அநுராதபுரத்தில் இடம்பெற்ற தாக்குதலில் காயமடைந்து வைத்தியசாலையில் சிகிச்சை பெற்று வந்தபோது, ஜனாதிபதியின் பாரியார் தன்னைத் தொலைபேசியில் தொடர்புகொண்டு நலம் விசாரித்ததாக ராஜாங்கனை சத்தாரதன தேரர் தெரிவித்துள்ளார்.
தாக்குதலுக்குப் பின்னர் தலையில் கட்டுகளுடன் சமூக ஊடகத்தின் ஊடாக வெளியிட்ட விசேட காணொளி ஒன்றிலேயே அவர் இதனைத் தெரிவித்துள்ளார்.
வைத்தியசாலையில் சிகிச்சை பெற்று வந்தபோது ஜனாதிபதியின் பாரியாருக்கு மேலதிகமாக, அமைச்சர் வசந்த சமரசிங்க, நாமல் கருணாரத்ன, வைத்தியசாலை பணிப்பாளர் மற்றும் பல பொலிஸ் அதிகாரிகளும் தன்னைப் பற்றி விசாரித்ததாக அவர் குறிப்பிட்டுள்ளார்.
இது தொடர்பில் அவர் மேலும் தெரிவிக்கையில்,
“நான் வைத்தியசாலையில் இருந்தபோது ஜனாதிபதியின் பாரியார் என்னைத் தொலைபேசியில் தொடர்புகொண்டு நலம் விசாரித்தார். நான் ஒருபோதும் எதிர்பார்க்காத ஒரு விடயம் அது. அதேபோன்று அமைச்சர் வசந்த சமரசிங்க, அமைச்சர் நாமல் கருணாரத்ன உள்ளிட்ட பலரும் என்னைப் பற்றி விசாரித்தனர். அவர்கள் அனைவருக்கும் எனது நன்றியையும் புண்ணியத்தையும் தெரிவித்துக்கொள்கிறேன்” எனக் குறிப்பிட்டுள்ளார்.
தன் மீது நடத்தப்பட்ட தடிகள் மற்றும் பொல்லுகளால் மேற்கொள்ளப்பட்ட தாக்குதல், நேரடியாக உயிரைப் பறிக்கும் நோக்கத்துடன் நடத்தப்பட்டதாகவும், ருவன்வெலிசாய மகா தூபியின் ஆசீர்வாதத்தினாலேயே தான் உயிர் பிழைத்ததாகவும் சத்தாரதன தேரர் வலியுறுத்தியுள்ளார்.
மேலும், பலாங்கொட கஸ்ஸப தேரர் உள்ளிட்ட சிலர் தற்போதைய அரசாங்கத்திற்கு நெருக்கடிகளை ஏற்படுத்துவதன் மூலம் பௌத்த சாசனத்திற்கும் நாட்டிற்கும் அழிவை ஏற்படுத்த முயற்சிப்பதாகவும் அவர் கடுமையான குற்றச்சாட்டுகளை முன்வைத்துள்ளார்.
தான் எந்தவொரு தனிப்பட்ட இலாபத்தையோ அல்லது பணத்தையோ எதிர்பார்த்துச் செயற்படவில்லை எனக் குறிப்பிட்ட அவர், நாட்டையும் பௌத்த சாசனத்தையும் தூய்மைப்படுத்தி மக்களுக்கு நிவாரணங்களை வழங்கும் தற்போதைய ஜனாதிபதியின் வேலைத்திட்டத்திற்கு எதிராக முன்னெடுக்கப்படும் எந்தவொரு சதித்திட்டத்தையும் தோற்கடிக்க உயிரையும் பொருட்படுத்தாது செயற்படுவேன் என்றும் தெரிவித்துள்ளார்.
அண்மையில் அநுராதபுரம் பகுதியில் பலாங்கொட கஸ்ஸப தேரர் கலந்துகொண்ட நிகழ்வொன்றுக்கு அருகில் ராஜாங்கனை சத்தாரதன தேரருக்கும் மற்றுமொரு குழுவினருக்கும் இடையில் முறுகல் நிலை ஏற்பட்டது.
இதன்போது நடத்தப்பட்ட தாக்குதலில் காயமடைந்த சத்தாரதன தேரர் அநுராதபுரம் போதனா வைத்தியசாலையில் அனுமதிக்கப்பட்டார்.
இந்தச் சம்பவம் தொடர்பாக அநுராதபுரம் பொலிஸார் விரிவான விசாரணைகளை ஆரம்பித்துள்ளனர்.
சமூக ஊடகங்கள் வாயிலாக சர்ச்சைக்குரிய கருத்துக்களை வெளியிட்டு அடிக்கடி கவனம் ஈர்த்து வரும் தேரராக ராஜாங்கனை சத்தாரதன தேரர் அறியப்படுகிறார்.




