ஹோமாகம பொலிஸ் காவலில் இளைஞர் ஒருவர் உயிரிழந்த சம்பவமானது, சட்டத்தை அமுல்படுத்தும் நிறுவனங்களுக்கு உரிய கண்காணிப்பின்றி அதிகாரங்களை வழங்குவதன் விளைவுகளை மீண்டும் உறுதிப்படுத்துவதாக இலங்கை சட்டத்தரணிகள் சங்கத்தின் முன்னாள் தலைவர், ஜனாதிபதி சட்டத்தரணி சாலிய பீரிஸ் தெரிவித்துள்ளார்.
கைது செய்வதற்கும் சோதனைகளை மேற்கொள்வதற்கும் வழங்கப்படும் அதிகாரங்கள் போதிய கண்காணிப்புக்கும் கட்டுப்பாட்டுக்கும் உட்படுத்தப்பட வேண்டியதன் அவசியத்தை இச்சம்பவம் உணர்த்துவதாகவும் அவர் சுட்டிக்காட்டியுள்ளார்.
அளவுக்கு அதிகமான அதிகாரங்களும் போதிய கட்டுப்பாடின்மையும் இணைந்து, சித்திரவதைகள் இடம்பெறுவதற்கும் அவற்றுக்குப் பொறுப்பானவர்கள் தண்டனையிலிருந்து தப்பிக்கும் நிலை தொடர்வதற்கும் வழிவகுக்கும் எனவும் அவர் குறிப்பிட்டுள்ளார்.
தனது பேஸ்புக் கணக்கில் பதிவொன்றை வெளியிட்ட அவர் இதனைத் தெரிவித்துள்ளார்.
