அரசாங்கத்தினால் கொண்டுவரப்பட்டுள்ள புதிய பயங்கரவாதத் தடுப்புச் சட்டம் மற்றும் ஒழுங்கமைக்கப்பட்ட குற்றங்களைத் தடுக்கும் சட்டம் ஆகியவற்றைப் பார்க்கும்போது ஒருவித அச்சம் ஏற்படுவதாக ஐக்கிய குடியரசு முன்னணியின் தலைவரும் முன்னாள் அமைச்சருமான பாட்டலி சம்பிக்க ரணவக்க தெரிவித்துள்ளார்.
தற்போதைய அரசாங்கம் ஆட்சிக்கு வருவதற்கு முன்னர், தேசிய மக்கள் சக்தியின் “வளமான நாடு – அழகான வாழ்க்கை” என்ற தேர்தல் விஞ்ஞாபனத்தில் பயங்கரவாதத் தடுப்புச் சட்டம் உள்ளிட்ட அனைத்து அடக்குமுறைச் சட்டங்களையும் நீக்கி, மக்களின் சிவில் உரிமைகள், சுதந்திரம், மனித கண்ணியம் மற்றும் ஜனநாயகத்தைப் பாதுகாப்பதாக உறுதியளித்திருந்ததாக அவர் குறிப்பிட்டுள்ளார்.
“அதிகாரம் ஊழலுக்கு வழிவகுக்கிறது; அளவுக்கு அதிகமான அதிகாரம் அளவுக்கு அதிகமான ஊழலுக்கு வழிவகுக்கிறது” என்ற பொதுவான கூற்று தற்போது யதார்த்தமாகி வருவதாகவும் முன்னாள் அமைச்சர் தெரிவித்துள்ளார்.
மக்களால் அரசாங்கத்திற்கு வழங்கப்பட்டுள்ள மிகப்பெரிய அதிகாரம் தவறான முறையில் பயன்படுத்தப்படுகிறதா என்ற சந்தேகம் தற்போது பல்வேறு தரப்புகளிலும் எழுந்துள்ளதாகவும் அவர் சுட்டிக்காட்டியுள்ளார்.
மேலும் கருத்துத் தெரிவித்த பாட்டலி சம்பிக்க ரணவக்க கூறியதாவது:
“இந்த அரசாங்கம் அரச பயங்கரவாதத்திலிருந்து மக்களைப் பாதுகாப்பது தொடர்பான புதிய சட்டமொன்றைக் கொண்டுவந்துள்ளது. ஆனால், இந்த அரசாங்கம் ஆட்சிக்கு வருவதற்காக வெளியிட்ட ‘வளமான நாடு – அழகான வாழ்க்கை’ என்ற தேர்தல் விஞ்ஞாபனத்தில், பயங்கரவாதத் தடுப்புச் சட்டம் உள்ளிட்ட அனைத்து அடக்குமுறைச் சட்டங்களையும் நீக்கி, மக்களின் சிவில் உரிமைகள், சுதந்திரம், மனித கண்ணியம் மற்றும் ஜனநாயகத்தைப் பாதுகாப்பதாகத் தெளிவாகக் குறிப்பிட்டிருந்தது.
தற்போது கொண்டுவரப்பட்டுள்ள சட்டங்களைப் பார்க்கும்போது, குறிப்பாகப் புதிய பயங்கரவாதத் தடுப்புச் சட்டம் மற்றும் ஒழுங்கமைக்கப்பட்ட குற்றங்களைத் தடுக்கும் சட்டம் ஆகியவற்றை கடந்தகால சம்பவங்களுடன் ஒப்பிட்டுப் பார்க்கையில், ஒருவித அச்சமூட்டும் நிலைமை உருவாகியுள்ளதாகக் கூற வேண்டும்.
அதிகாரம் ஊழலுக்கு வழிவகுக்கிறது; அளவுக்கு அதிகமான அதிகாரம் மிக மோசமான ஊழலுக்கு வழிவகுக்கிறது என்ற கூற்றை நாம் அறிவோம். எனவே, இந்த அரசாங்கத்திற்கும் ஜனாதிபதிக்கும் பிரதமருக்கும் மக்கள் வழங்கியுள்ள அளப்பரிய அதிகாரம் தவறான முறையில் பயன்படுத்தப்படுகிறதா என்ற சந்தேகம் தற்போது பல்வேறு தரப்புகளிலிருந்தும் எழுந்துகொண்டிருக்கிறது.”
