ஓய்வு வயதைத் திருத்தி அனுபவமிக்க நிபுணர்களின் சேவையைப் பெற வேண்டும் – பிரதி அமைச்சர்
நாட்டின் நீதித்துறை கட்டமைப்பில் தற்போது குவிந்துள்ள 11 இலட்சத்திற்கும் அதிகமான வழக்குகளை துரிதமாகத் தீர்த்து, மக்களுக்கு நீதியை நிலைநாட்டுவதற்காக ஓய்வு வயது வரம்புகளைத் திருத்தி, அனுபவமிக்க நிபுணர்களின் சேவையை நாட்டிற்காகப் பெற்றுக்கொள்ள வேண்டும் என ஊடகப் பிரதி அமைச்சர் சட்டத்தரணி கௌஷல்யா ஆரியரத்ன தெரிவித்தார்.
தற்போது இலங்கையின் சராசரி ஆயுட்காலம் 73 வயதைக் கடந்துள்ளதாக சுட்டிக்காட்டிய பிரதி அமைச்சர், மக்கள் உடல் மற்றும் மன ரீதியாக நல்ல ஆரோக்கியத்துடன் இருக்கும் காலகட்டத்தில் அவர்களை ஓய்வுபெறச் செய்யும் வயது வரம்புகளிலும் மாற்றம் ஏற்படுத்தப்பட வேண்டும் என தெரிவித்தார்.
ஓய்வு பெறும் வயதை நீடிப்பதன் மூலம் அவர்களிடம் உள்ள முதிர்ச்சியான அனுபவங்களை நாட்டின் நலனுக்காக அதிகபட்சமாகப் பயன்படுத்த முடியும் எனவும், இவ்வாறான பெறுமதிமிக்க மனித வளத்தை குறைந்த வயதிலேயே அரச கட்டமைப்பிலிருந்து வெளியேற்றக் கூடாது எனவும் அவர் வலியுறுத்தினார்.
அதேவேளை, நீதிமன்ற நடவடிக்கைகளில் வழக்குகள் தாமதமடைவதற்கான முக்கிய காரணியாக இருந்த அரச இரசாயனப் பரிசோதகர் அறிக்கைகளை வெளியிடும் வேகம் தற்போது மூன்று மடங்காக அதிகரிக்கப்பட்டுள்ளதாகவும் அவர் குறிப்பிட்டார்.
சட்டத்தை அமுல்படுத்தும் நிறுவனங்களின் உட்கட்டமைப்பு மற்றும் மனித வள மேம்பாட்டிற்காக அரசாங்கம் ஏற்கனவே நடவடிக்கைகளை மேற்கொண்டு வருவதாகவும், புதிய நீதிமன்றங்களை நிறுவுவதற்கும் முழு நீதித்துறை கட்டமைப்பையும் டிஜிட்டல் மயமாக்குவதற்கும் தேவையான நடவடிக்கைகள் எடுக்கப்பட்டுள்ளதாகவும் பிரதி அமைச்சர் மேலும் தெரிவித்தார்.
