இந்த மாத இறுதி முதல் டீசல் லீற்றர் ஒன்றுக்கு ரூ.80 முதல் ரூ.100 வரையிலான மானியத்தை வழங்குவது தொடர்பில் அரசாங்கம் பரிசீலித்து வருவதாக எரிசக்தி அமைச்சர் அனுர கருணாதிலக்க தெரிவித்துள்ளார்.
இலங்கை பெற்றோலியக் கூட்டுத்தாபனம் (CPC) உள்ளிட்ட எரிபொருள் விற்பனையாளர்கள், எரிபொருள் விற்பனையின் மூலம் எதிர்கொண்டுள்ள நட்டம் தொடர்பான தரவுகளை வழங்குமாறு கோரப்பட்டுள்ளதாக அமைச்சர் குறிப்பிட்டுள்ளார்.
குறித்த தரவுகளை ஆய்வு செய்த பின்னர், டீசலுக்கு வழங்கப்படவுள்ள துல்லியமான மானியத் தொகை தீர்மானிக்கப்படும் எனவும் அமைச்சர் தெரிவித்துள்ளார்.
இதனிடையே, இந்த மாத இறுதியில் எரிபொருள் விலை திருத்தம் செய்யப்படவுள்ளது. தற்போதுள்ள எரிபொருள் விலைகளை முடிந்தவரை தொடர்ந்து பேணுவதுடன், டீசல் விலை அதிகரிப்பைத் தடுப்பது தொடர்பிலும் அரசாங்கம் கவனம் செலுத்தி வருகிறது.
இதேவேளை, சர்வதேச சந்தையில் கச்சா எண்ணெயின் விலையும் தற்போது உயர்ந்த மட்டத்தில் காணப்படுகிறது. WTI சந்தையில் ஒரு பீப்பாய் கச்சா எண்ணெயின் விலை சுமார் 92.41 அமெரிக்க டொலராகவும், பிரித்தானிய பிரெண்ட் சந்தையில் ஒரு பீப்பாய் கச்சா எண்ணெயின் விலை 104.03 அமெரிக்க டொலராகவும் பதிவாகியுள்ளது.
