சமூக ஊடகங்களில் பிரபலமடைவதையும் பணம் சம்பாதிப்பதையும் நோக்கமாகக் கொண்டு, குழந்தைகளை ஆபத்தான நடவடிக்கைகளில் ஈடுபடுத்துவதைத் தடுப்பதற்குப் புதிய சட்ட விதிமுறைகளை அறிமுகப்படுத்த நடவடிக்கை எடுக்கப்பட்டு வருவதாக மகளிர் மற்றும் சிறுவர் விவகார அமைச்சர் சரோஜா சாவித்திரி போல்ராஜ் தெரிவித்துள்ளார்.
சமூக ஊடகங்களுக்கான உள்ளடக்கங்களை உருவாக்கும்போது, குழந்தைகளை ஆபத்தான இடங்களுக்கு அழைத்துச் செல்லுதல், ஆபாசமான வார்த்தைகளைப் பேச வற்புறுத்துதல், வயது வந்தோருக்கு மட்டுமே பொருத்தமான உள்ளடக்கங்களில் அவர்களை ஈடுபடுத்துதல் மற்றும் குழந்தைகளைப் பாலியல் ரீதியாக வெளிப்படுத்தும் உள்ளடக்கங்களை உருவாக்குதல் போன்ற செயற்பாடுகள் இடம்பெறுவதாக அமைச்சர் சுட்டிக்காட்டியுள்ளார்.
சமூக ஊடகங்களில் பிரபலமடைவதற்காகவோ வருமானம் ஈட்டுவதற்காகவோ குழந்தைகளின் பாதுகாப்பையும் தனியுரிமையையும் ஆபத்துக்குள்ளாக்குவது பாரதூரமான பிரச்சினை என்றும் அவர் வலியுறுத்தியுள்ளார்.
குழந்தைகளின் தனியுரிமையைப் பாதுகாப்பது பெற்றோரின் பொறுப்பும் ஆகும்!
குழந்தையொருவரின் தனியுரிமையை ஆபத்துக்குள்ளாக்குவதற்கு பெற்றோருக்குக்கூட உரிமை கிடையாது என அமைச்சர் குறிப்பிட்டுள்ளார்.
குழந்தையொருவரைச் சமூக ஊடகங்களில் பிரபலமான நபராக உருவாக்குவது தொடர்பான தீர்மானங்களை எடுக்கும்போது, குழந்தையின் வயது மற்றும் முதிர்ச்சிநிலையைக் கருத்தில் கொள்ள வேண்டும் என்றும் அவர் தெரிவித்துள்ளார்.
பெற்றோரின் பொறுப்பற்ற சமூக ஊடகப் பயன்பாட்டினால் குழந்தைகளின் பாதுகாப்பு பாரிய ஆபத்துக்கு உள்ளாகும் பட்சத்தில், அவர்களின் நலனைக் கருத்திற்கொண்டு பாதுகாப்பான பராமரிப்பின் கீழ் ஒப்படைப்பது உள்ளிட்ட நடவடிக்கைகளை மேற்கொள்ள வேண்டிய நிலை ஏற்படலாம் என்றும் அமைச்சர் மேலும் தெரிவித்துள்ளார்.
குழந்தைகளுக்கு உகந்த ஊடகக் கலாசாரத்தை உருவாக்க வழிகாட்டல்கள்!
குழந்தைகளுக்கு உகந்த ஊடகக் கலாசாரத்தை உருவாக்கும் நோக்கில், நிபுணர் குழுவொன்றின் மூலம் வழிகாட்டல் தொகுப்பொன்றைத் தயாரிப்பதற்கு மகளிர் மற்றும் சிறுவர் விவகார அமைச்சும் தேசிய சிறுவர் பாதுகாப்பு அதிகாரசபையும் இணைந்து நடவடிக்கை எடுத்துள்ளன.
குறித்த வழிகாட்டல் தொகுப்பைத் தயாரிக்கும் பணிகள் தற்போது இறுதிக்கட்டத்தை எட்டியுள்ளதுடன், எதிர்காலத்தில் அதனை நடைமுறைப்படுத்தத் திட்டமிடப்பட்டுள்ளது.
வெளிநாடுகளிலும் சட்ட நடவடிக்கைகள்!
சமூக ஊடகங்களில் வணிக நோக்கங்களுக்காகவோ பிரபலமடைவதற்காகவோ குழந்தைகளைப் பயன்படுத்தும் நடைமுறை ‘Kidfluencing’ என அழைக்கப்படுகிறது.
இத்தகைய செயற்பாடுகளைக் கட்டுப்படுத்துவதற்காகப் பிரான்ஸ் மற்றும் அமெரிக்காவின் கலிபோர்னியா மாநிலம் உள்ளிட்ட பகுதிகளிலும் சட்ட நடவடிக்கைகள் மேற்கொள்ளப்பட்டுள்ளன.
அத்தகைய நடவடிக்கைகளில், குழந்தைகள் சமூக ஊடகங்கள் மூலம் ஈட்டும் வருமானத்தின் ஒரு பகுதியை அவர்களின் எதிர்காலத்திற்காகப் பாதுகாத்து வைப்பதும், இவ்வாறான செயற்பாடுகளில் குழந்தைகளை ஈடுபடுத்தும் நேரத்தைக் கட்டுப்படுத்துவதும் அடங்குகின்றன.
இந்த சர்வதேசப் போக்குகளைக் கருத்தில் கொண்டு, இலங்கையிலும் சமூக ஊடகப் பயன்பாட்டின்போது குழந்தைகளின் பாதுகாப்பு, தனியுரிமை மற்றும் நலனை உறுதிப்படுத்தும் வகையில் புதிய சட்ட மற்றும் வழிகாட்டல் கட்டமைப்பொன்றை அறிமுகப்படுத்த எதிர்பார்க்கப்படுகிறது.
