கலகொட அத்தே ஞானசார தேரருக்கு உடனடியாக ஜனாதிபதி மன்னிப்பு வழங்கி, தற்போது நிலவும் நெருக்கடிக்குத் தீர்வு காண வேண்டும் என ஐக்கிய தேசியக் கட்சி வலியுறுத்தியுள்ளது.
இது தொடர்பாக அந்தக் கட்சி வெளியிட்டுள்ள அறிக்கையில் மேலும் தெரிவிக்கப்பட்டுள்ளதாவது:
மூன்று பௌத்த பீடங்களின் மகாநாயக்க தேரர்களின் அறிவுறுத்தலுக்கு அமைய, கலகொட அத்தே ஞானசார தேரரின் விடுதலையை வலியுறுத்தி முன்னெடுக்கப்பட்ட சத்தியாக்கிரகப் போராட்டத்தைத் தற்காலிகமாக முடிவுக்குக் கொண்டுவர நடவடிக்கை எடுக்கப்பட்டுள்ளது.
முன்னாள் பிரதம நீதியரசர் சரத் என். சில்வாவின் கருத்தின்படி, நீதிமன்றத்தை அவமதித்த குற்றச்சாட்டுக்கான அதிகபட்ச சிறைத்தண்டனைக் காலம் 18 மாதங்களாகும். குறித்த குற்றத்திற்காக ஞானசார தேரர் 10 மாதங்களுக்கும் அதிகமான காலம் சிறையில் இருந்துள்ளார்.
மகாநாயக்க தேரர்களின் கோரிக்கைக்கு அமைய, முன்னதாக ஞானசார தேரருக்கு ஜனாதிபதி மன்னிப்பு வழங்க நடவடிக்கை எடுக்கப்பட்டது. மீண்டும் அவருக்கு ஜனாதிபதி மன்னிப்பு வழங்குவது குறித்து பரிசீலிக்க முடியும் என உயர் நீதிமன்றத் தீர்ப்பிலும் குறிப்பிடப்பட்டுள்ளதாக அந்த அறிக்கையில் தெரிவிக்கப்பட்டுள்ளது.
ஞானசார தேரரின் விடுதலையை வலியுறுத்தி முன்னெடுக்கப்பட்ட பேரணி மற்றும் சத்தியாக்கிரகப் போராட்டங்களில் பங்கேற்காத பிக்குகளுக்கு எதிராகவும் அரசாங்கம் நீதிமன்ற உத்தரவுகளைப் பெற நடவடிக்கை எடுத்ததாக ஐக்கிய தேசியக் கட்சி குற்றஞ்சாட்டியுள்ளது.
இத்தகைய நடவடிக்கைகள் இடம்பெற்றிருக்கக் கூடாத பாரதூரமான தவறுகள் எனவும், ஞானசார தேரரின் காவி உடையைக் கழற்றுமாறு உத்தரவிட்டவர்கள் தொடர்பிலும் விசாரணை நடத்துவது பொருத்தமானது எனவும் அந்தக் கட்சி குறிப்பிட்டுள்ளது.
மூன்று பௌத்த பீடங்களின் மகாநாயக்க தேரர்களின் தலையீட்டுடன், கலகொட அத்தே ஞானசார தேரருக்கு உடனடியாக ஜனாதிபதி மன்னிப்பு வழங்கி, தற்போது நிலவும் நெருக்கடிக்கு முடிவுகாண வேண்டும் என ஐக்கிய தேசியக் கட்சி வலியுறுத்தியுள்ளது.
