ஜனாதிபதி அலுவலகத்திற்கு அதிக நிதி ஒதுக்கீடு

ரூ. 11.2 பில்லியன் ஒதுக்கீடு – தினசரி செலவு ரூ. 30.7 மில்லியன் எனக் குற்றச்சாட்டு

புதிய ஒதுக்கீட்டுச் சட்டமூலத்தின்படி, ஜனாதிபதி அலுவலகத்திற்காக ரூ. 11.2 பில்லியன் ஒதுக்கப்பட்டுள்ளதாகவும், இதன்படி நாளாந்த செலவு ரூ. 30.7 மில்லியன் வரை அதிகரித்துள்ளதாகவும் முன்னாள் மாகாண ஆளுநர் கீர்த்தி தென்னகோன் தெரிவித்துள்ளார்.

கொழும்பில் நடைபெற்ற விசேட ஊடகவியலாளர் சந்திப்பில் கலந்துகொண்டு உரையாற்றியபோதே அவர் இந்தத் தகவல்களை வெளியிட்டார்.

அரசாங்கத்தின் புதிய வரவு செலவுத் திட்ட மதிப்பீடுகளை ஆராய்ந்த அவர், அரசாங்கத்தின் மொத்த செலவினம் ரூ. 9,920 பில்லியனாக மதிப்பிடப்பட்டுள்ளதாகக் குறிப்பிட்டார்.

இதில் ரூ. 4,820 பில்லியன், அதாவது மொத்த அரச செலவினத்தில் 49 சதவீதம், பெற்றுக்கொள்ளப்பட்ட கடன்களையும் அவற்றுக்கான வட்டித் தவணைகளையும் செலுத்துவதற்காக மட்டுமே செலவிடப்படுவதாக அவர் தெரிவித்தார்.

மேலும், நாட்டின் மொத்த அரச செலவினத்தில் 26.6 சதவீதம் ஜனாதிபதியின் நேரடிக் கட்டுப்பாட்டின் கீழுள்ள அமைச்சுகளுக்கு ஒதுக்கப்பட்டுள்ளதாகவும் அவர் சுட்டிக்காட்டினார்.

அதன்படி, ஒதுக்கப்பட்டுள்ள நிதி விபரங்கள் வருமாறு:

• நிதி அமைச்சு: ரூ. 858 பில்லியன்
• பாதுகாப்பு அமைச்சு: ரூ. 458 பில்லியன்
• டிஜிட்டல் அமைச்சு: ரூ. 17 பில்லியன்
• ஜனாதிபதி அலுவலகம்: ரூ. 11.2 பில்லியன்

ஜனாதிபதி அலுவலகத்திற்காக ஒதுக்கப்பட்டுள்ள ரூ. 11.2 பில்லியனை ஆண்டின் 365 நாட்களால் வகுக்கும்போது, நாளொன்றுக்கான செலவு ரூ. 30.7 மில்லியனாக அமைவதாக கீர்த்தி தென்னகோன் தெரிவித்தார்.

ஜனாதிபதி அநுர குமார திஸாநாயக்க எதிர்க்கட்சியில் இருந்தபோது, கடந்த ஆட்சியாளர்களின் அலுவலகச் செலவான ரூ. 2.6 பில்லியனை மணித்தியாலங்கள் மற்றும் நிமிடங்களின் அடிப்படையில் கணக்கிட்டுக் காட்டி, அந்தச் செலவுகளை விமர்சித்ததன் மூலம் ஆட்சியைக் கைப்பற்றியதை அவர் நினைவுபடுத்தினார்.

அப்போது அந்தச் செலவுகளை முழுமையான மோசடி மற்றும் வீண் விரயம் எனக் கண்டித்த தலைவர்கள், இன்று ஆட்சிக்கு வந்த பின்னர் அதனைவிட ஐந்து முதல் ஆறு மடங்கு அதிகமான செலவுகளை மேற்கொள்வதாக அவர் கடுமையாகக் குற்றஞ்சாட்டினார்.

அத்துடன், அரசாங்கத்தின் இத்தகைய தன்னிச்சையான நடவடிக்கைகளையும் செலவுகளையும் விமர்சிக்கும் அனைத்துத் தரப்பினரையும் ‘ஒழுங்கமைக்கப்பட்ட குற்றவாளிகள்’ மற்றும் ‘பயங்கரவாதிகள்’ என முத்திரை குத்துவதற்கு ஆட்சியாளர்கள் முயற்சிப்பதாகவும் அவர் குற்றஞ்சாட்டினார்.

அரச சார்பற்ற நிறுவனங்களை ஒடுக்குவதற்கும், உண்மையான தகவல்கள் மக்களைச் சென்றடைவதைத் தடுப்பதற்கும் அடக்குமுறைச் சட்டங்களைக் கொண்டுவர அரசாங்கம் தயாராகி வருவதாகவும் அவர் தெரிவித்தார்.

ஜனநாயகத்தைப் பாதுகாப்பதற்காக இத்தகைய ஆட்சிமுறைகளைத் தோற்கடிக்க வேண்டும் என்றும் கீர்த்தி தென்னகோன் மேலும் வலியுறுத்தினார்.