–நகர அபிவிருத்தி அமைச்சின் கணக்காய்வில் தகவல்
நகர அபிவிருத்தி, நிர்மாணத்துறை மற்றும் வீடமைப்பு அமைச்சுக்குச் சொந்தமான 39 சொகுசு வாகனங்கள் பொருளாதார ரீதியில் பயனற்றவை என்றும், நிறுவனத்தின் பயன்பாட்டிற்கு அவசியமற்றவை என்றும் அடையாளம் காணப்பட்டிருந்த போதிலும், அவற்றில் 23 வாகனங்கள், அதாவது 59 சதவீதமானவை, அதிக செலவில் அமைச்சினால் தொடர்ந்து பயன்படுத்தப்பட்டு வருவதாக தேசிய கணக்காய்வு அலுவலகம் வெளியிட்டுள்ள கணக்காய்வு அறிக்கையில் தெரியவந்துள்ளது.
2024 டிசம்பர் 18ஆம் திகதி நிதி, திட்டமிடல் மற்றும் பொருளாதார அபிவிருத்தி அமைச்சினால் வெளியிடப்பட்ட சொத்து முகாமைத்துவ சுற்றறிக்கைக்கு அமைய, அமைச்சின் செயலாளரால் சொகுசு வாகனங்களை அகற்றுவதற்காக அடையாளம் காணும் குழுவொன்று நியமிக்கப்பட்டிருந்தது.
அந்தக் குழுவினால் அமைச்சுக்குச் சொந்தமான 39 வாகனங்கள் பொருளாதார ரீதியில் பயனற்றவை என்றும், நிறுவனத்தின் பயன்பாட்டிற்கு அவசியமற்ற சொகுசு வாகனங்கள் என்றும் அடையாளம் காணப்பட்டிருந்தன.
எனினும், அடையாளம் காணப்பட்ட 23 சொகுசு வாகனங்களை அமைச்சு தொடர்ந்து பயன்படுத்தி வந்ததால், குறித்த சுற்றறிக்கையை வெளியிட்டதன் மூலம் எதிர்பார்க்கப்பட்ட நோக்கங்களை அடைய முடியாத நிலை ஏற்பட்டுள்ளதாக கணக்காய்வில் சுட்டிக்காட்டப்பட்டுள்ளது.
மேலும், அமைச்சினால் வரியின்றி அல்லது வேறு சிறப்பு நிபந்தனைகளின் கீழ் இறக்குமதி செய்யப்பட்ட 13 வாகனங்கள், குறித்த நிபந்தனைகளை முறையாக இரத்து செய்யாமல் அகற்றும் நடவடிக்கைக்கு உட்படுத்தப்பட்டுள்ளதாகவும் கணக்காய்வு அறிக்கையில் தெரிவிக்கப்பட்டுள்ளது.
இதன் காரணமாக அமைச்சுக்கு ரூ. 5,513,873 நிதி இழப்பு ஏற்பட்டுள்ளதாகவும் கணக்காய்வு அறிக்கையில் குறிப்பிடப்பட்டுள்ளது.
