kumar
கடந்த சில மாதங்களுக்கு முன்பாக கொழும்பு விசேட குற்ற புலனாய்வு அதிகாரிகளால் மேற்கொள்ளப்பட்ட ஈஸ்டர் குண்டு தாக்குதல் தொடர்பான விசாரணைகளின் பிரகாரம் பிள்ளையான் கைது செய்யப்பட்டுள்ளதாக தெரிய வந்துள்ளது.
தமிழ் மக்கள் விடுதலைப் புலிகள் கட்சியின் தலைவர் சி. சந்திரகாந்தன் ஈஸ்டர் குண்டு தாக்குதல் தொடர்பாக வழங்கிய வாக்குமூலத்தின் பிரகாரம் மீண்டும் அவர் இன்று அவரது மட்டக்களப்பு அலுவலகத்தில் வைத்து கொழும்பிலிருந்து வருகை தந்த விசேட குற்ற புலனாய்வுத் துறை அதிகாரிகளினால் கைது செய்யப்பட்டு கொழும்புக்கு அழைத்துச் செல்லப்பட்டுள்ளார்.
2025 வரவு செலவுத்திட்டத்தின்படி தனியார் துறை ஊழியர்களுக்கான குறைந்தபட்ச ஊதியத்தை ரூ.17,000 லிருந்து ரூ.27,000 ஆகவும், தினசரி ஊதியத்தை ரூ.700 லிருந்து ரூ.1,080 ஆகவும் உயர்த்த அமைச்சரவை ஒப்புதல் அளித்துள்ளது.
இது ஏப்ரல் 1, 2025 முதல் அமுலுக்கு வருவதாக அரசாங்க தகவல் திணைக்களம் தெரிவித்துள்ளது.
இலஞ்சம் அல்லது ஊழல் குற்றச்சாட்டுகளை விசாரிக்கும் ஆணைக்குழு (CIABOC) தாக்கல் செய்த லஞ்ச வழக்கு தொடர்பாக பதுளை மாவட்ட நாடாளுமன்ற உறுப்பினர் சாமர சம்பத் தசநாயக்கவுக்கு கொழும்பு நீதவான் நீதிமன்றம் பிணை வழங்கியுள்ளது.
குருணாகலை வெஹெர பகுதியில் உள்ள ஒரு பெட்ரோல் நிரப்பும் நிலையத்தில் இருந்து பெட்ரோல் நிரப்பும் போது, லாரியின் பெட்ரோல் டேங்க் வெடித்ததில் நால்வர் உயிரிழந்துள்ளதாகவும், நான்கு பேர் படுகாயமடைந்து மருத்துவமனையில் அனுமதிக்கப்பட்டுள்ளதாக குருநாகல் பொலிஸார் தெரிவித்துள்ளனர்.
அந்த நேரத்தில் ஏற்பட்ட தீயைக் கட்டுப்படுத்த குருநாகல் காவல் நிலைய அதிகாரிகள் மற்றும் குருநாகல் நகராட்சி மன்ற தீயணைப்புத் துறை அதிகாரிகள் இணைந்து பணியாற்றினர்.
இறந்தவர்களின் அடையாளங்கள் இன்னும் உறுதிப்படுத்தப்படவில்லை என்று போலீசார் தெரிவிக்கின்றனர்.
சடலங்கள் சம்பவ இடத்தில் போலீஸ் பாதுகாப்பில் வைக்கப்பட்டுள்ளன, மேலும் நீதவான் விசாரணை நடத்த திட்டமிடப்பட்டுள்ளது. குருநாகல் பொலிஸார் மேலதிக விசாரணைகளை மேற்கொண்டு வருகின்றனர்.
முன்னாள் ஜனாதிபதி மஹிந்த ராஜபக்ஷவின் மகன் யோஷித ராஜபக்ஷ உள்ளிட்ட மூன்று பேரின் பெயர்களில் நான்கு சொகுசு BMW கார்கள் சட்டவிரோதமாக இறக்குமதி செய்யப்பட்டுள்ளதாக COPA குழுவில் தெரியவந்துள்ளது.
வெளிநாடுகளில் பணிபுரியும் இலங்கை தொழிலாளர்கள் தற்காலிகமாக வரி இல்லாமல் மின்சார வாகனங்களை இறக்குமதி செய்ய அனுமதிக்கப்பட்ட காலகட்டத்தில் இந்த நான்கு சொகுசு வாகனங்கள் இறக்குமதி செய்யப்பட்டதாக கோபா குழுவில் தெரியவந்தது.
இந்த கார்கள் 2023 மே (01) முதல் செப்டம்பர் (15) வரை யோஷித ராஜபக்ஷ, சானுக உபேந்திர ராஜபக்ஷ மற்றும் அயந்தி பண்டாரநாயக்க ஆகியோரின் பெயர்கள் மற்றும் முகவரிகளில் வரி இல்லாமல் இறக்குமதி செய்யப்பட்டதாக தெரியவந்துள்ளது.
செப்டம்பர் 2024 (30) வரை நாட்டிற்கு 921 வாகனங்கள் இறக்குமதி செய்யப்பட்டுள்ளதாக தெரியவந்துள்ளது, மேலும் ஆடம்பர வரி விலக்கு வரம்பு ரூ. 6 மில்லியனில் இருந்து ரூ. 12 மில்லியன், இதன் விளைவாக அரசாங்கத்திற்கு 242 மில்லியன் வருவாய் இழப்பு ஏற்பட்டதாக கூறப்படுகிறது.
தமிழர் ஆண்டிலேயே பிரபவ எனும் வருடத்தில் தொடங்கி அட்சய எனும் வருடம் வரை 60 வருட கால சுழற்சியில் விசுவாவசு வருடம் என்பது 39 ஆவது வருடமாக திகழ்கிறது.
விசுவாவசு என்றால் நேர்மையான பண்பாளர் , தயாள சிந்தனையாளர் செல்வந்தர் என்று பொருள்.நிகழும் மங்கலகரமான குரோதி வருஷம் நிறைவுற்று இப்புதிய “விசுவாவசு” வருஷமானது பங்குனி மாதம் 30ம் நாள் ஞாயிற்றுக்கிழமை பின்னிரவு (2025.04.14) 02 .29 மணியளவில் பிறக்கின்றது.
இத்தினத்தில் அனைவரும் சங்கற்பித்து மருத்து நீர்தேய்த்து ஸ்நானம் பண்ணி புத்தாடையணிந்து சிவசின்னங்களை தரித்து தீபம், நிறைகுடம் கண்ணாடி, பசு போன்ற மங்கலப் பொருள்களில் முகதரிசனம் செய்து ஆலய வழிபாடாற்றி பெற்றோர் குரு ஆகிய பெரியோர்களின் நல்லாசி பெற்று அறுசுவை உண்டிகளுண்டு இன ஜன பந்துக்களுடன் அளவளாவி மங்கலகரமாக வாழ வாழ்த்துக்கள்.
மருத்துநீர் தேய்க்க புண்ணிய காலம்
விசு புண்ணிய காலமான 2025.04.13ஆம் திகதி இரவு 10. 29 தொடக்கம் மறுநாள் 2025.04.14ஆம் திகதி திங்கட்கிழமை காலை 6.29 வரை மருத்துநீர் தேய்த்து ஸ்ஞானம் செய்யலாம்.
அதன் போது நோக்கி நிற்க வேண்டிய திசை: வடக்கு
உணவு: உணவுடன் சுக்கு, திப்பிலி, அப்பம் சேர்த்துண்ணவும் என சொல்லப்பட்டுள்ளது
இவ்வருட அதிஷ்ட தெய்வம்: சுப்பிரமணியன். (மலை மீது அமைந்துள்ள முருகன்)
அதிஷ்ட தேவதை: வாராஹி
அதிஷ்ட மூலிகை: சுக்கு, திப்பிலி, அதிஷ்ட கல்: புஷ்பராகம்
கார்ய சித்தி மந்திரம்: உத்திஷ்ட கணபதி மந்திரம்
அதிஷ்ட ஹோமம்: கணபதி ஹோமம்
இவ்வருட ஆட்சி சித்தர்: கோரக்கர்
கைவிஷேடம்:
2025.04:14ஆம் திகதி திங்கள் காலை 9.10 – 11.45 மணி வரை…
புத்தாண்டு விஷேட பூஜை செய்யும் நேரம்:
2025.04.14ஆம் திகதி அதிகாலை 2.30 மணிக்கு…
சங்கிரம தோஷ நட்ஷத்திரங்கள்:
திருவாதிரை, சித்திரை 3ம்,4ஆம் பாதங்கள், சுவாதி, விசாகம் 1,2,3ஆம் பாதங்கள், சதயம், பூரட்டாதி 4ஆம் பாதம், உத்தரட்டாதி ஆகிய நட்சத்திரங்களில் பிறந்தவர்கள் தவறாது மருத்து நீர் தேய்த்து வருஷப் பிறப்புக் கருமங்களை முறையாக தெய்வ வழிபாடாற்றி இயன்றளவு தான தருமங்கள் செய்து சங்கிரம தோஷத்தை நிவர்த்தி செய்து கொள்ளுங்கள்.
இடைக்காடரால் பாடப்பட்ட “60 வருட வெண்பா” எனும் பாடலிலே விசுவாவசு வருடத்துக்குரிய பாடல் இது.
“விசுவாவசு வருஷம் வேளாண்மை யேறும் பசு மாடு மாடும் பலிக்குஞ் – சிகநாசம்மற்றையரோ வாழ்வார்கள் மாதங்கண் மீறுமே யுற்றுலகி னல்லமழை யுண்டு”என்பதாகும்.
நாடாளுமன்ற உறுப்பினர் நாமல் ராஜபக்ஷ குற்றப் புலனாய்வுத் திணைக்களத்தில் ஆஜரானார்.
பணமோசடி வழக்கு தொடர்பாக வாக்குமூலம் அளிப்பதற்காக அவர் புலனாய்வுத் திணைக்களத்தில் ஆஜரானார்.
கேகாலை மாவட்ட தேசிய மக்கள் சக்தியின் நாடாளுமன்ற உறுப்பினர் கோசல நுவான் (38 வயது) கரவனெல்ல மருத்துவமனையில் அனுமதிக்கப்பட்டு திடீர் மாரடைப்பு காரணமாக காலமானார்.
இந்தியாவிற்கும் இலங்கைக்கும் இடையில் பல்வேறு துறைகளில் கைச்சாத்திடப்பட்ட 07 புரிந்துணர்வு ஒப்பந்தங்களின் பரிமாற்றம் ஜனாதிபதி அனுர குமார திசாநாயக்க மற்றும் இந்தியப் பிரதமர் நரேந்திர மோடி முன்னிலையில் நடைபெற்றது.
இந்திய - இலங்கை உறவுகளில் ஒரு புதிய அத்தியாயத்தை குறிக்கும் வகையில் வலுசக்தி, டிஜிட்டல் மயமாக்கல், பாதுகாப்பு, சுகாதாரம் ஆகிய துறைகள் மற்றும் நன்கொடை உதவிகள் தொடர்பில் இந்த புரிந்துணர்வு ஒப்பந்தங்கள் பரிமாற்றப்பட்டதாக ஜனாதிபதி ஊடகப்பிரிவு தெரிவித்தது.
இதற்கமைய, மின்சார பரிமாற்ற ஒப்பந்தம், டிஜிட்டல் பரிமாற்றத்திற்காக டிஜிட்டல் தீர்வுகளைப் பகிர்ந்து புரிந்துணர்வு ஒப்பந்தம், திருகோணமலையை வலுசக்தி மையமாக மேம்படுத்தல் ஒத்துழைப்பு ஒப்பந்தம், பாதுகாப்பு ஒத்துழைப்பு தொடர்பான புரிந்துணர்வு ஒப்பந்தம், சுகாதாரம் மற்றும் மருந்துத் துறையில் புரிந்துணர்வு ஒப்பந்தம், இந்திய மருந்து நிறுவனம் மற்றும் தேசிய ஔடதங்கள் ஒழுங்குபடுத்தும் அதிகார சபைக்கு இடையிலான புரிந்துணர்வு ஒப்பந்தம் மற்றும் கிழக்கு மாகாணத்தில் பல்துறை நன்கொடை உதவிக்கான புரிந்துணர்வு ஒப்பந்தங்கள் இன்று(05) பரிமாற்றப்பட்டன.
இதன் பின்னர், 3 அபிவிருத்தித் திட்டங்களின் ஆரம்ப நிகழ்வில் ஜனாதிபதியும் இந்திய பிரதமரும் இணைந்து கொண்டனர்.
இதற்கமைய தேசிய மின் கட்டமைப்பில் 50 மெகாவாட் மின்சாரத்தை இணைக்கும் சம்பூர் சூரிய மின்சக்தித் திட்டத்தின் பணிகள் ஆரம்பிக்கப்பட்டன.
வெப்பநிலை, ஈரப்பதன் ஆகியவற்றைக் கட்டுப்படுத்தக்கூடிய தம்புளை விவசாயக் களஞ்சிய கட்டடத் தொகுதி மற்றும் 5000 மதத் தலங்களின் கூரைகளில் சூரிய மின்உற்பத்திக்கான உபகரணங்களை நிறுவும் திட்டம் என்பன காணொளி ஊடாக திறந்து வைக்கப்பட்டன.
உத்தியோகபூர்வ விஜயம் மேற்கொண்டு இந்தியப் பிரதமர் நரேந்திர மோடி நேற்று வெள்ளிக்கிழமை (4) இரவு இலங்கை வந்தடைந்தார். இந்நிலையில், கொழும்பு தாஜ் சமுத்திரா ஹோட்டலுக்கு வந்த பிரதமர் மோடிக்கு கொழும்பில் உள்ள இந்திய சமூகத்தினர் பெரும் வரவேற்பளித்தனர்.
“கொழும்பிலுள்ள இந்திய சமூகத்தினர் எனக்கு வழங்கிய ரம்மியமான வரவேற்புக்கு மழை கூட தடையாக இருக்கவில்லை. அவர்களது அன்பான அரவணைப்பு மற்றும் உற்சாகத்தினால் நான் மிகுந்த நெகிழ்ச்சி அடைந்தேன். அவர்களுக்கு எனது நன்றி!” என்று குறிப்பிட்டுள்ளார்.
இதேவேளை நேற்று இரவு கட்டுநாயக்க பண்டாரநாயக்க சர்வதேச விமான நிலையத்தை வந்தடைந்த இந்திய பிரதமர் நரேந்திர மோடிக்கு சிறப்பு வரவேற்பு அளிக்கப்பட்டது.
அதன்படி வெளிநாட்டு அலுவல்கள், வெளிநாட்டு வேலைவாய்ப்பு மற்றும் சுற்றுலாத்துறை அமைச்சர் விஜித ஹேரத், சுகாதாரம் மற்றும் ஊடக அமைச்சர் நலிந்த ஜயதிஸ்ஸ, மீன்பிடி, நீரியல் மற்றும் கடல் வள அமைச்சர் ராமலிங்கம் சந்திரஸேகர், மகளிர் மற்றும் சிறுவர் விவகார அமைச்சர் சரோஜா சாவித்திரி போல்ராஜ், விஞ்ஞானம் மற்றும் தொழில்நுட்ப அமைச்சர் கிரிஷாந்த அபேசேன மற்றும் பொருளாதார அபிவிருத்தி பிரதி அமைச்சர் அனில் ஜயந்த பெர்னாண்டோ ஆகியோரால், பிரதமர் ஸ்ரீ நரேந்திர மோடி மற்றும் இராஜதந்திரிகள் குழுவினருக்கு சிறப்பு வரவேற்பு அளிக்கப்பட்டது.
இந்நிலையில் விமான நிலையத்தில் என்னை வரவேற்ற அமைச்சர்கள் மற்றும் பிரமுகர்களுக்கு நன்றி என பிரதமர் மோடி தனது உத்தியோகபூர்வ எக்ஸ் தளத்தில் குறிப்பிட்டுள்ளார்.