ரக்பி வீரர் வசீம் தாஜுதீன் கொலை செய்யப்படுவதற்கு முன்பு அவரது வாகனத்துக்கு பின்னால் பயணித்த மற்றுமொரு வாகனத்தில் இருந்த ஒருவர், ஒழுங்கமைக்கப்பட்ட குற்றக் குழு உறுப்பினர் மித்தெனியே கஜ்ஜா என்பவரென அடையாளம் காணப்பட்டுள்ளதாக பதில் காவல்துறை ஊடகப் பேச்சாளர் தெரிவித்துள்ளார்.

விசேட ஊடக சந்திப்பில் இதனை குறிப்பிட்ட அவர், அந்த வாகனத்தில் பயணித்த நபர் மித்தெனியே கஜ்ஜா என்பதை அவரது மனைவி அடையாளம் கண்டுள்ளதாக அவர் குறிப்பிட்டுள்ளார்.

ரக்பி வீரர் வசீம் தாஜுதீன் 2012ஆம் ஆண்டு மே 17ஆம் திகதி நாரஹேன்பிட்டி ஷாலிகா மைதானம் அருகே சந்தேகத்திற்கிடமான முறையில் உயிரிழந்த சம்பவம் குறித்த நீண்டகால விசாரணையில் ஒரு முக்கிய திருப்புமுனை ஏற்பட்டுள்ளது.

ஆரம்பத்தில் விபத்தாகக் கருதப்பட்டு, நாரஹேன்பிட்டி காவல்துறை மற்றும் பொரளை குற்றப் புலனாய்வுப் பிரிவினரால் முடித்துவைக்கப்பட்ட இந்த வழக்கு, 2015 ஆம் ஆண்டில் அன்றைய கொழும்பு பிரதி காவல்துறை மா அதிபர் காமினி மாத்துரட்டவின் அறிக்கை அடிப்படையில், குற்றப் புலனாய்வுத் திணைக்களத்துக்கு மாற்றப்பட்டது.

குற்றப்புலனாய்வு திணைக்களம் மேற்கொண்ட விரிவான விசாரணையில், ஆரம்ப பிரேதப் பரிசோதனை முறையாக நடத்தப்படவில்லை என்பதும், மரணத்தில் சந்தேகம் இருப்பதும் தெரியவந்தது.

பின்னர் நீதிமன்ற அனுமதியுடன் தாஜுதீனின் உடல் தோண்டி எடுக்கப்பட்டு, இரண்டாவது பிரேதப் பரிசோதனை நடத்தப்பட்டது. இதில், மார்பு மற்றும் கழுத்துப் பகுதிகளில் எலும்புகள் காணாமல் போயிருந்ததுடன், தாஜுதீனின் மரணம் விபத்தல்ல, அது ஒரு கொலை என்பது உறுதிப்படுத்தப்பட்டது.

கொலையாகக் கருதி விசாரணையைத் தொடர்ந்த குற்றப்புலனாய்வு திணைக்களம், தாஜுதீன் கடைசியாக ஹேவலொக் டவுனில் ஒரு பல்பொருள் அங்காடிக்கு அருகே வாகனத்தை நிறுத்தி தண்ணீர் போத்தல் வாங்கச் சென்றதையும், அங்கிருந்து புறப்பட்டபோது அவரது வாகனத்தை மற்றொரு வாகனம் பின்தொடர்வதையும் சிசிடிவி காட்சிகளில் கண்டறிந்தது.

இரண்டாவது வாகனத்திற்கு அருகில் நின்ற அடையாளம் தெரியாத ஒரு நபரின் காட்சியை குற்றப்புலனாய்வு திணைக்களம் வெளியிட்டது, எனினும் குறித்த நபர் அடையாளம் காணப்படவில்லை.

சமீபத்தில் இந்தோனேசியாவில் கைது செய்யப்பட்ட பெக்கோ சமன் உள்ளிட்ட பல தேடப்படும் குற்றவாளிகள் மூலம் இந்த வழக்கில் ஒரு புதிய துருப்பு கிடைத்துள்ளது.

இந்த ஆண்டின் ஆரம்பத்தில் சுட்டுக் கொல்லப்பட்ட அருண சாந்த, எனப்படும் "மித்தெனிய கஜ்ஜா"வின் கொலையுடன் பெக்ககோ சமனுக்குத் தொடர்பு இருப்பது தெரியவந்தது.

இதையடுத்து, குற்றப்புலனாய்வு திணைக்களத்தினருக்கு கஜ்ஜாவின் மனைவியிடமிருந்து ஒரு தன்னார்வ அறிக்கை கிடைத்தது. தனது கணவருக்கு அச்சுறுத்தல்கள் வந்ததாகவும், அவர் 2023ஆம் ஆண்டு ஒரு யூடியூப் நேர்காணலில் தாஜுதீன் வழக்கு குறித்துப் பேசியதாகவும் அவர் உறுதிப்படுத்தினார்.

தாஜுதீன் வழக்கில் இரண்டாவது வாகனத்திற்கு அருகில் இருந்த நபரின் சிசிடிவி படத்தை கஜ்ஜாவின் மனைவிக்குக் காண்பித்தபோது, தனது கணவரின் நாட்பட்ட இடுப்பு வலியால் அவர் கைகளை இடுப்பில் வைக்கும் தோரணையைச் சுட்டிக்காட்டி, அந்தப் படத்தில் இருப்பது மறைந்த தனது கணவர் அருண சாந்த எனப்படும் "கஜ்ஜா" தான் என்று அவர் அடையாளம் காட்டினார்.

13 ஆண்டுகளுக்கும் மேலாக நீடித்த இந்த வழக்கில் இந்த அடையாளம் காணல் ஒரு குறிப்பிடத்தக்க திருப்புமுனையாகப் பார்க்கப்படுகிறது.

குற்றப்புலனாய்வு திணைக்களம் தொடர்ந்து வசீம் தாஜுதீன் கொலையை தீவிரமாக விசாரித்து வருவதாக பதில் காவல்துறை ஊடகப் பேச்சாளர் தெரிவித்துள்ளார்.

உதவி பொலிஸ் கண்காணிப்பாளர்கள் ரோஹன் ஒலுகல மற்றும் மஹிந்த ஜெயசுந்தர ஆகியோர் கெஹல்பத்தர பத்மேவை கைது செய்ய இந்தோனேசியாவிற்கு வந்ததாக ஒரு மூத்த பொலிஸ் அதிகாரி தனக்குத் தகவல் அளித்ததாக துபாயில் இருக்கும் தரூன் என்ற நபர் தெரிவித்துள்ளார்.

தரூன் என்ற நபர் கெஹல்பத்தர பத்மேவின் பாதாள உலகக் கும்பலில் ஒரு பலசாலி, அவரும் வெளிநாட்டில் உள்ளார்.

அதன்படி, கெஹல்பத்தர பத்மேவுக்குத் தகவல் கொடுத்ததாகக் கூறப்படும் பொலிஸ் அதிகாரியைக் கைது செய்ய காவல்துறை விரிவான விசாரணைகளைத் தொடங்கியுள்ளது.

இதில் தனது நம்பிக்கையின்மையை வெளிப்படுத்திய பொலிஸ் மா அதிபர் பிரியந்த வீரசூரிய, காவல் துறையில் இருந்தபோது இந்தக் துரோகத்தைச் செய்த அதிகாரியை மன்னிக்க முடியாது என்று கூறினார்.

இரண்டு உதவி பொலிஸ் கண்காணிப்பாளர்கள் இந்தோனேசியாவிற்கு வந்து சேர்ந்தது தெரியவந்தவுடன், கெஹல்பத்தர பத்மே உள்ளிட்ட பாதாள உலகக் குண்டர்கள் தாங்கள் தங்கியிருந்த சொகுசு குடியிருப்பை கைவிட்டு வேறு அடுக்குமாடி குடியிருப்பிற்கு தப்பிச் சென்றுள்ளனர்.

காவல்துறையினருக்கே கிடைத்த இந்த ரகசிய தகவலின் காரணமாக, இந்த பாதாள உலகக் குண்டர்களை எந்த வகையிலும் கைது செய்ய முடியாவிட்டால், அது மிகப்பெரிய இழப்பாக இருக்கும் என்றும் காவல்துறை வட்டாரங்கள் தெரிவிக்கின்றன.

இன்டர்போல் ரெட் வாரண்ட் பெறப்பட்டதாக ஒரு பொலிஸ் அதிகாரி கெஹல்பத்தர பத்மேவிடம் தெரிவித்ததாகவும் தெரியவந்துள்ளது.

இந்த பொலிஸ் அதிகாரி கெஹல்பத்தர பத்மேவின் வாட்ஸ்அப் தொலைபேசிக்கு தொடர்புடைய ரெட் வாரண்டின் நகலை அனுப்பியதாகவும் தெரியவந்துள்ளது.

மன்னாரில் காற்றாலை மற்றும் கனிய அகழ்வு திட்டத்திற்கு எதிராக 55 நாட்களுக்கு மேல் போராடிக்கொண்டிருக்கும் மக்களை நேற்றிரவு அடித்து துன்புறுத்தி புரிந்த கீழ்த்தரமான செயல் மூலம் அநுர அரசாங்கம் தங்களை நிரூபித்துள்ளார்கள் என புதிய ஜனநாயக மாக்சிச லெனினிசக் கட்சியின் பொதுச் செயலாளர் சி.கா. செந்திவேல் தெரிவித்துள்ளார்.

அவர் ஊடகங்களுக்கு வெளியிட்ட கண்டன அறிக்கையிலேயே இவ்வாறு குறிப்பிட்டுள்ளார்.

அதில் மேலும் தெரிவித்துள்ளதாவது, ”மன்னார் தீவு மக்களின் தொடர்ச்சியான போராட்டம் காரணமாக மன்னார் காற்றாலை மற்றும் கனிய மணல் அகழ்வு திட்டத்தை தற்காலிகமாக இடைநிறுத்தி மக்களின் கருத்துக்களை கேட்டறிந்து முடிவுக்கு வருவதாக ஜனாதிபதி அறிவித்திருந்தார்.

கடுமையாக எதிர்த்த மக்கள் 

இந்தநிலையில் எரிசக்தி அமைச்சர் தலைமையிலான குழுவினர் மன்னார் தீவுக்கு சென்று மக்களிடம் கருத்து கேட்ட போது மக்கள் அத்திட்டத்தை மிகக் கடுமையாக எதிர்த்துள்ளனர்.

அண்மையில் ஜனாதிபதி செயலகத்துக்கு முன்பாகவும் போராடி முழு நாட்டிற்கும் தமது கோரிக்கையை வெளிப்படுத்தி இருந்தனர். இவை அனைத்தையும் புறந்தள்ளி காற்றாலை திட்டத்திற்குரிய டர்பைன் மற்றும் விசிறிகளை நேற்று இரவு மன்னார் தீவுக்கு கொண்டு வந்துள்ளனர்.

அரச அடக்கு முறை

அதனை தடுக்க முயன்ற பெண்கள், இளைஞர்கள், பாதிரிமார்கள் உட்பட மக்களை அடித்து காயப்படுத்தி கேவலமான அரச அடக்கு முறையை அநுரவின் காவல்துறை படை மேற்கொண்டதை மிக வன்மையாக கண்டிக்கின்றேன்.

இச்செயல் மூலம் அரசாங்கம் உழைக்கும் மக்கள் பக்கம் இல்லை என்பதை அழுத்தம் திருத்தமாக பதிவு செய்திருக்கின்றனர். மின்சார துறையின் ஏகபோக அதிகாரத்தை அதானி குற்றங்கும்பல் கம்பனிக்கு வழங்கி மின்சார கட்டணத்தை உயர்த்தி மக்களை சுரண்டும் திட்டத்தை கைவிட வேண்டும்.

இத்திட்டத்தை தடுத்து நிறுத்த தொடர்ந்து போராடும் மன்னார் தீவு மக்களோடு இணைந்து நாட்டின் ஏனைய அனைத்து சக்திகளும் போராட முன்வர வேண்டும்” என குறிப்பிடப்பட்டுள்ளது.

குருநாகல் - மெல்சிரிபுர பன்சியாகமவில் உள்ள பௌத்த வன ஆசிரமமான நா உயன ஆரண்ய சேனாசனத்தில் கேபிள் கார் அறுந்து விழுந்த விபத்தில் ஐந்து பிக்குகள் உயிரிழந்துள்ளனர். 

இந்த விபத்தில் மேலும் சில பிக்குகள் காயமடைந்துள்ள நிலையில், உடனடியாக குருநாகல் பொது வைத்தியசாலையில் அனுமதிக்கப்பட்டதாக வைத்தியசாலை தகவல்கள் தெரிவிக்கின்றன. 

விபத்து இடம்பெற்ற போது கேபிள் காரில் 13 பிக்குகள் இருந்துள்ளனர்.

இந்த விபத்து நேற்றிரவு (25) 9 மணியளவில் இடம்பெற்றுள்ளதாக தெரிவிக்கப்படுகிறது.