றும், விரைவில் பெலவத்தைக்கு வருகை தருவதாகவும் அவர் மேலும் தெரிவித்துள்ளார்.
கொழும்பு விகாரமகாதேவி பூங்காவில் நேற்று (16) “சிவுரட்ட நீதி” (காவி உடைக்கு நீதி) என்ற போராட்டத்தை மீண்டும் ஆரம்பித்தபோது உலபனே சுமங்கல தேரர் இதனைத் தெரிவித்தார்.
