முன்னாள் ஜனாதிபதி மகிந்த ராஜபக்ஷவின் மகன் யோஷித ராஜபக்ஷ மற்றும் அவரது பாட்டி டேசி ஃபோரஸ்ட் ஆகியோருக்கு எதிராக தாக்கல் செய்யப்பட்டுள்ள வழக்கு இன்று (28) கொழும்பு மேல் நீதிமன்றத்தில் விசாரணைக்கு எடுத்துக்கொள்ளப்பட்டது.
இதன்போது முன்வைக்கப்பட்ட விடயங்களை பரிசீலித்த நீதிபதி, வழக்கை முன் விசாரணை மாநாட்டுக்காக எதிர்வரும் நவம்பர் 3ஆம் திகதி மீண்டும் அழைக்குமாறு உத்தரவிட்டார்.
வழக்கு இன்று விசாரணைக்கு எடுத்துக்கொள்ளப்பட்டபோது, முதலாவது பிரதிவாதியான யோஷித ராஜபக்ஷ நீதிமன்றத்தில் ஆஜராகியிருந்தார். எனினும், இரண்டாவது பிரதிவாதியான டேசி ஃபோரஸ்ட் நீதிமன்றத்தில் ஆஜராகவில்லை.
சுமார் 57 மில்லியன் ரூபாய் சட்டவிரோதமாக ஈட்டப்பட்ட பணத்தை மூன்று வங்கிக் கணக்குகளில் வைப்பிலிட்டதன் மூலம் பணச் சலவை தடுப்புச் சட்டத்தின் கீழ் குற்றம் புரிந்ததாக குற்றஞ்சாட்டி, யோஷித ராஜபக்ஷ மற்றும் டேசி ஃபோரஸ்ட் ஆகியோருக்கு எதிராக சட்டமா அதிபரால் இந்த வழக்கு தாக்கல் செய்யப்பட்டுள்ளது.
